દુર્ઘટના / દાદરા નગર હવેલીમાં ભીષણ આગ! પ્લાસ્ટિક કંપની આગની જ્વાળાઓમાં લપેટાઈ

Dadra Nagar Haveli Fire: દાદરા નગર હવેલીના દેમણી રોડ પર આવેલી જય અંબે પ્લાસ્ટિક કંપનીમાં મંગળવારની સાંજે અચાનક આગ લાગી હતી. ગુજરાતમાં અવારનવાર આગની ઘટનાઓ બનતી હોવા છતાં આ ઘટના ફરી એકવાર ચિંતા વધારનાર બની છે. પ્લાસ્ટિકના દાણા (Plastic Granules) બનાવતી આ કંપનીના એક ભાગમાં આગની શરૂઆત થઈ હતી. કંપનીમાં પ્લાસ્ટિકનો કાચો તેમજ તૈયાર માલ મોટી માત્રામાં સંગ્રહિત હોવાથી આગે પળવારમાં જ વિકરાળ સ્વરૂપ ધારણ કરી લીધું. આગ લાગતી સાથે જ કંપનીમાં હાજર કામદારો સતર્ક બની તરત જ બહાર નીકળી ગયા એટલે કોઈ જાનહાની થઈ નથી.

આગ કાબૂમાં લેવા અનેક ફાયર ટીમો દોડી

આ ઘટનાની જાણ થતાં જ સેલવાસ અને ખાનવેલ ફાયર વિભાગની ટીમો તાત્કાલિક સ્થળે પહોંચી ગઈ હતી. પરંતુ આગની ભીષણતા જોતા રિલાયન્સ, આલોક અને વાપી વિસ્તારોમાંથી પણ વધારાની ફાયર ફાઇટર ટીમોને બોલાવવામાં આવી હતી. લાંબા સમય સુધી ચાલેલા પ્રયાસો પછી પણ કંપનીનો મોટો ભાગ આગમાં બળી ગયો હતો. ખાસ કરીને પ્લાસ્ટિકના દાણા માટે ઉપયોગમાં લેવાતી મોલ્ડિંગ મશીનો આગમાં સંપૂર્ણપણે ખાક થઈ ગઈ હતી. ફાયર બ્રિગેડની ત્રણથી વધુ ગાડીઓ સતત પાણીનો મારો ચલાવી રહી હતી, છતાં આગ પર સંપૂર્ણ કાબુ મેળવવામાં સમય લાગ્યો.

આ પણ વાંચો: સુરતમાં મહા ટ્રાફિક જામ, હજારો વાહનચાલકો લાંબા ટ્રાફિક જામમાં ફસાતાં પરેશાન, જુઓ આકાશી દ્રશ્યો

કરોડોનું નુકસાન, પણ જાનહાની નહીં

આગના કારણે કંપનીના વિશાળ વિસ્તારમાં વિનાશ ફેલાયો છે અને પ્રાથમિક અંદાજ મુજબ કરોડો રૂપિયાનું નુકસાન થયું હોવાનું માનવામાં આવે છે. જોકે સૌથી મોટી રાહત એ છે કે કોઈ કામદારને ઈજા થઈ નથી. આગ લાગવાનું ચોક્કસ કારણ હજુ જાણવા મળ્યું નથી અને ફાયર વિભાગ દ્વારા તેની તપાસ ચાલુ રાખવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ