મેઘમહેર / કચ્છમાં બારે મેઘ ખાંગાઃ માંડવીના દરિયામાં જોવા મળ્યો કરંટ, સરહદી ભીટારા ગામે નદીઓ બે કાંઠે

• કચ્છ જિલ્લામાં બારે મેઘ ખાંગા
• અબડાસામાં મુશળધાર વરસાદ
• માંડવીના દરિયામાં જોવા મળ્યો કરંટ

સરહદી ભીટારા ગામે નદી બે કાંઠે વહેતી થઇ

કચ્છ જિલ્લામાં બારે મેઘ ખાંગા થયા છે. ભારે વરસાદના કારણે સરહદી ભીટારા ગામે નદી બે કાંઠે વહેતી થઇ છે. નદીમાં પૂર જેવી સ્થિતિ સર્જાતા નદીના પાણી કોઝ-વે પર ફરી વળ્યા છે. કોઝ-વે પર પાણી આવતા વાહનવ્યવહાર ખોરવાયો છે.

અબડાસામાં મુશળધાર વરસાદ

કચ્છના અબડાસામાં પણ મુશળધાર વરસાદ વરસ્યો છે. મુશળધાર વરસાદના કારણે અબડાસાની નદીઓ બે કાંઠે વહી રહી છે. મોથાળા, સાંધવ, કોઠારાની નદીઓ બે કાંઠે થઇ છે. બેરાચીયા, ભાચૂંડાની નદીઓ પણ બે કાંઠે વહેતી થઇ છે. ભારે વરસાદથી લોકો મુશ્કેલીમાં મુકાયા છે. 

કચ્છના મુંદ્રામાં ધોધમાર વરસાદ

કચ્છના મુંદ્રામાં મેઘરાજાએ ધમાકેદાર એન્ટ્રી કરી છે. વહેલી સવારથી અત્યાર સુધીમાં 4 ઈંચ વરસાદ પડ્યો છે. ભારે વરસાદથી નદી-ડેમમાં પાણીની આવક વધી છે. બરાયા ગામની નદીના પાણી કોઝ-વે પર ફરી વળ્યાં છે.

મુન્દ્રા-માંડવી તાલુકામાં વરસાદ

કચ્છના મુન્દ્રા-માંડવી તાલુકા પર મેઘરાજા મહેરબાન થયા છે. અહીં  કચ્છના બોચા,કારાઘોઘા,વાંકીપત્રી વિસ્તારમાં સારો વરસાદ પડ્યો છે. બેરાજા,કોડાય સહિતના વિસ્તારોમાં ધોધમાર વરસાદ વરસ્યો.  ભારે વરસાદના પગલે નદી-નાળાઅને ડેમમાં નવા નીરની આવક વધી છે.

બાબીયા ગામે ખેતરોમાં ભરાયા પાણી

કચ્છ જિલ્લામાં વરસાદી માહોલ જામ્યો છે. કચ્છમાં અનેક જગ્યાએ ભારે વરસાદ વરસ્યો છે. ભારે વરસાદના કારણે ઠેર ઠેર પાણી ભરાયા છે. કચ્છના બાબીયા ગામે ખેતરોમાં પાણી ભરાઇ ગયા છે. ખેતરોમાં પાણી ભરાતા ખેડૂતોને નુકસાન થયું છે. જ્યારે બીજી તરફ રસ્તાઓ પણ પાણી પાણી થઇ ગયા છે.

માંડવી સહિત આસપાસના ગ્રામ્ય વિસ્તારમાં વરસાદ

કચ્છના માંડવી સહિત આસપાસના ગ્રામ્ય વિસ્તારમાં ધોધમાર વરસાદ વરસ્યો છે.  ભારે વરસાદના કારણે માંડવી બીચ બંધ કરવામાં આવ્યો છે. માંડવી બીચ પર જવા પર પ્રતિબંધ મુકવામાં આવ્યો છે. ભારે વરસાદ અને પવનને લઇ દરિયામાં પણ કરંટ જોવા મળી રહ્યો છે. દરિયામાં કરંટ જોવા મળતા માંડવી બીચ બંધ કરવામાં આવ્યો છે.

માંડવીમાં મેઘમહેર યથાવત

કચ્છ જિલ્લામાં વરસાદી માહોલ જામ્યો છે. મુશળધાર વરસાદથી અનેક જગ્યાએ પાણી ભરાયા છે. માંડવીમાં પણ મેઘમહેર થઇ છે. ભારે વરસાદથી શહેરમાં જળબંબાકારની સ્થિતિ સર્જાઇ છે. માંડવીના મુખ્ય બજારોમાં પાણી ભરાયા છે. બજારોમાં પાણી વહેતા થતા નદી જેવા દ્રશ્યો સર્જાયા છે. બજારમાં પાણી ભરાવાના કારણે લોકોને ભારે હાલાકી પડી રહી છે.