દુખદ / ગુજરાતમાં ડિજિટલ એરેસ્ટ પછી આપઘાત કરવાની પ્રથમ ઘટના, ખેડૂતે ઝેરી દવા ગટગટાવી લીધી

Vadodara Digital Arrest : વડોદરા જિલ્લામાં કાયાવરોહણ ગામમાં રહેતા 65 વર્ષીય ખેડૂત અતુલભાઈ પટેલ ડિજિટલ એરેસ્ટનો ભોગ બની ગયા. વિગતો મુજબ ભેજાબાજો દ્વારા સતત ધમકીભર્યા કોલ અને માનસિક દબાણના કારણે તેમણે અંતે જીવ આપવાની દૂઃખદ ઘટના બની છે. રાજ્યમાં ડિજિટલ એરેસ્ટ બાદ આપઘાત થયાનો આ પ્રથમ કેસ હોવાનું માનવામાં આવી રહ્યું છે.

દિલ્લી ATS તરીકે ઓળખ આપી ફસાવ્યા

મળતી માહિતી મુજબ અજાણ્યા શખ્સોએ વીડિયો કોલ દ્વારા પોતાને દિલ્લીની ATS (એન્ટી-ટેરરિસ્ટ સ્ક્વોડ)ના અધિકારી તરીકે ઓળખાવ્યા. તેઓએ અતુલભાઈને તેમના બેંક ખાતામાંથી 40 કરોડ રૂપિયાનું ફ્રોડ થયું છે એવી ખોટી માહિતી આપી ડરાવ્યા. ત્યારબાદ તેમને ડિજિટલ એરેસ્ટમાં રાખ્યા હોવાનો દાવો કર્યો.

દર 5 મિનિટે કોલ કરીને હેરાનગતી

છેતરપિંડી કરનારોએ દર પાંચ મિનિટે કોલ કરીને અતુલભાઈને માનસિક રીતે અત્યંત હેરાન કર્યા. પોલીસ ફરિયાદ, જેલ અને કાયદાકીય કાર્યવાહી જેવી ધમકીઓ આપી તેમને સતત દબાણમાં રાખવામાં આવ્યા. પરિવારજનોને પણ જાણ ન કરવા એમને બળજબરીપૂર્વક કહી દેવામાં આવ્યું.

માનસિક દબાણ ન સહન થતાં...

આ સતત તણાવ અને ભયના માહોલમાં 65 વર્ષીય અતુલભાઈ પટેલનો માનસિક સંતુલન બગડવા લાગ્યું. અંતે કંટાળી અને નિરાશ થઈ તેમણે ઝેરી દવા પી આત્મહત્યા કરી. આ તરફ ગામમાં અને પરિવારજનોમાં આ ઘટનાથી શોકનું મોજું ફેલાયું છે.

સાઈબર ક્રાઈમનો નવો ખતરો : 'ડિજિટલ એરેસ્ટ'

આ ઘટના એ સ્પષ્ટ કરે છે કે ‘ડિજિટલ એરેસ્ટ’ નામની નવી ઓનલાઈન છેતરપીંડી હવે ગ્રામ્ય વિસ્તારો સુધી પહોંચી ગઈ છે. આરોપીઓ સરકાર કે પોલીસ વિભાગનું નામ લઈ લોકોમાં ભય ઉભો કરીને પૈસા પડાવવા અથવા તેમને માનસિક રીતે ગૂંચવવાનો પ્રયાસ કરે છે.

આ પણ વાંચો : કેન્દ્રીય ગૃહમંત્રી અમિત શાહ ગુજરાત આવશે, 2 દિવસ સૌરાષ્ટ્ર અને કચ્છની લેશે મુલાકાત

ચેતવણી અને સાવચેતી

• કોઈ અજાણ્યા નંબર પરથી આવતા ધમકીભર્યા કોલ પર વિશ્વાસ ન કરવો
• કોઈપણ સરકારી વિભાગ વીડિયો કોલ દ્વારા ‘એરેસ્ટ’ કે ‘તપાસ’ નથી કરતા
• તરત નજીકના સાઇબર ક્રાઈમ સેલ અથવા પોલીસને જાણ કરવી
• પરિવારજનો સાથે વાતચીત રાખવી અને કોઈ શંકાસ્પદ બાબત છુપાવવી નહીં

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ