ભરતી / યુવાનો આનંદો! ગુજરાતમાં 2 લાખથી વધુ ઉમેદવારોની થશે ભરતી, વિધાનસભામાં સરકારનું એલાન

Gujarat Recruitment Calendar: રાજ્ય સરકારે વિધાનસભામાં મહત્વપૂર્ણ જાહેરાત કરતાં જણાવ્યું છે કે વર્ષ 2024થી 2033 દરમિયાન 10 વર્ષીય ભરતી કેલેન્ડર અમલમાં મૂકવામાં આવશે. જે અંતર્ગત 2 લાખથી વધુ ઉમેદવારોની ભરતી કરવામાં આવશે. પ્રશ્નોત્તરી કાળ દરમિયાન મંત્રી ઈશ્વરસિંહ પટેલે આ માહિતી આપી હતી. તેમણે જણાવ્યું કે રાજ્યમાં ખાલી પડેલી જગ્યાઓને તબક્કાવાર ભરવા માટે સુગઠિત આયોજન તૈયાર કરવામાં આવ્યું છે. જેથી યુવાનોને સરકારી નોકરીમાં વધુ તકો મળી શકે.

છેલ્લા બે વર્ષમાં 30 હજારથી વધુ ભરતી

મંત્રી ઈશ્વરસિંહ પટેલે જણાવ્યું કે છેલ્લા બે વર્ષ દરમિયાન રાજ્ય સરકારે 30 હજારથી વધુ જગ્યાઓ પર ભરતી પૂર્ણ કરી છે. વિવિધ વિભાગોમાં ખાલી જગ્યાઓને પ્રાથમિકતા આપીને નિયુક્તિ પ્રક્રિયા હાથ ધરવામાં આવી હતી. સરકારે પારદર્શક અને ઝડપી ભરતી પ્રક્રિયા અપનાવી હોવાનો દાવો કર્યો છે. આગામી વર્ષોમાં પણ આ જ ગતિએ ભરતી ચાલુ રહેશે અને વિભાગવાર જરૂરિયાત મુજબ સમયપત્રક જાહેર કરવામાં આવશે.

વર્ગ 1 અને 2 ની ભરતી GPSC દ્વારા

સરકારે સ્પષ્ટ કર્યું છે કે સામાન્ય વહીવટ વિભાગ, ગૃહ વિભાગ, નાણાં વિભાગ સહિત અનેક મહત્વપૂર્ણ વિભાગોમાં વર્ગ 1 અને વર્ગ 2 કેડરની ભરતી ગુજરાત જાહેર સેવા આયોગ (GPSC) દ્વારા કરવામાં આવશે. યોગ્ય અને લાયક ઉમેદવારોની પસંદગી માટે GPSC મારફતે નિયમિત પરીક્ષાઓ અને ઇન્ટરવ્યૂ લેવામાં આવશે. આ પ્રક્રિયા દ્વારા પ્રશાસનમાં કુશળ અધિકારીઓની નિમણૂક થશે અને શાસન વ્યવસ્થાને મજબૂત બનાવવામાં મદદ મળશે.

આ પણ વાંચો: અમદાવાદના વેજલપુરમાં રહેણાંકના ઘરમાં આગ લાગતાં પિતા-પુત્ર જીવતા બળ્યાં, મધરાતે સુતા હતા ત્યારે ફાટી નીકળી આગ

દિવ્યાંગ ઉમેદવારો માટે ખાસ ઝુંબેશ

સરકારે દિવ્યાંગ ઉમેદવારોની ખાલી જગ્યાઓ ભરવા માટે ખાસ ઝુંબેશ શરૂ કરવાની પણ જાહેરાત કરી છે. મંત્રી ઈશ્વરસિંહ પટેલે જણાવ્યું કે દિવ્યાંગો માટે અનામત જગ્યાઓ ખાલી ન રહે તે માટે વિશેષ અભિયાન હાથ ધરાશે. રાજ્ય સરકારનો હેતુ દરેક વર્ગને સમાન તક આપવાનો છે. 2024થી 2033 સુધીના ભરતી કેલેન્ડરથી રાજ્યના હજારો યુવાનોને રોજગારની નવી આશા મળશે અને સરકારી તંત્રમાં જરૂરી માનવબળ ઉપલબ્ધ થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ