જ્ઞાનવાપી કેસ મામલો / ASIના રિપોર્ટ બાદ હિન્દુ પક્ષના વકીલે કહ્યું - "કોઈ સમાધાન નહીં, એકમાત્ર ઉપાય એ છે કે મુસ્લિમ પક્ષે જગ્યા ખાલી કરી દે"

• જ્ઞાનવાપી શ્રૃંગાર ગૌરી કેસ પર હિન્દુ પક્ષના વકીલે આપી પ્રતિક્રિયા
• હિન્દુ પક્ષ હવે મુસ્લિમ પક્ષ સાથે કોઈપણ પ્રકારની સમજૂતી કરશે નહીં
• મુસ્લિમ પક્ષે પોતે મંદિર હિન્દુઓને સોંપી દેવું જોઈએ

જ્ઞાનવાપી શ્રૃંગાર ગૌરી કેસ પર હિન્દુ પક્ષના વકીલ વિષ્ણુ શંકર જૈને કહ્યું છે કે ભારતીય પુરાતત્વ સર્વેક્ષણ (ASI)નો રિપોર્ટ આવ્યા બાદ બધું સ્પષ્ટ થઈ ગયું છે. હવે જો કોઈ સમાધાનની વાત કરશે તો તેને સ્વીકારવામાં આવશે નહીં. આનો એકમાત્ર ઉપાય એ છે કે મુસ્લિમ પક્ષે જગ્યા ખાલી કરવી જોઈએ. એડવોકેટ વિષ્ણુ શંકર જૈને વાતચીતમાં જણાવ્યું હતું કે, અમે અમારું મંદિર કોર્ટ દ્વારા મેળવીશું. જૈને વધુમાં કહ્યું હતું કે હિન્દુ પક્ષ હવે મુસ્લિમ પક્ષ સાથે કોઈપણ પ્રકારની સમજૂતી કરશે નહીં. મુસ્લિમ પક્ષે પોતે મંદિર હિન્દુઓને સોંપી દેવું જોઈએ. ASI રિપોર્ટમાં સ્પષ્ટ છે કે મંદિર તોડીને મસ્જિદ બનાવવામાં આવી હતી. વજુ ખાના ASI સર્વે કરાવવા માંગ કરવામાં આવશે. ટૂંક સમયમાં જ્ઞાનવાપી કેમ્પસ અમારું બનશે.

મંદિર પર મસ્જિદ બનાવવામાં આવી હતી

હિંદુ પક્ષના વકીલ વિષ્ણુ શંકર જૈને કહ્યું કે ભારતીય પુરાતત્વ સર્વેક્ષણ (ASI)ના સર્વે રિપોર્ટમાં સંકેત આપવામાં આવ્યો છે કે જ્ઞાનવાપી મસ્જિદ ત્યાં પહેલાથી હાજર એક જૂના મંદિરના અવશેષો પર બનાવવામાં આવી હતી. કોર્ટે ASIના 839 પાનાના સર્વે રિપોર્ટની નકલો સંબંધિત પક્ષોને ઉપલબ્ધ કરાવી છે. જૈને કહ્યું કે સર્વેક્ષણના અહેવાલથી સ્પષ્ટ થઈ ગયું છે કે મસ્જિદ પહેલાના અસ્તિત્વમાં રહેલા મંદિરને તોડીને તેના અવશેષો પર બનાવવામાં આવી હતી. તેમણે કહ્યું કે સર્વે રિપોર્ટમાં કહેવામાં આવ્યું છે કે જે મંદિર પર મસ્જિદ બનાવવામાં આવી હતી તેના અસ્તિત્વના પૂરતા પુરાવા મળ્યા છે.

વધુ વાંચો : 'ભવ્ય મંદિર તોડીને બનાવાઈ હતી જ્ઞાનવાપી', જાહેર થયો ASI સર્વે રિપોર્ટ, શું શું મળ્યું?

કુલ 11 લોકોએ કોર્ટમાં અરજી કરી હતી

વારાણસીમાં કાશી વિશ્વનાથ મંદિરની બાજુમાં આવેલ જ્ઞાનવાપી મસ્જિદ સંકુલ પર ASI સર્વે રિપોર્ટ મેળવવા માટે હિન્દુ અને મુસ્લિમ બંને પક્ષો સહિત કુલ 11 લોકોએ કોર્ટમાં અરજી કરી હતી. તમને જણાવી દઈએ કે હિંદુ અરજીકર્તાઓએ દાવો કર્યો હતો કે 17મી સદીની મસ્જિદ પહેલાથી અસ્તિત્વમાં રહેલા મંદિરની ટોચ પર બનાવવામાં આવી હતી. કોર્ટે આ અંગે સર્વે કરવાનો આદેશ આપ્યો હતો. ભારતીય પુરાતત્વ સર્વેક્ષણ (ASI) એ તેનો સર્વે રિપોર્ટ સીલબંધ પરબીડિયામાં 18 ડિસેમ્બરે જિલ્લા અદાલતમાં સુપરત કર્યો હતો.