કચ્છ / કચ્છના ધાણેટીમાં 4 કરોડની કિંમતનો વિદેશી દારુ ઝડપાયો, લિસ્ટેડ બુટલેગરે 2500 પેટી મગાવી હતી

Kutch SMC Raid: કચ્છ સ્ટેટના ભૂજ તાલુકાના ધાણેટી નજીક વિદેશી દારૂના કટિંગ દરમિયાન સ્ટેટ મોનિટરિંગ સેલ (SMC)ની ટીમે આકસ્મિક દરોડો પાડી મોટી કાર્યવાહી હાથ ધરી હતી. મળતી માહિતી અનુસાર ગાંધીનગરથી આવેલી ટીમે ચોક્કસ બાતમીના આધારે સ્થળને ઘેરી લીધું હતું. પોલીસની ગાડીઓ નજરે પડતાં જ બુટલેગરોમાં નાસભાગ મચી ગઈ હતી. પરંતુ SMCએ કોર્ડન કરીને દારૂનો જંગી જથ્થો તેમજ સંકળાયેલા વાહનો કબ્જે કર્યા હતા.

2500થી વધુ વિદેશી શરાબની પેટીઓ જપ્ત

માહિતી અનુસાર વિદેશી દારૂનો જથ્થો ગેરકાયદેસર રીતે સંગ્રહ કરી વિતરણ માટે તૈયાર કરવામાં આવી રહ્યો હતો ત્યારે SMCની ટીમે ચોક્કસ બાતમીના આધારે દરોડો પાડ્યો હતો. દરોડા દરમિયાન ભારે માત્રામાં દારૂ જપ્ત કરવામાં આવ્યો છે અને સંડોવાયેલા લોકો સામે કાયદેસરની કાર્યવાહી હાથ ધરાઈ છે. સમગ્ર ઓપરેશન ગુપ્ત રીતે યોજાયું હોવાનું સૂત્રો જણાવી રહ્યા છે.પ્રાથમિક અંદાજ મુજબ 2500થી વધુ વિદેશી શરાબની પેટીઓ જપ્ત કરવામાં આવી હોવાનું જાણવા મળી રહ્યું છે. જેની આશરે કિંમત 4 કરોડથી વધુ હોવાનો અંદાજો લગવૈ રહ્યો છે. આ કાર્યવાહીથી સ્થાનિક સ્તરે હલચલ મચી ગઈ છે.

SMC દ્વારા વધુ તપાસ જારી

ઉલ્લેખનીય છે કે ગુજરાત રાજ્યના પોલીસ વડા રાવની કચ્છ મુલાકાત પહેલા જ આ કાર્યવાહી થવાને કારણે પોલીસ બેડામાં ફફડાટ જોવા મળી રહ્યો છે. રાજ્યમાં દારૂબંધી હોવા છતાં ગેરકાયદેસર પ્રવૃત્તિઓ પર સખત નજર રાખવા માટે ઉચ્ચ સ્તરે સૂચનાઓ આપવામાં આવી હોવાની ચર્ચા છે. હાલ SMC દ્વારા વધુ તપાસ ચાલી રહી છે અને જથ્થાની ચોક્કસ ગણતરી તેમજ અન્ય સંડોવાયેલા તત્વોની શોધખોળ હાથ ધરાઈ છે.

આ પણ વાંચો: VIDEO : અમદાવાદના યુવાઓએ લગ્ન નોંધણી નિયમોમાં ફેરફારોને આવકાર્યા, જાણો શું બોલ્યાં

આ દરોડામાં હજારો વિદેશી દારૂની બોટલો, ટ્રક અને અન્ય વાહનો સહિત કરોડો રૂપિયાનો મુદ્દામાલ જપ્ત થયો હોવાનું પ્રાથમિક અંદાજ છે. હાલમાં SMC દ્વારા જપ્ત કરાયેલા જથ્થાની ચોક્કસ ગણતરી અને વાહનોની માલિકી અંગેની તપાસ ચાલી રહી છે. સ્થાનિક પોલીસને પૂર્વ જાણ વિના થયેલી આ સીધી કાર્યવાહીએ જિલ્લા પોલીસની કામગીરી પર પણ પ્રશ્નચિહ્ન ઊભું કર્યું છે. કેસમાં સંડોવાયેલા મોટા માથાઓ સુધી પહોંચવા તપાસ એજન્સીઓએ ચક્રો ગતિમાન કર્યા છે અને વધુ ધરપકડની શક્યતા વ્યક્ત કરવામાં આવી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ