ગુજરાત / અદાણી ગ્રુપનો ₹10 લાખ કરોડનો મેગા પ્લાન, ગુજરાત બનશે ઔદ્યોગિક હબ

Gujarat Industrial Growth: અદાણી ગ્રુપે આગામી પાંચ વર્ષમાં દર વર્ષે અંદાજે ₹2 લાખ કરોડનું રોકાણ કરવાની જાહેરાત કરી છે, જે કુલ ₹10 લાખ કરોડ સુધી પહોંચે છે. આ રોકાણ ભારતને વૈશ્વિક વેપાર નકશા પર મજબૂત સ્થાન આપવા માટે મહત્વપૂર્ણ ગણાઈ રહ્યું છે. એવિએશન, પોર્ટ, લોજિસ્ટિક્સ, સિમેન્ટ અને ડિજિટલ ઈન્ફ્રાસ્ટ્રક્ચર જેવા વિવિધ ક્ષેત્રોમાં વિકાસનો બ્લૂપ્રિન્ટ તૈયાર કરવામાં આવ્યો છે. 2030 સુધી એરપોર્ટ ક્ષમતા 20 કરોડ મુસાફરો સુધી વધારવાનો અને કાર્ગો હેન્ડલિંગ 1,200 MMT સુધી પહોંચાડવાનો લક્ષ્ય રાખવામાં આવ્યો છે.

ગુજરાતમાં ઔદ્યોગિક ક્રાંતિ, ખાવડામાં વિશ્વનો મોટો એનર્જી પાર્ક

આ રોકાણનો મોટો હિસ્સો ગુજરાતમાં આવશે, ખાસ કરીને કચ્છના ખાવડામાં વિશ્વનો સૌથી મોટો રિન્યુએબલ એનર્જી પાર્ક વિકસાવવામાં આવશે. આ પ્રોજેક્ટ ગુજરાતને ગ્રીન હાઈડ્રોજન અને સોલાર મેન્યુફેક્ચરિંગનું વૈશ્વિક કેન્દ્ર બનાવશે. આ સાથે રાજ્યમાં ઈન્ફ્રાસ્ટ્રક્ચરનો વિકાસ થશે અને અંદાજે 1 લાખ જેટલી રોજગારીની તકો ઉભી થશે.

ઉર્જા સુરક્ષા અને MSME માટે નવી તક

ભારત હાલમાં ક્રૂડ ઓઈલ અને કુદરતી ગેસ માટે ભારે આયાત પર નિર્ભર છે. આ સ્થિતિમાં સુધારો લાવવા માટે અદાણી ગ્રુપ 2030 સુધીમાં 50 GW રિન્યુએબલ એનર્જી ક્ષમતા ઉભી કરવાની યોજના ધરાવે છે. સાથે જ ₹1.5 લાખ કરોડના ખર્ચે હાઈ-વોલ્ટેજ ટ્રાન્સમિશન નેટવર્ક બનાવવામાં આવશે. આ પ્રોજેક્ટ્સ MSME સેક્ટર માટે પણ નવી તકો લાવશે, જેમ કે મેન્ટેનન્સ, સપ્લાય અને લોજિસ્ટિક્સમાં મોટા પાયે કામ મળશે.

આ પણ વાંચો: ગુજરાતમાં ટ્રાફિકના નિયમોનું ઉલ્લંઘન કરનારા વાહનચાલકોની સંખ્યામાં ચિંતાજનક વધારો

વૈશ્વિક વેપાર અને ‘વિકસિત ભારત’ તરફ આગળ

અદાણી ગ્રુપનો આ પ્લાન માત્ર ઔદ્યોગિક વિકાસ પૂરતો સીમિત નથી પરંતુ તે ભારતને વૈશ્વિક સ્તરે મજબૂત બનાવવા માટેનો પ્રયાસ છે. ઈઝરાયેલ અને યુરોપ સાથેના જોડાણ દ્વારા ‘ભારત-મધ્ય પૂર્વ-યુરોપ ઈકોનોમિક કોરિડોર (IMEC)’માં પણ મહત્વની ભૂમિકા ભજવાઈ રહી છે. 2047 સુધી ‘વિકસિત ભારત’ બનવાના લક્ષ્યને પ્રાપ્ત કરવા માટે આ પ્રકારના રોકાણો દેશની આર્થિક વૃદ્ધિ અને જીવનધોરણમાં સુધારો લાવવા માટે પાયાનો પથ્થર સાબિત થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ