ગુજરાત / ઓર્ગન ડોનેશનમાં ગુજરાતની 3 સરકારી હોસ્પિટલનો ડંકો! કેબિનેટમાં રાષ્ટ્રીય એવોર્ડ્સ રજૂ કરતાં અભિનંદનની વર્ષા

ગુજરાત માટે ગૌરવની વાત એ છે કે ઓર્ગન ડોનેશન અને અંગ પ્રત્યારોપણ ક્ષેત્રે રાજ્યની ત્રણ સરકારી હોસ્પિટલોએ રાષ્ટ્રીય સ્તરે પ્રતિષ્ઠિત એવોર્ડ્સ પ્રાપ્ત કર્યા છે. આ એવોર્ડ્સ રાજ્ય સરકારની કેબિનેટ બેઠકમાં રજૂ કરવામાં આવ્યા હતા. આરોગ્ય મંત્રીએ કેબિનેટ બેઠક દરમિયાન આ સિદ્ધિઓ અંગે માહિતી આપી હતી, જેને મંત્રીમંડળે બિરદાવી હતી અને આરોગ્ય ક્ષેત્ર સાથે જોડાયેલા તમામ તબીબો, આરોગ્યકર્મીઓ તેમજ સંસ્થાઓને અભિનંદન પાઠવ્યા હતા.

૩ ઓગસ્ટના રોજ ‘નેશનલ ઓર્ગન ડોનેશન ડે’ અંતર્ગત યોજાયેલા રાષ્ટ્રીય કાર્યક્રમ દરમિયાન ગુજરાતની વિવિધ સરકારી આરોગ્ય સંસ્થાઓને ઓર્ગન ડોનેશન ક્ષેત્રે ઉત્કૃષ્ટ કામગીરી બદલ સન્માનિત કરવામાં આવી હતી. રાજ્યની હોસ્પિટલોએ અંગદાન અંગે લોકોમાં જાગૃતિ લાવવા, અંગોના સફળ રિટ્રીવલ અને અંગ પ્રત્યારોપણની કામગીરીમાં નોંધપાત્ર યોગદાન આપ્યું હોવાથી આ સન્માન મળ્યું છે.

અમદાવાદ સ્થિત IKDRC સંસ્થાને મળ્યું

આ એવોર્ડ્સમાં સૌથી મહત્વપૂર્ણ સન્માન અમદાવાદ સ્થિત IKDRC સંસ્થાને મળ્યું છે. સંસ્થાને 'Excellence in Leading Government Hospital in Organ Transplantation' એવોર્ડથી નવાજવામાં આવી છે. આ એવોર્ડ ઓર્ગન ટ્રાન્સપ્લાન્ટેશન ક્ષેત્રે ઉત્તમ કામગીરી, દર્દીઓને ગુણવત્તાસભર સારવાર અને સફળ અંગ પ્રત્યારોપણ માટે આપવામાં આવ્યો છે.

સિવિલ હોસ્પિટલને પણ વિશેષ સન્માન

તે ઉપરાંત અમદાવાદ સિવિલ હોસ્પિટલને પણ વિશેષ સન્માન મળ્યું છે. મૃત દાતાઓમાંથી સફળતાપૂર્વક અંગોના રિટ્રીવલની કામગીરી બદલ અમદાવાદ સિવિલ હોસ્પિટલને રાષ્ટ્રીય એવોર્ડ એનાયત કરવામાં આવ્યો છે. મૃત દાતાઓ પાસેથી સમયસર અને સફળતાપૂર્વક અંગો મેળવી અનેક દર્દીઓને નવું જીવન આપવાના પ્રયાસોની દેશભરમાં પ્રશંસા થઈ છે.

સાથે જ નવી સિવિલ હોસ્પિટલને પણ મહત્વપૂર્ણ સિદ્ધિ પ્રાપ્ત થઈ છે. હોસ્પિટલને 'Best Brain Stem Death Team' તરીકે રાષ્ટ્રીય પુરસ્કાર મળ્યો છે. બ્રેઇન સ્ટેમ ડેથના કેસોમાં યોગ્ય પ્રક્રિયાનું પાલન, પરિવારજનોમાં જાગૃતિ લાવવી અને અંગદાનને પ્રોત્સાહન આપવા માટે હોસ્પિટલની ટીમે કરેલી કામગીરીને ધ્યાનમાં રાખીને આ સન્માન આપવામાં આવ્યું છે.

રાજ્ય સરકારની કેબિનેટ બેઠકમાં આરોગ્ય મંત્રીએ રજૂ કરી

આ તમામ એવોર્ડ્સની વિગતો રાજ્ય સરકારની કેબિનેટ બેઠકમાં આરોગ્ય મંત્રીએ રજૂ કરી હતી. કેબિનેટના તમામ સભ્યોએ આરોગ્ય ક્ષેત્રની આ ઉપલબ્ધિઓને બિરદાવી હતી અને ગુજરાતની સરકારી હોસ્પિટલોએ દેશભરમાં રાજ્યનું ગૌરવ વધાર્યું હોવાનું જણાવ્યું હતું. મંત્રીમંડળે આ સિદ્ધિ બદલ સંબંધિત તમામ હોસ્પિટલો, ડોક્ટરો, તબીબી સ્ટાફ અને આરોગ્ય વિભાગને અભિનંદન પાઠવ્યા હતા.

આ પણ વાંચો : 15 વર્ષની ઉંમરે ઘરેથી નીકળી હતી, 12 વર્ષ બાદ 27 વર્ષની પરિણીત મહિલા તરીકે મળી

ગુજરાતની સરકારી હોસ્પિટલોએ ઓર્ગન ડોનેશન અને ઓર્ગન ટ્રાન્સપ્લાન્ટેશન ક્ષેત્રે કરેલી નોંધપાત્ર કામગીરીના કારણે આજે દેશભરમાં પોતાની આગવી ઓળખ ઉભી કરી છે. રાષ્ટ્રીય સ્તરે મળેલા આ એવોર્ડ્સ માત્ર હોસ્પિટલોની સિદ્ધિ નથી, પરંતુ સમગ્ર રાજ્યના આરોગ્ય ક્ષેત્ર માટે ગૌરવની બાબત છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ