ક્રાઈમ / સુરતમાં બે ચોંકાવનારા બનાવ: હોમગાર્ડ દ્વારા દુષ્કર્મ અને પ્રેમીના ત્રાસથી પરિણીતાનો આપઘાત

Surat Crime News: સુરત શહેરમાં એક ચોંકાવનારો બનાવ સામે આવ્યો છે જેમાં હોમગાર્ડ જવાને પરિણીતાની સાથે ગંભીર ગુનો આચર્યો છે. હોમગાર્ડ જવાને પરિણીતાને નશીલું પીણું પીવડાવી દુષ્કર્મ આચર્યું હોવાની વાત સામે આવી છે.

મિસિંગ અરજીમાંથી નંબર મેળવી કર્યો શોષણ

મળતી માહિતી મુજબ વર્ષ 2024માં એક યુવક પોતાની પત્ની ગુમ થયાની ફરિયાદ કરવા આવ્યો હતો ત્યારે હોમગાર્ડ જવાન પ્રકાશ છબલાણીએ મિસિંગ અરજીમાંથી મહિલાનો મોબાઇલ નંબર મેળવી લીધો હતો. ત્યારબાદ આરોપીએ મહિલાનો સંપર્ક કરી તેને ધમકાવવાનું શરૂ કર્યું હતું. આરોપીએ મહિલાને ડરાવીને તેની પાસેથી અંદાજે 15,000 રૂપિયા પડાવ્યા હતા. આટલું જ નહીં, આરોપીએ મહિલાને હોટલમાં લઈ જઈ તેની સાથે દુષ્કર્મ પણ આચર્યું હતું. સમગ્ર ઘટનાએ માનવતા અને સુરક્ષાને લઈને ગંભીર પ્રશ્નો ઊભા કર્યા છે.

ધમકી, શોષણ અને પોલીસ કાર્યવાહી

આરોપી અહીં અટક્યો નહીં પરંતુ તેણે મહિલાનો વીડિયો બનાવી તેને વાયરલ કરવાની ધમકી આપીને સતત બ્લેકમેલ કરતો રહ્યો હતો. આરોપીએ મહિલાથી ઘરેણાં પણ પડાવી લીધાં અને લોન પર નવી બાઈક પણ લેવડાવી હતી. આખરે પીડિત મહિલાએ હિંમત દાખવી રાંદેર પોલીસ મથકમાં ફરિયાદ નોંધાવી હતી. પોલીસે તાત્કાલિક કાર્યવાહી કરતા આરોપી હોમગાર્ડ જવાન પ્રકાશ છબલાણીની ધરપકડ કરી છે અને મામલે વધુ તપાસ શરૂ કરી છે. પોલીસ દ્વારા આ કેસમાં વધુ પુરાવા એકત્રિત કરવામાં આવી રહ્યા છે અને આરોપીને કાયદેસરની સજા મળે તે માટે પગલાં લેવામાં આવી રહ્યા છે.

તો બીજી તરફ શહેરમાં એક હૃદયદ્રાવક બનાવ સામે આવ્યો છે જેમાં યુવતી પ્રેમીના માનસિક ત્રાસથી કંટાળી આત્મહત્યા કરવા મજબૂર બની હતી.

પ્રેમીના દબાણ અને ધમકીઓથી પરેશાન યુવતી

સુરતના અશ્વિનીકુમાર વિસ્તારમાં 25 વર્ષીય પરિણીતાએ ફાંસો ખાઈ આપઘાત કર્યો હોવાનું સામે આવ્યું છે. માહિતી મુજબ યુવતી પોતાના વતનના પ્રેમી રાહુલ પરીહારના સતત માનસિક ત્રાસ અને ધમકીઓથી કંટાળી ગઈ હતી. આરોપી યુવક સતત યુવતીને પ્રેમસંબંધ જાળવવા માટે દબાણ કરતો હતો અને તેને ફોટા ઈન્સ્ટાગ્રામ પર વાયરલ કરવાની ધમકી આપતો હતો. આ કારણે યુવતી પર ભારે માનસિક દબાણ સર્જાયું હતું. પોલીસે તપાસ દરમિયાન આરોપી સાથે થયેલી WhatsApp ચેટ પણ મળી આવી છે. જેમાં આરોપી યુવતીને વારંવાર પરેશાન કરતો હતો.

આ પણ વાંચો: રાજ્યભરમાં ભારે પવન સાથે વરસાદની આગાહી, અનેક જિલ્લામાં વાવાઝોડા જેવી સ્થિતિ

ચેટમાં ઉદ્ધત મેસેજ અને આત્મહત્યાને પ્રેરણા

તપાસમાં જાણવા મળ્યું છે કે આરોપી રાહુલ પરીહાર યુવતીને વીડિયો કોલ કરીને સતત ત્રાસ આપતો હતો. ચેટમાં યુવતીએ મરી જવાની વાત કરતાં આરોપીએ ઉદ્ધત રીતે “મરવાનું તો તારે છે જ, આજે મરે કે કાલે” જેવા મેસેજ મોકલ્યા હતા અને પૈસા આપી છૂટી જવાની પણ વાત કરી હતી. આ પ્રકારના મેસેજ અને ધમકીઓથી કંટાળી યુવતીએ આ ગંભીર પગલું ભર્યું હોવાનું માનવામાં આવી રહ્યું છે. ઘટનાને પગલે અશ્વિનીકુમાર પોલીસ સ્ટેશનમાં આરોપી સામે આત્મહત્યા માટે પ્રેરણા આપવાનો ગુનો નોંધવામાં આવ્યો છે. પોલીસે આરોપીને ઝડપી પાડવા અને વધુ તપાસ હાથ ધરવા કામગીરી શરૂ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ