કાર્યવાહી / અમદાવાદના સેટેલાઈટમાં હાઇપ્રોફાઇલ જુગારધામ: રિટાયર્ડ ADGPનો દીકરો પણ રંગેહાથ ઝડપાયો, 13 લાખનો મુદ્દામાલ જપ્ત

• અમદાવાદના સેટેલાઇટમાંથી ઝડપાયું જુગારધામ
• 9 હાઇપ્રોફાઇલ લોકો ઝડપાયા
• એક નિવૃત એડિશનલ DGPનો પુત્ર
• માન રેસિડેન્સી હોટલમાં ચાલતુ જુગારધામ

Ahmedabad Crime News : ગુજરાતમાં સાતમ-આઠમે અનેક લોકો જુગાર રમતાં ઝડપાય છે. આ તરફ અમદાવાદના સેટેલાઈટ વિસ્તારમાં એક હાઇપ્રોફાઇલ જુગારધામ ઝડપાયું છે. અહીં નિવૃત એડીશનલ ડીજીપીનો પુત્ર જુગાર રમતાં ઝડપાયો છે. પ્રાથમિક વિગતો મુજબ પોલીસે 3.39 લાખનો મુદ્દામાલ કબ્જે કર્યો છે. આ સાથે ઝડપાયેલ તમામ આરોપીઓ સામે કાયદેસરની કાર્યવાહી હાથ ધરી છે. 

અમદાવાદમાં પૂર્વ એડીશનલ ડીજીપીનો પુત્ર જુગાર રમતા પકડાયો છે. વાત જાણે એમ છે કે, અમદાવાદમાં સેટેલાઈટ પોલીસે હોટલ માન રેસિડેન્સી રેડ કરી હતી. આ દરમિયાન અહીં કુલ 9 લોકો જુગાર રમતા ઝડપાયા હતા. વિગતો મુજબ અહીં પૂર્વ એડીશનલ ડીજીપી હેમરાજ ગેહલોતનો પુત્ર પિયૂષ હેમરાજ ગેહલોત પણ જુગાર રમતાં ઝડપાયો હતો.  

9 જુગારીઓ સાથે મુદ્દામાલ જપ્ત 
આ તરફ સેટેલાઇટ પોલીસે પૂર્વ એડીશનલ ડીજીપી હેમરાજ ગેહલોતના પુત્ર પિયૂષ હેમરાજ ગેહલોત સહિત 9 જુગારીઓને ઝડપી પાડ્યા હતા. આ સાથે તેમની પાસેથી 77 હજાર રોકડ અને 11 મોબાઇલ જપ્ત કરવામાં આવ્યા છે. આ સાથે ટુ વ્હિલર-ફોર વ્હિલર મળી કુલ 13.39 લાખ કબ્જે કરી સેટેલાઇટ પોલીસે વધુ કાર્યવાહી હાથ ધરી છે.

સુરતમાં જુગારધામ પર પોલીસના દરોડા
આ તરફ સુરતમાં પણ જુગારધામ પર પોલીસે કાર્યવાહી કરી છે. વાત જાણે એમ છે કે, સુરતની ખટોદરા પોલીસે 6 જુગારીઓને ઝડપી પાડ્યા છે. પોલીસે સાઇનાથ ઇન્ડસ્ટ્રિયલ એરિયામાં દરોડા પાડ્યા હતા. જેમાં 6 આરોપીઓને ઝડપી પાડી 1.22 લાખ રોકડ સહિત 4.17 લાખનો મુદ્દામાલ જપ્ત કર્યો છે.