જામનગર / લીવ ઇનમાં રહેતી પ્રેમિકાના પિતા, ફુવા, ફઈ પ્રેમી પર તૂટી પડ્યા, છેલ્લે યમરાજ ફાવ્યા, કરુંણ અંજામ

Jamanagar : જામનગરમાં લીવ ઇન રિલેશનશીપમાં રહેતા યુવકના અપહરણ-હત્યાનો કેસ સામે આવ્યો છે. વિગતો મુજબ જામનગરમાં તેની પ્રેમિકા સાથે લીવ ઇન રીલેશનશીપમાં રહેતા યુવકનું પ્રેમિકાના પિતા, ફુવા, ફઈ અને ફઈના પુત્રએ સાથે સાથે મળી કાવતરું રચી અપહરણ કર્યું હતું. આ તરફ આશિષ અસ્વારનું અપહરણ કરી ઢોરમાર મારી ફેંકી દીધો હતો. જોકે જી જી હોસ્પિટલમાં 12 દિવસની સારવારના અંતે યુવકનું મોત નિપજતા બનાવ હત્યામાં પલટાયો હતો. પોલીસે પ્રેમિકાના પિતા, ફુવા, ફઈ અને ફઈના પુત્રની અટકાયત કરી ધોરણસરની કાર્યવાહી હાથ ધરી છે.

શું છે સમગ્ર ઘટના ?

જામનગર શહેરમાં રહેતા આશિષ અસ્વાર (ઉ.વ.21) નામના યુવકનું ગત્ તા.7 મેના રોજ અજાણ્યા શખ્સો અપહરણ કરી કનસુમરા નજીક આવેલી અવાવરૂ જગ્યાએ લઇ ગયા હતા. ત્યાં ઢોરમાર મારી ફેંકી દીધો હતો. ત્યારબાદ યુવકને 108 એમ્બ્યુલન્સ દ્વારા જી જી હોસ્પિટલમાં સારવાર માટે ખસેડવામાં આવ્યો હતો. જ્યાં બનાવની જાણના આધારે પંચકોષી ‘બી’ પોલીસ સ્ટેશનનો સ્ટાફ હોસ્પિટલે દોડી ગયો હતો. જ્યાં યુવક બેશુઘ્ધ હાલતમાં રહ્યો હતો. પરંતુ યુવકની 12 દિવસની સારવાર બાદમોત નિપજતાં બનાવ હત્યામાં પલટાયો હતો.

પ્રેમપ્રકરણમાં યુવકની હત્યા નિપજતા પરિવારજનો દ્વારા મૃતદેહ સ્વીકારવાનો ઇન્કાર કર્યો હતો. બનાવના પગલે બ્રહ્મસમાજના આગેવાનો હોસ્પિટલે દોડી ગયા હતા અને મૃતક યુવક ક્રિષ્નાબેન નામની યુવતી સાથે લીવ ઇન રીલેશનશીપમાં રહેતો હોવાનું જાણવા મળ્યું હતું.

વધુ વાંચો : ગુજરાતમાં કોરોના પગપેસારો વધ્યો, અમદાવાદમાં 20 વર્ષીય યુવતી કોરોના પોઝિટિવ, હવે કુલ આટલા કેસ

અંતે આરોપીઓ ઝડપાયા

યુવકનું અપહરણ થતાં ક્રિષ્નાબેન તેના ફોઇને ફોન પર વાત કરતા હતા ત્યારે સામેથી એવો જવાબ મળ્યો હતો કે, તારા પિતા અને તારા ફુઆ સહિતના આશિષને ઉઠાવી ગયા છે. તારે જે કરવું હોય તે કરી લેજે. જે બાદ સિટી ‘સી’ ડિવિઝન પોલીસ મથકે દોડી ગયા હતા અને ત્યાં આશિષનું અપહરણ કરી ઢોરમાર મારવા માટે તેના પિતા વિક્રમ કેશવાલા, ફુઆ રામદેવ બોખીરયા, ફૈબા નિરૂબેન બોખીરયા અને વિવેક બોખીરયા સામે ફરિયાદ નોંધાવી હતી. આ હુમલાની ઘટનામાં યુવકનું મોત નિપજતા પોલીસે હત્યાની કલમ ઉમેરી આગળની કાર્યવાહી હાથ ધરી હતી. પોલીસે ફૉઈ નિરૂબેન બોખીરયા નામની મહિલાની અટકાયત બાદ પ્રેમિકાના પિતા વિક્રમ કેશવાલા, ફુઆ રામદેવ બોખીરયા અને વિવેક બોખીરયાની અટકાયત કરી રિમાન્ડ સહિતની કાર્યવાહી હાથ ધરી હતી.

બધા જ સમાચાર અને અપડેટ્સ મેળવવા માટે પ્લે સ્ટોર/ એપ સ્ટોર પર જઈને અથવા આ લાઈન પર ક્લિક કરીને ડાઉનલોડ કરો અમારી લેટેસ્ટ એપ