અમદાવાદ / સરખેજમાં સૂતી પત્નીનું પતિએ ગળું કાપીને હત્યા કરી નાખતા અરેરાટી, કારણ અકબંધ

અમદાવાદ શહેરના સરખેજ વિસ્તારમાં આવેલ ઉજાલા ચોકડી નજીક એક હૃદયદ્રાવક ઘટના સામે આવી છે, જેમાં લગ્નના માત્ર ત્રણ મહિનામાં જ પતિએ પોતાની પત્નીની નિર્દયતાપૂર્વક હત્યા કરી હોવાનું બહાર આવ્યું છે. ઘટનાને લઈને સમગ્ર વિસ્તારમાં ચકચાર મચી ગઈ છે.

પ્રાપ્ત વિગતો મુજબ, મૂળ રાજસ્થાનના રહેવાસી મેહુલ મુનિયા અને રસીતા મુનિયા રોજગારી માટે અમદાવાદ આવ્યા હતા. દંપતી સરખેજ વિસ્તારમાં રહેતું હતું. મંગળવારે વહેલી સવારે આશરે 4 વાગ્યાના સમયે ધાબા પર સૂઈ રહેલી રસીતા મુનિયા પર તેના પતિ મેહુલે છરી વડે હુમલો કર્યો હતો.

આરોપીએ પત્નીનું ગળું કાપી નાખતાં તેનું ઘટનાસ્થળે જ મોત નીપજ્યું હતું. ઘટનાની જાણ થતાં સ્થાનિક લોકો અને પોલીસ તાત્કાલિક સ્થળ પર પહોંચી હતી. પોલીસે મૃતદેહને પોસ્ટમોર્ટમ માટે મોકલી આગળની કાર્યવાહી હાથ ધરી છે.

મૃતકના પિતાએ આ મામલે પોલીસ સ્ટેશનમાં ફરિયાદ નોંધાવી છે. ફરિયાદના આધારે પોલીસે આરોપી પતિ મેહુલ મુનિયાની ધરપકડ કરી લીધી છે. પ્રાથમિક તપાસમાં દાંપત્ય જીવનમાં ચાલી રહેલા વિવાદો હત્યાનું કારણ હોઈ શકે તેવી આશંકા વ્યક્ત કરવામાં આવી રહી છે.

આ પણ વાંચોઃ નાસીરનગર ભુતિયા ડિમોલિશન મામલે હવે ઓડિયો ક્લિપ વાયરલ થતાં ગરમાવો

પોલીસ હાલમાં સમગ્ર મામલાની ઊંડાણપૂર્વક તપાસ કરી રહી છે અને હત્યા પાછળના ચોક્કસ કારણો જાણવા માટે આરોપીની પૂછપરછ હાથ ધરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ