- આટલી હતી મુલાયમ સિંહ યાદવની સંપત્તિ
- દીકરા પાસેથી લીધી હતી 2 કરોડની લોન
- અખિલેશને સોંપ્યો હતો રાજકીય વારસો
દેશની રાજનીતિમાં એક યુગનો અસ્ત થયો છે. કદ્દાવર નેતા અને નેતાજીના હુલામણા નામથી જાણીતા બનેલા યુપીના પૂર્વ સીએમ મુલાયમ સિંહ યાદવનું અવસાન થતા શોકની લહેર દોડી ગઈ છે. મુલાયમ સિંહે યાદવે ગુરુગ્રામની જાણીતી મેદાંતા હોસ્પિટલમાં અંતિમ શ્વાસ લીધા હતા. મુલાયમ સિંહ યાદવને શ્વાસ લેવામા તકલીફ અને બીજી બીમારીઓને કારણે 2 ઓક્ટોબરે ગુરુગ્રામની મેદાતાં હોસ્પિટલમાં દાખલ કરાયા હતા.
મુલાયમ સિંહ યાદવનો જન્મ 22 નવેમ્બર 1939ના રોજ ઈટાવા જિલ્લાના સૈફઈ ગામમાં થયો હતો. તેમના પિતાનું નામ સુગર સિંહ યાદવ હતું કે જેઓ ખેડૂત હતા. મુલાયમ સિંહ યાદવ હાલમાં મૈનપુરી સીટ પરથી લોકસભાના સાંસદ હતા. ઉત્તર પ્રદેશની રાજનીતિ હોય કે દેશની રાજનીતિ બંનેમાં મુલાયમ સિંહ યાદવની ગણતરી અગ્રણી નેતાઓમાં થતી. તેઓ ત્રણ વખત યુપીના સીએમ રહી ચૂક્યાં છે અને કેન્દ્ર સરકારમાં રક્ષા મંત્રી પણ રહી ચૂક્યાં છે. આ સિવાય મુલાયમ સિંહ 8 વખત ધારાસભ્ય અને 7 વખત લોકસભા સાંસદ તરીકે પણ ચૂંટાયા છે. વર્ષ 2019ની લોકસભા ચૂંટણી દરમિયાન મૈનપૂરી સીટથી ચૂંટણી ફૉર્મ ભરતા સમયે એમને તેમની મિલકત વિશે જાણકારી આપી હતી.
કેટલી હતી સંપત્તિ?
મુલાયમ સિંહ યાદવની સંપત્તિ વિશે વાત કરીએ તો, 2019ને ચૂંટણી મુજબ તેમની કુલ સંપત્તિ 16.52 કરોડ રૂપિયા હતી. આ સાથે એમને આપેલ માહિતી મુજબ મુલાયમ સિંહ અને તેમની પત્ની સાધના યાદવની વાર્ષિક આવક 32.02 લાખ રૂપિયા હતી.
દીકરા પાસેથી લીધી હતી 2 કરોડની લોન
જણાવી દઈએ કે કરોડોની સંપત્તિ હોવા છતાં તેમના પર 2,13,80,000 રૂપિયાનું દેવું હતું અને ખાસ વાત એ હતી કે આ લોન એમને તેમના પુત્ર અને ઉત્તર પ્રદેશના પૂર્વ મુખ્યમંત્રી અખિલેશ યાદવ પાસેથી લીધી હતી. આ લોન એમને શા માટે લીધી તેનો ઉલ્લેખ એફિડેવિટમાં કરવામાં આવ્યો નથી. આ રિપોર્ટ અનુસાર મુલાયમ સિંહ પાસે Camry Toyota Car Reg કાર હતી.
અખિલેશને સોંપ્યો વારસો
મુલાયમ સિંહે તેમનો રાજકીય વારસો મોટા પુત્ર અખિલેશ યાદવને સોંપ્યો હતો. જણાવી દઈએ કે વર્ષ 2012ની ઉત્તર પ્રદેશ વિધાનસભા ચૂંટણીમાં જ્યારે સમાજવાદી પાર્ટી જીતી હતી એ સમયે મુલાયમ સિંહે અખિલેશ યાદવને મુખ્યમંત્રી પદ સોંપ્યું હતું. એ પછી મુલાયમ સિંહની તબિયત બગડવા લાગી ત્યારે દીકરા અખિલેશ યાદવે પાર્ટીની જવાબદારી પણ સંભાળી લીધી હતી. તેમનો નાનો પુત્ર પ્રતીક રાજકારણમાં સક્રિય નથી પણ તેની પત્ની અપર્ણા યાદવ સમાજવાદી પાર્ટી છોડીને ભાજપમાં જોડાઈ ગઈ હતી. જો કે હાલ મુલાયમ સિંહ યાદવના રાજકીય વારસા પર અખિલેશ યાદવની સત્તા દેખાઈ રહી છે.
જણાવી દઈએ કે મુલાયમ સિંહે બે લગ્ન કર્યા હતા. તેમની પહેલી પત્ની માલતી દેવી હતી એમનું નિધન 2003માં થયું હતું. મુલાયમ સિંહ યાદવની બીજી પત્ની સાધના ગુપ્તા હતી જેમનું 9 જુલાઈ 2022ના રોજ ગુરુગ્રામની મેદાંતા હોસ્પિટલમાં અવસાન થયું હતું. અખિલેશ યાદવ માલતી દેવી અને મુલાયમ સિંહના પુત્ર છે અને પ્રતીક યાદવ મુલાયમ સિંહની બીજી પત્ની સાધના ગુપ્તાના પુત્ર છે.
