આગાહી / કડકડતી ઠંડી પડશે કે ફરી માવઠું થશે? આવી ગઈ અંબાલાલની મોટી આગાહી

ગુજરાતમાં શિયાળો ધીમે ધીમે પકડ મજબૂત કરી રહ્યો છે ત્યારે જાણીતા હવામાન વિશ્લેષક અંબાલાલ પટેલે ફરી એકવાર રાજ્યમાં માવઠો, ચક્રવાત અને પશ્ચિમી વિક્ષેપની આગાહીને લઈને ચેતવણી આપી છે. આ આગાહી મુજબ આગામી દિવસોમાં વાતાવરણમાં મોટો ફેરફાર જોવા મળી શકે છે, જે ખાસ કરીને ઘઉં, શાકભાજી અને જીરા જેવા પાકો માટે ખતરો સર્જી શકે છે.

હવામાન નિષ્ણાત અંબાલાલ પટેલના જણાવ્યા મુજબ 22 નવેમ્બરથી ગુજરાતમાં વાદળછાયેલું વાતાવરણ જોવા મળશે. આ બદલાવ ધીમે ધીમે વરસાદી માહોલ તરફ આગળ વધશે. ખાસ કરીને દક્ષિણ ગુજરાતમાં કમોસમી વરસાદની અસર જોવા મળશે, જે સુરત, નવસારી, ભરૂચ, અમરેલી સહિતના વિસ્તારોમાં માવઠાની શક્યતા ઊભી કરશે.

બંગાળના ઉપસાગરમાં બનશે ચક્રવાત

અંબાલાલ પટેલના જણાવ્યા અનુસાર 25 થી 28 નવેમ્બર દરમિયાન બંગાળના ઉપસાગરમાં ચક્રવાતી સિસ્ટમ નિર્માણ પામશે. આ સિસ્ટમ મજબૂત થઈને વાવાઝોડામાં પરિવર્તિત થવાની શક્યતા છે. જો ચક્રવાત વધુ શક્તિશાળી બનશે તો તેની અસર ગુજરાતના વાતાવરણ પર સીધી પડી શકે છે અને વરસાદી સ્થિતિ સર્જાઈ શકે છે.

2 થી 8 ડિસેમ્બરે પશ્ચિમી વિક્ષેપ

2થી 8 ડિસેમ્બર દરમિયાન ઉત્તરીય પર્વતીય રાજ્યોમાં મધ્યમ પશ્ચિમી વિક્ષેપ સક્રિય રહેશે. પશ્ચિમી વિક્ષેપના લીધે ઉત્તર ભારતમાં ઠંડીમાં વધારો અને તેના અસરકારક પ્રભાવથી ગુજરાતમાં પણ તાપમાનમાં ઘટાડો થઈ શકે છે. ડિસેમ્બર મધ્યભાગે સમુદ્રમાં બીજી એક સક્રિય સિસ્ટમ ઉદ્ભવવાની શક્યતા છે, જેના લીધે વાતાવરણમાં પલટો આવી શકે છે. આ બદલાવ વાદળછાયું વાતાવરણ વધારી ઠંડીમાં પણ વધારો કરશે.

આ પણ વાંચો : VIDEO : જેણે જન્મ આપ્યો તેને જ ઘરમાં પુરી દીકરો-વહુ જતા રહ્યા, સુરતના વેલજામાં બની હૃદયદ્રાવક ઘટના

ખેડૂતો માટે ચેતવણી

બેવડી ઋતુ અર્થાત્ ઠંડી સાથે વરસાદના લીધે ઘઉં, જીરું અને શાકભાજી જેવા પાકોમાં ફૂગ અને રોગચાળો ફેલાવવાની શક્યતા વધશે. ખેડૂતોને પાકમાં ભેજ નિયંત્રણ અને રક્ષણાત્મક દવાઓનો સમયસર છંટકાવ કરવાની સલાહ આપવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ