નેશનલ / ''તલવારથી મચ્છર મારી રહ્યાં છો...'', ધડાધડ રેડ કરતા FDAને હાઇકોર્ટની નોટિસ

બોમ્બે હાઈકોર્ટે મંગળવારે કેડિલા ફાર્માસ્યુટિકલ્સ લિમિટેડને મોટી રાહત આપતાં મહારાષ્ટ્ર ફૂડ એન્ડ ડ્રગ એડમિનિસ્ટ્રેશન (FDA) ની કાર્યવાહી પર ગંભીર સવાલો ઉઠાવ્યા છે. દવાની વેચાણ અટકાવવાના આદેશ પર હાઈકોર્ટે ટિપ્પણી કરી હતી કે 'પહેલાં ગોળી ચલાવવી અને પછી સવાલ પૂછવા' એવો જંગલી કાયદો અસલ જિંદગી કે કાયદાના શાસનમાં ચાલી શકે નહીં. કોર્ટની સખત વલણ બાદ મહારાષ્ટ્ર FDA કેડિલા વિરુદ્ધ જારી કરાયેલું 'સ્ટોપ-સેલ' નોટિસ પાછી ખેંચવા સહમત થયું છે. એક્ટિંગ ચીફ જસ્ટિસ આરવી ઘુગે અને જસ્ટિસ ગૌતમ અંખડની બેન્ચે કેડિલા ફાર્માસ્યુટિકલ્સની અરજી પર સુનાવણી કરી હતી. કંપનીએ FDA દ્વારા દવાઓનો જથ્થો જપ્ત કરવા અને તેનું વેચાણ તથા વિતરણ રોકવાના આદેશને પડકાર્યો હતો.

તલવારની શક્તિ છે, પરંતુ...

કમિશનર તુકારામ મુંઢેની આગેવાની હેઠળ મહારાષ્ટ્ર FDA એ કેડિલાની કેટલીક દવાઓ જપ્ત કરીને વેચાણ અટકાવ્યું હતું. કેડિલા વતી સિનિયર એડવોકેટ બીરેન્દ્ર સરાફે આ આદેશને રદ કરવાની માંગ કરી હતી. હાઈકોર્ટે સ્પષ્ટ કર્યું કે તેને FDA ની કાનૂની સત્તાઓ પર કોઈ શંકા નથી, પરંતુ તેનો ઉપયોગ કરવાની પદ્ધતિ ખોટી છે. કાર્યવાહક મુખ્ય ન્યાયાધીશે FDA ના વકીલ નેહા ભિડેને કહ્યું, "અમને તમારી શક્તિઓ પર શંકા નથી, પરંતુ સમસ્યા એ છે કે તમારી પાસે તલવાર ચલાવવાની શક્તિ છે અને તમે તેનો ઉપયોગ મચ્છર મારવા માટે કરી રહ્યા છો.

દર્દીઓ પર પડેલી અસર અંગે કોર્ટની ચિંતા

સુનાવણી દરમિયાન હાઈકોર્ટે જણાવ્યું કે તેની પ્રાથમિક ચિંતા કંપનીનું આર્થિક નુકસાન નથી પરંતુ દર્દીઓ છે. 'સ્ટોપ-સેલ' ઓર્ડરના કારણે 20 થી 32 દિવસ સુધી દર્દીઓને જરૂરી દવાઓ ઉપલબ્ધ થઈ શકી નહોતી, જે ગંભીર બાબત છે.

FDA એ શા માટે લીધા હતા પગલાં?

મહારાષ્ટ્ર FDA એ દાવો કર્યો હતો કે કેડિલાની કેટલીક પ્રોડક્ટ્સની બ્રાન્ડિંગ એકસરખી અથવા મળતી-આવતી હતી, જ્યારે તેમાં વપરાયેલા એક્ટિવ ફાર્માસ્યુટિકલ ઇન્ગ્રીડિએન્ટ્સ (API) અલગ-અલગ હતા. તેનાથી દવાઓ ઓળખવામાં ભ્રમ ઊભો થઈ શકતો હતો અને ખોટી દવા વપરાઈ જવાનો ભય હતો.

આ પણ વાંચોઃ અમદાવાદ સહિત ગુજરાતમાં સોનાના ભાવમાં ફેરફાર! જાણો આજે શું છે 22K-24K ગોલ્ડનો ભાવ ?

FDA ઓર્ડર પાછો ખેંચશે

હાઈકોર્ટની ફટકાર બાદ મહારાષ્ટ્ર FDA આદેશ પાછો ખેંચવા તૈયાર થયું છે. હવે કાયદાકીય પ્રક્રિયા મુજબ કેડિલાને નવેસરથી શો-કોઝ નોટિસ આપવામાં આવશે, લેખિત જવાબ માટે પૂરતો સમય અપાશે અને સુનાવણી બાદ જ આગળનો નિર્ણય લેવાશે. કોર્ટે ભવિષ્યમાં નિયમોનું પાલન કર્યા વિના આદેશ આપવા બદલ ભારે દંડ કરવાની ચેતવણી પણ આપી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ