છત્તીસગઢ / વાહ! સાહેબ રૌફ તો જુઓ! સેલ્ફી લેતા ફોન પાણીમાં પડ્યો તો ડેમ ખાલી કરાવવા લાગ્યા, લાખો લિટર પાણીનો વેડફાટ

• છત્તીસગઢનાં કાંકેર જિલ્લામાં એક ચોંકવાનારી ઘટના
• ફરવા ગયેલ ફૂડ ઇન્સ્પેકટરનો મોબાઈલ પડ્યો ડેમમાં
• ફૂડ ઇન્સ્પેકટરે ડેમમાંથી લાખો લિટર પાણી વેડફી નાખ્યું 
• 21 લાખ લિટર પાણીના વેડફાટ બાદ ફોન મળ્યો પણ બંધ હાલતમાં

છત્તીસગઢનાં કાંકેર જિલ્લામાં એક ચોંકવાનારી ઘટના સામે આવી છે. વાત જાણે એમ છે કે, કાંકેરના પંખાજૂરમાં એક ફૂડ ઇન્સ્પેકટરે પાણીમાં પડેલો પોતાનો મોંઘો મોબાઈલ ફોન પાછો મેળવવા માટે ડેમમાંથી લાખો લિટર પાણી વેડફી દીધું. એક ફોન ખાતર ડેમમાંથી જે પાણી વેડફાયુ તેનાથી દોઢ હજાર એકર ખેતરમાં સિંચાઈ થઈ શકી હોત. જોકે અધિકારીનો કિંમતી મોબાઈલ ફોન મળી આવ્યો હતો પણ તે ખરાબ થઈ ચૂક્યો હતો.

કાંકેર જિલ્લામાં કોયલીબેડા બ્લોકના એક ફૂડ ઇન્સ્પેકટર રવિવારે રજા માટે ખેરકટ્ટા પરલકોટ જળાશય પહોંચ્યા હતા. જ્યાં અધિકારીનો મોંઘો મોબાઈલ ફોન ખેરકટ્ટા પરલકોટ જળાશયના ઓવરબ્રિજ પર 15 ફૂટ સુધી ભરાયેલા પાણીમાં પડ્યો હતો. અધિકારીએ પહેલા નજીકના ગ્રામજનોને મોબાઈલ શોધવા માટે લગાડ્યા. અનુભવી તરવૈયાઓને બોલાવ્યા પણ તેમનો મોબાઈલ ન મળ્યો. 

આવા અધિકારીઓનું શું કરવું! | VTV Gujarati#vtvgujarati #vtvcard #trending #chhatisgarh pic.twitter.com/C3lxh3u2Ej

— VTV Gujarati News and Beyond (@VtvGujarati) May 26, 2023

સિંચાઈ વિભાગના અધિકારીઓ સાથે ચર્ચા અને પછી..... 
આ પછી ફોન હટાવવા માટે સિંચાઈ વિભાગના અધિકારીઓ સાથે ચર્ચા કરવામાં આવી હતી. ત્યારબાદ 30 HPનો પંપ લગાવીને જળાશયનું પાણી બહાર કાઢવામાં આવ્યું હતું. છેલ્લા ત્રણ દિવસથી પાણી કાઢવા માટે પંપ સતત ચાલુ હતો. જોકે જળાશયમાંથી સતત પાણી ઉપાડવાનો મામલો ઉપર સુધી પહોંચતા સિંચાઈ વિભાગના અધિકારીઓ ઘટના સ્થળે દોડી આવ્યા હતા. જ્યાં પંપ બંધ કરી દેવાયો હતો. ત્યાર બાદ ફરી શોધખોળ કરવા પર મોબાઈલ ફોન મળી આવ્યો પરંતુ તે ખરાબ હતો.

21 લાખ લિટર પાણીનો વેડફાટ
એક અંદાજ મુજબ ગત સોમવારથી ગુરુવાર સુધીમાં 24 કલાક સતત ચાલતા 30 હોર્સ પાવરના બે ડીઝલ પંપ દ્વારા આશરે 21 લાખ લિટર પાણીનો વેડફાટ થયો હતો. આ પાણીનો જથ્થો દોઢ હજાર એકર જમીનને સિંચાઈ માટે પૂરતો હતો.  હવે સવાલ એ થાય છે કે અધિકારીના મોબાઈલમાં શું હતું? જેના માટે સિંચાઈ માટે વપરાતું પાણી આટલી હદે વહી ગયું હતું.

5 ફૂટ સુધી પાણી કાઢવાની પરવાનગી અપાઈ: SDO
જળ સંસાધન વિભાગના ઉપ-વિભાગીય અધિકારી રામ લાલ ધીનવારનું કહેવું છે કે, 5 ફૂટ સુધી પાણી ખાલી કરવાની મંજૂરી મૌખિક રીતે આપવામાં આવી હતી. પરંતુ હજુ સુધી 10 ફૂટથી વધુ પાણી હટાવવામાં આવ્યું છે. જોકે આટલી કાળઝાળ ગરમીમાં પણ સિંચાઈના પાણીનો બગાડ કરતા વિસ્તારના સેંકડો ખેડૂતોની રોજીરોટી કરતાં અધિકારીના મોંઘા ફોનની કિંમત કદાચ વધુ છે.