બ્રેકિંગ / પાવાગઢમાં પથ્થર ધરાશાઇ થતાં 2 લોકોના મો*ત, અનેક યાત્રાળુઓ ઈજાગ્રસ્ત

Pavagadh Accident : પંચમહાલ જિલ્લાના વિશ્વવિખ્યાત યાત્રાધામ પાવાગઢ ખાતે ધોધમાર વરસાદ વચ્ચે એક દુર્ઘટના સામે આવી છે. ભારે વરસાદ અને તેજ પવન વચ્ચે પર્વત પરથી મોટા પથ્થરો ધસી પડતાં અનેક દર્શનાર્થીઓ તેની ઝપેટમાં આવી ગયા હતા. આ ઘટનામાં બે લોકોના મોત થયાના અહેવાલ સામે આવ્યા છે, જ્યારે અનેક લોકો ઈજાગ્રસ્ત બન્યા છે.

શું છે સમગ્ર ઘટના ?

માહિતી અનુસાર, દુર્ઘટના પાવાગઢના પાટિયા પુલ નજીક બની હતી. વહેલી સવારે આશરે 4 વાગ્યાના સમયે કેટલાક દર્શનાર્થીઓ પગથિયાં ઉતરી રહ્યા હતા ત્યારે અચાનક પથ્થરો ધરાશાયી થયા હતા. ઘટનામાં સુરતથી આવેલા યાત્રાળુઓ સહિત અનેક લોકો અસરગ્રસ્ત બન્યા હોવાનું જાણવા મળ્યું છે. પથ્થરો પડતાં કુલ 15 જેટલા લોકો ઈજાગ્રસ્ત થયા હોવાનું સામે આવ્યું છે. ઈજાગ્રસ્તોને તાત્કાલિક સારવાર માટે હોસ્પિટલમાં ખસેડવામાં આવ્યા હતા. કેટલાક લોકોને સામાન્ય ઈજાઓ પહોંચી હતી, જ્યારે ગંભીર રીતે ઘાયલ થયેલા લોકોને વિશેષ સારવાર આપવામાં આવી રહી છે.

આ પણ વાંચો : જસદણ નજીક ખાનગી બસ પલ્ટી જતાં 11 મુસાફરો ઈજાગ્રસ્ત

પથ્થર નીચે દબાયેલા લોકો માટે રેસ્ક્યુ ઓપરેશન

ઘટનાની જાણ થતાં સ્થાનિક લોકો, ફાયર બ્રિગેડ અને બચાવ ટીમો તાત્કાલિક ઘટનાસ્થળે પહોંચી હતી. પથ્થરો નીચે ફસાયેલા લોકોને બહાર કાઢવા માટે ભારે જહેમત ઉઠાવવામાં આવી હતી. પથ્થરો તોડીને માર્ગ બનાવવાની કામગીરી હાથ ધરવામાં આવી અને રેસ્ક્યુ ઓપરેશન સતત ચાલુ રાખવામાં આવ્યું હતું.

પોલીસ અને તંત્ર ઘટનાસ્થળે દોડી આવ્યું

દુર્ઘટનાની માહિતી મળતાં જ પોલીસ, જિલ્લા વહીવટી તંત્ર અને અન્ય અધિકારીઓ સ્થળ પર પહોંચી ગયા હતા. સમગ્ર વિસ્તારને સુરક્ષિત બનાવી વધુ કોઈ જાનહાનિ ન થાય તે માટે જરૂરી પગલાં લેવામાં આવ્યા હતા. તંત્ર દ્વારા ઘટનાના કારણો અને પરિસ્થિતિની પણ તપાસ શરૂ કરવામાં આવી છે. બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ