કાર્યવાહી / રાજ્યભરમાં પોલીસનું ઓપરેશન ‘ચાઇલ્ડહુડ ફ્રીડમ’, 14 દિવસમાં 84 બાળમજૂરો મુક્ત, 26 લોકો સામે પોલીસ કેસ

Operation Childhood Freedom : ગુજરાત પોલીસે બાળમજૂરી જેવી ગંભીર સામાજિક સમસ્યા સામે કડક વલણ અપનાવી રાજ્યભરમાં ‘ઓપરેશન ચાઇલ્ડહુડ ફ્રીડમ’ શરૂ કર્યું છે. આ અભિયાનનો મુખ્ય ઉદ્દેશ બાળકોને મજૂરીના ચક્રમાંથી બહાર કાઢીને તેમને શિક્ષણ અને સુરક્ષિત ભવિષ્ય સાથે જોડવાનો છે. માત્ર બે સપ્તાહના સમયમાં જ પોલીસે રાજ્યના વિવિધ વિસ્તારોમાંથી 84 બાળમજૂરોને મુક્ત કરાવ્યા છે અને આ બાળકોને ગેરકાયદેસર રીતે કામે રાખનારા લોકો સામે કાયદેસરની કાર્યવાહી પણ હાથ ધરી છે.

વાસ્તવમાં પોલીસના આ અભિયાન દરમિયાન વિવિધ ઔદ્યોગિક વિસ્તારો, કારખાનાઓ, વેપારી સંસ્થાઓ તેમજ અન્ય શંકાસ્પદ સ્થળોએ તપાસ હાથ ધરવામાં આવી હતી. તપાસ દરમિયાન બાળમજૂરીના અનેક કિસ્સાઓ સામે આવ્યા હતા, જેના આધારે કુલ 16 ગુનાઓ નોંધાયા છે અને 26 આરોપીઓ સામે કાર્યવાહી કરવામાં આવી છે.

શું કહ્યું પોલીસવડાએ ?

રાજ્ય પોલીસ વડા જી.એસ. મલિકે જણાવ્યું હતું કે, આ અભિયાન માત્ર દરોડા પાડવા કે ગુનાઓ નોંધવા પૂરતું મર્યાદિત નથી. બાળમજૂરીમાંથી મુક્ત કરાયેલા બાળકોનું પુનર્વસન પણ એટલું જ મહત્વપૂર્ણ છે. આ માટે બાળકોને ફરીથી શિક્ષણ સાથે જોડવા, જરૂરી માર્ગદર્શન આપવા અને સામાન્ય જીવન તરફ પાછા લાવવા માટે વિશેષ વ્યવસ્થાઓ કરવામાં આવી રહી છે.

તાજેતરમાં સુરત જિલ્લાના એક ટેક્સટાઇલ યુનિટમાં પોલીસે કાર્યવાહી કરી હતી, જ્યાં બે બાળકો પાસેથી લાંબા કલાકો સુધી કામ લેવામાં આવતું હોવાનું સામે આવ્યું હતું. ઓછી મજૂરી, લાંબા સમય સુધી કામ અને શોષણ જેવી પરિસ્થિતિમાંથી બાળકોને બહાર કાઢીને તેમના ભવિષ્યને નવી દિશા આપવાનો પ્રયાસ કરવામાં આવ્યો છે. પોલીસના જણાવ્યા અનુસાર બાળમજૂરીના મોટા ભાગના કેસ ટેક્સટાઇલ ઉદ્યોગો, હોટલો, રાઇસ મિલો અને નાના કારખાનાઓમાં જોવા મળી રહ્યા છે. કેટલાક બાળકો અન્ય રાજ્યોમાંથી લાવવામાં આવ્યા હોવાની વિગતો પણ સામે આવી છે, જેના કારણે સંભવિત બાળ તસ્કરીના પાસાંઓની પણ તપાસ કરવામાં આવી રહી છે.

આ પણ વાંચો : શ્વાનનો શિકાર કરવા સિંહણ કુવામાં ખાબકી, પૂર્વ સરપંચની વાડીમાં ફિલ્મી દ્રશ્યો સર્જાયા, જુઓ Video

આ અભિયાન હેઠળ માત્ર બાળમજૂરો રાખનારા માલિકો જ નહીં પરંતુ તેમની પાછળ કાર્યરત કોન્ટ્રાક્ટરો અને સમગ્ર સપ્લાય ચેઇન સામે પણ કાર્યવાહી કરવામાં આવશે. બાળમજૂરી પાછળ રહેલા ગરીબી, સ્થળાંતર અને અજ્ઞાનતા જેવા મૂળ કારણોને દૂર કરવા માટે પોલીસ વિવિધ સરકારી વિભાગો, બાળ કલ્યાણ સંસ્થાઓ અને શૈક્ષણિક સંગઠનો સાથે સંકલન કરી રહી છે. ગુજરાત પોલીસે આગામી સમયમાં હજારો સ્થળોની તપાસ કરીને વધુ બાળકોને બાળમજૂરીમાંથી મુક્ત કરવાનું લક્ષ્ય નક્કી કર્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ