કાર્યવાહી / અમદાવાદમાં ઘરે બેસીને વિદેશી નાગરિકોને લોન આપવાની લાલચે છેતર્યા, અંતે સાઇબર ક્રાઇમ આંબી ગઇ

• અમદાવાદમાંથી વિદેશી નાગરિકો સાથે ઠગાઈ
• અમદાવાદના જુહાપુરામાંથી ઝડપાયા 2 શખ્સ
• લોન આપવાની લાલચ આપતા

અમદાવાદ શહેરમાંથી વિદેશી નાગરિકો સાથે ઠગાઈ કરતું વધુ એક કોલ સેન્ટર ઝડપાયુ છે. પોલીસ ઝપટે ચડેલા જહીર અબ્બાસ શેખ અને સમીર મોગલ નામના આરોપીઓ જુહાપુરા વિસ્તારના જ રહેવાસી છે. જેમાંથી સમીર મોગલએ પોતાના ઘરમાં ગેરકાયદેસર કોલ સેન્ટર શરૂ કર્યું હતું. જેને અમેરિકન નાગરિકોનો ડેટા મેળવી અમેરિકન નાગરિકોને ફોન કરીને પોતે અમેરિકાની વન મેઇન ફાઇનાન્સ નામની લોન આપનારી કંપનીના કર્મચારી તરીકેની ઓળખ આપી લોન આપવાની લાલચ આપી એનકેન પ્રકારે રૂપિયા પડાવી લેતા હતા.

 ક્રેડિટ સ્કોર ઓછો હોવાથી રકમ જમા કરાવવાનું કહેતા 
આ સમગ્ર મામલે સાઇબર ક્રાઇમએ દરોડા પાડીને ઘરમાં ચાલતું ગેરકાયદેસર કોલ સેન્ટર ઝડપી પાડ્યું હતું. આરોપીઓ પાસેથી બે મોબાઇલ ફોન કબ્જે કરાયા છે. પકડાયેલા આરોપીઓ અમેરિકન નાગરિકોને ફોન કરીને લોન આપવાની લાલચ આપી વેરિફિકેશન ફી, લોન એગ્રીમેન્ટ ફી ના નામે ડોલર પડાવતા હોવાનું સામે આવ્યું છે.આરોપીઓ અમેરિકન નાગરિકોને લોન આપવાનું કહીને ફસાવી તમારા ખાતામાં લોનના પૈસા ડિપોઝિટ કરાવવાની કોશિશ કરી રહ્યા છીએ પરંતુ ક્રેડિટ સ્કોર ઓછો હોવાથી સક્સેસફૂલ થતું નથી જેના માટે તમારે અમારી કંપની વચ્ચે મ્યુચ્યુઅલ ટ્રાન્જેક્શન કરવાનું રહેશે જેનાથી તમારો સ્કોર 700 પોઇન્ટ વધી જશે અને લોનના પૈસા તમને આપવામાં આવશે. તેવું જણાવીને અલગ અલગ માધ્યમથી અમેરિકન ડોલર મેળવી લેતા હતા. 

 
જહીર શેખ અગાઉ પણ પોલીસ ચોપડે ચડયો છે
અમદાવાદ સાયબર ક્રાઇમએ બંને આરોપીઓને ઝડપીને તપાસ કરતા પકડાયેલા આરોપીઓમાંથી જહીર શેખ અગાઉ પણ સાયબર ક્રાઈમ બ્રાન્ચ ખાતે એક ગુનામાં ઝડપાયો હોવાનું સામે આવ્યું છે. ત્યારે પકડાયેલા આરોપીઓ સિવાય આ ગુનામાં કોણ કોણ સામેલ છે અને અત્યાર સુધીમાં કેટલા અમેરિકન નાગરિકો સાથે આરોપીઓએ કેટલા રૂપિયાની ઠગાઈ હાજરી છે તે દિશામાં પૂછપરછ શરૂ કરી છે.