નિમણૂંક / પ્રદેશ પ્રમુખ બન્યા બાદ સી.આર. પાટીલે કહ્યું આવું ભાજપમાં જ શક્ય, CM રૂપાણીની પણ આવી પ્રતિક્રિયા

• ભાજપમાં કાર્યકર્તાઓને મહત્વ અપાય છેઃ સી.આર પાટીલ
• પ્રમુખ પદ માટે મારી કોઈ અપેક્ષા ન હતીઃ સી.આર પાટીલ
• અમે સીઆર પાટીલનું સ્વાગત કરીએ છીએઃ સીએમ રૂપાણી

રાજ્યમાં ભાજપના નવા પ્રદેશ પ્રમુખને લઇને છેલ્લા કેટલાક સમયગાળાથી અનેક નામોની ચર્ચાઓ ચાલી રહી હતી. ત્યારે હવે ભાજપ હાઇકમાન્ડે નવસારીના સાંસદ અને ભાજપના પીઢનેતા સી.આર.પાટીલને ગુજરાત ભાજપના નવા પ્રદેશ અધ્યક્ષ બનાવવામાં આવ્યા છે. ભારતીય જનતા પાર્ટીના રાષ્ટ્રીય અધ્યક્ષ જેપી નડ્ડા દ્વારા આ જાહેરાત કરવામાં આવી છે. હાલ ભાજપના કાર્યકર્તાઓ ઉત્સાહ જોવા મળી રહ્યો છે. ત્યારે ગુજરાત ભાજપના પ્રમુખ પદે નિમણૂંક થયા બાદ સી.આર. પાટીલે પ્રથમ પ્રતિક્રિયા આપી હતી. 

જેમાં તેમણે કહ્યું કે, ભાજપમાં કાર્યકર્તાઓને મહત્વ અપાય છે, આવું ભાજપમાં જ શક્ય છે. પ્રમુખ પદ માટે મારી કોઈ અપેક્ષા ન હતી. પાર્ટી મારામાં વિશ્વાસ રાખે છે.લોકોની સેવા કરતા રહીશું. વધુમાં તેમણે કહ્યું કે, મારો જન્મ ગુજરાતમાં થયો છે. કારણ કે મારા જન્મ વખતે મહારાષ્ટ્ર અને ગુજરાત એક હતા.

આગામી પેટાચૂંટણી પર તેમણે કહ્યું કે, 8 બેઠકો પર પેટાચૂંટણી છે, આ તમામ પર ભાજપ જીતશે. હાલ ચૂંટણીને લઇને કાર્યકર્તાઓને જવાબદારી આપવાનું શરૂ થયું છે. અત્યારે પાર્ટી ખુબ જ મજબૂત છે. સંગઠનની શક્તિ સાથે આગળ વધીશું.

PM મોદી, અમિત શાહ અને જે.પી નડ્ડાનો હું આભાર માનું છું. આગામી સમયમાં પાર્ટીને વધુ મજબૂત કરીશું અને પેટા ચૂંટણીમાં તમામ 8 સીટો ભાજપ જીતશે : ગુજરાત ભાજપના નવા પ્રદેશ પ્રમુખ C R Patil@CRPaatil @BJP4Gujarat@BJP4India@CMOGuj @vijayrupanibjp @JPNadda @narendramodi pic.twitter.com/R8AZc8E5wn

— VTV Gujarati News and Beyond (@VtvGujarati) July 20, 2020

નકલી ઇન્જેક્શન અંગે તેમણે કહ્યું કે, 4-5 ઇન્જેક્શન બનાવનાર વ્યક્તિને પોલીસે ઝડપી લીધો છે. હાલ આ તમામ જેલના સળિયા પાછળ છે. આવા કોઇપણ લોકોને બક્ષવામાં નહી આવે. જરૂરિયાતના કારણે લોકો લાલચમાં આવી જતા હોય છે. ઓથોરાઇઝ જગ્યાએથી જ ઇન્જેક્શન લેવા જોઇએ. કોરોનાને વધુ કાબૂમાં લેવા પ્રયાસ કરીશું.

નવા પ્રદેશ પ્રમુખ પદે સી.આર પાટીલની વરણી પર CMનું નિવેદન

મુખ્યમંત્રી વિજય રૂપાણીએ સી.આર પાટીનેલ અભિનંદન પાઠવ્યા હતા. સીએમએ કહ્યું કે, ગુજરાતમાં ભાજપ ખુબ જ વિકાસ સાધશે. સંગઠનનો વ્યાપ પણ વધશે. ભાજપ સારી રીતે વિજય પ્રાપ્ત કરશે. અમે સીઆર પાટીલનું સ્વાગત કરીએ છીએ. કેન્દ્રના નિર્ણયને આવકારીએ છીએ. સી.આર પાટીલ પાયાના કાર્યકર્તા છે, નવા પ્રદેશ પ્રમુખને અમે વધાવીએ છીએ.

મનસુખ વસાવાએ અભિનંદન પાઠવ્યા

ભાજપના નેતા મનસુખ વસાવાએ કહ્યું કે, નવસારીના સાંસદ સીઆર પાટીલ ખુબ જ અનુભવી છે. તેમણે સંગઠનનું ખુબ કામ પણ કર્યું છે. અન્ય રાજ્યોની ચૂંટણીમાં જઇને પોતાની ખુબ મહત્વની ભૂમિકા ભજવી છે ત્યારે આવા ખુબ અનુભવી વ્યક્તિને પ્રમુખ પદ મળવાથી ભાજપ છેક છેડાવા સુધી જશે. જીતુ વાઘાણીએ પણ ખુબ સારી કામગીરી કરી છે. નવા પ્રદેશ અધ્યક્ષ બનાવ બદલ ખુબ ખુબ અભિનંદન પાઠવું છું. વર્ષો બાદ આ પાર્ટીનું સ્થાન પણ દક્ષિણ ગુજરાતને મળ્યું છે.