અંબાલાલ પટેલ આગાહી / તારીખ નોંધી લેજો! ગુજરાતમાં ફરીથી પડશે હળવો વરસાદ, અંબાલાલની આગાહી

રાજ્યમાં ઉનાળાની વચ્ચે હવામાનમાં અચાનક બદલાવ જોવા મળી શકે તેવી આગાહી હવામાન નિષ્ણાત અંબાલાલ પટેલ દ્વારા કરવામાં આવી છે. તેમની આગાહી મુજબ આવનારા દિવસોમાં રાજ્યના અનેક વિસ્તારોમાં વાદળછાયું વાતાવરણ સર્જાશે. સાથે જ કેટલાક વિસ્તારોમાં હળવો વરસાદ પણ પડી શકે છે. આ બદલાતા હવામાનને કારણે ગરમી અને ઉકળાટ વચ્ચે લોકો થોડો રાહતનો અનુભવ કરી શકે છે. જોકે ભેજના વધતા પ્રમાણને કારણે તકલીફ યથાવત રહેવાની શક્યતા છે.

વાદળછાયું વાતાવરણ અને હળવા વરસાદની શક્યતા

અંબાલાલ પટેલના જણાવ્યા અનુસાર વૈશાખ માસ દરમિયાન આવા વાદળોનું છવાઈ જવું એ સામાન્ય ઘટના છે. સામાન્ય રીતે આ પ્રકારનું વાદળછાયું વાતાવરણ સવા મહિના સુધી રહે છે અને ત્યારબાદ ચોમાસું પ્રવેશ કરે છે. હાલ રાજ્યમાં વાદળો ઊંચાઈ પર હોવાથી ભારે વરસાદની શક્યતા ઓછી છે. પરંતુ 5 થી 8 મે દરમિયાન પૂર્વ ગુજરાતના કેટલાક વિસ્તારોમાં હળવો વરસાદ થઈ શકે છે. ખાસ કરીને પંચમહાલ, દાહોદ અને મહિસાગર જિલ્લાઓમાં ક્યાંક છૂટાછવાયા વરસાદની શક્યતા છે. દક્ષિણ ગુજરાતના વિસ્તારોમાં પણ છાંટા અથવા હળવો વરસાદ નોંધાઈ શકે છે. જ્યારે સૌરાષ્ટ્રમાં મુખ્યત્વે વાદળછાયું વાતાવરણ જ રહેશે.

ભેજ વધતા ઉકળાટમાં વધારો

હાલ રાજ્યમાં ભેજનું પ્રમાણ વધતું જતાં ઉકળાટમાં વધારો અનુભવાઈ રહ્યો છે. ખાસ કરીને સૌરાષ્ટ્ર અને દક્ષિણ ગુજરાતના વિસ્તારોમાં લોકો ગરમી સાથે ભેજના કારણે વધુ અસ્વસ્થતા અનુભવી રહ્યા છે. દિવસ દરમિયાન તાપમાન ઊંચું રહેતા અને રાત્રે ભેજ વધતા હવામાન ભારે લાગતું બની રહ્યું છે. આ પરિસ્થિતિમાં લોકો માટે બહાર નીકળવું મુશ્કેલ બની રહ્યું છે અને આરોગ્ય પર પણ તેનો અસરકારક પ્રભાવ પડી શકે છે.

મે મહિનામાં વધતી ગરમીની આગાહી

અંબાલાલ પટેલે વધુમાં જણાવ્યું છે કે 11 થી 20 મે દરમિયાન રાજ્યમાં ગરમીનું પ્રમાણ નોંધપાત્ર રીતે વધશે. મધ્ય ગુજરાત અને ઉત્તર ગુજરાતના વિસ્તારોમાં તાપમાન 43 થી 44 ડિગ્રી સેલ્સિયસ સુધી પહોંચી શકે છે. રાજકોટ, મોરબી અને સુરેન્દ્રનગર જેવા સૌરાષ્ટ્રના વિસ્તારોમાં પણ તાપમાન આ જ સ્તરે પહોંચવાની શક્યતા છે. જ્યારે કચ્છ વિસ્તારમાં તાપમાન 42 ડિગ્રી સુધી જઈ શકે છે. આથી આવનારા દિવસોમાં હીટવેવ જેવી પરિસ્થિતિ સર્જાઈ શકે છે. જેને ધ્યાનમાં રાખીને સાવચેતી રાખવાની જરૂર રહેશે.

આ પણ વાંચો: હવે SG હાઈવે પરના ટ્રાફિકમાંથી મુક્તિ મળશે, થશે પેટ્રોલની બચત, બચશે સમય

પ્રી-મોન્સૂન પ્રવૃત્તિ અને ચોમાસાની આગાહી

હવામાન નિષ્ણાતના જણાવ્યા અનુસાર 23 મે આસપાસ પ્રી-મોન્સૂન એક્ટિવિટીના ભાગરૂપે વરસાદ જોવા મળી શકે છે. 25 મેથી 7 જૂન વચ્ચે આવતું રોહિણી નક્ષત્ર પણ હવામાન માટે મહત્વપૂર્ણ માનવામાં આવે છે. જો રોહિણી નક્ષત્રની શરૂઆતમાં વરસાદ આવે તો પવન સાથે વરસાદ પાછો ખેંચાઈ શકે છે. પરંતુ અંતિમ તબક્કામાં વરસાદ થાય તો તે સારા ચોમાસાના સંકેત ગણાય છે. 25 મે આસપાસ દક્ષિણ ભારતના અંતિમ છેડે ચોમાસું પ્રવેશ કરવાની શક્યતા છે. સાથે જ 15 મે બાદ અરબી સમુદ્ર અને બંગાળના ઉપસાગર સક્રિય બનશે. જેના કારણે વાવાઝોડું સર્જાવાની પણ શક્યતા વ્યક્ત કરવામાં આવી છે. આ તમામ પરિસ્થિતિઓ દર્શાવે છે કે રાજ્યમાં હવામાનમાં આગામી દિવસોમાં ઝડપી ફેરફાર જોવા મળશે.

બીજી બાજુ આજે દાહોદ જિલ્લાના લીમડી, ડુંગરી, ખેડા અને નાનસલાઈ સહિતના વિસ્તારોમાં કમોસમી વરસાદના ઝાપટા પડ્યા. ભારે પવન અને ઠંડી હવામાં વાતાવરણમાં તાજગી ફેલાઈ ગઈ. પરંતુ પાકને નુકસાન થવાની ભીતિ વચ્ચે ખેડૂતો ચિંતામાં મુકાયા છે. માવઠું થવાને કારણે ઉભા પાક પર તેની સીધી અસર પડી શકે છે, જેને કારણે ધરતીપુત્રોની ચિંતા સ્વાભાવિક રીતે વધી રહી છે.

અરવલ્લી જિલ્લામાં પણ વરસાદી છાંટા

અરવલ્લી જિલ્લાના મેઘરજ, મોડાસા, માલપુર સહિતના ગ્રામ્ય વિસ્તારોમાં પવન સાથે વરસાદી છાંટા પડ્યા. શામળાજી વિસ્તારના સુનોખ અને વાશેરા કંપામાં પણ ગાજવીજ સાથે વરસાદ નોંધાયો. ઇસરી અને જીતપુર વિસ્તારમાં વહેલી સવારે જ પવન સાથે વરસાદ વરસતા વાતાવરણમાં ઠંડક પ્રસરી ગઈ. ભર ઉનાળે ચોમાસા જેવો માહોલ સર્જાતા લોકો આશ્ચર્યચકિત થયા છે.

શામળાજીના વાતાવરણમાં પલટો

આ તરફ યાત્રાધામ શામળાજીમાં વહેલી સવારે વરસાદી માહોલ સર્જાતા આકાશમાં ઘેરા વાદળો છવાઈ ગયા અને ગરમીમાંથી રાહત મળી. પરંતુ આ બદલાતા હવામાનને કારણે ખેડૂતોને પાકને નુકસાન થવાની ભીતિ સતાવી રહી છે. કમોસમી વરસાદ ખેતી માટે અનુકૂળ નથી અને પાકની ગુણવત્તા તથા ઉત્પાદન પર અસર કરી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ