મધ્યપ્રદેશ / જામીન પર છૂટેલા ગોધરાકાંડના દોષિતો ઈન્દોરમાં જે કામ કરી રહ્યાં છે તે જાણીને દંગ રહી જશો

• ગોધરા કાંડમાં સજા મેળવ્યા બાદ 15 માંથી 6 દોષિતો મંદિરની કરે છે સેવા
• આ કામ તેમણે કોર્ટના આદેશ પર જામીન પર છુટ્યા બાદ સામુદાયિક સેવા હેઠળ કરી રહ્યા છે
• ગુજરાત રમખાણોના 6 દોષિત મંદિરની વ્યવસ્થા સાથે જોડાયેલી જવાબદારીઓ સંભાળી રહ્યા છે

એક જિલ્લા અધિકારી સુભાષ ચૌધરીએ બુધવારે પીટીઆઇ-ભાષાને જણાવ્યું, 'કોર્ટના જામીન આદેશની શરતો મુજબ, આ દોષિતોએ શહેરમાં સામુદાયિક સેવા શરૂ કરી દીધી છે. હાલ તેઓ એક સ્થાનીય મંદિરના કિચન અને તેના પરિસરના અન્ય ભાગોમાં સાફ-સફાઇ કરી રહ્યા છે.'

તેઓએ જણાવ્યું કે, ગુજરાત રમખાણોના 6 દોષિત મંદિરની વ્યવસ્થાઓ સાથે જોડાયેલી જવાબદારીઓ પણ સંભાળવાની સાથે આ દેવ સ્થાનની સવાર અને સાંજની નિયમિત આરતીમાં પણ સામેલ થઇ રહ્યા છે. 

ચૌધરીએ જણાવ્યું કે, સુપ્રીમ કોર્ટના આદેશ મુજબ, આ દોષિતોને શહેરના એક પોલીસ સ્ટેશનમાં દર મહીનાની પહેલી તારીખે હાજરી પણ નોંધાવી પડશે. તેઓ ઇંદોરના જિલ્લા અને સત્ર ન્યાયાધીશની મંજૂરી વિના જિલ્લાની સીમાથી બહાર જઇ શકશે નહીં. 

સૂત્રો મુજબ રમખાણોના દોષિતોના સમૂહમાં 41થી 65 વર્ષની ઉંમર વાળા પુરુષો સામેલ છે. તેઓ સુપ્રીમ કોર્ટના આદેશ હેઠળ ગુજરાતની નીચલી કોર્ટમાં જામીનની ઓપચારિકતા પૂર્ણ કર્યા બાદ સોમવારે ઇંદોર પહોંચ્યા હતા. ગુજરાત રમખાણોના મામલામાં 15 દોષિતોને આણંદ જિલ્લાના ઓડ ક્ષેત્રમાં થયેલા રમખાણને લઇને ઉંમરકેદની સજા સંભળાવવામાં આવી હતી. આ રમખાણોમાં 23 લોકોને જીવતા સળગાવી દેવામાં આવ્યા હતા.