ગુજરાત / રાજ્યસભાની ટિકિટ ન મળતા નવઘણજી ઠાકોરે આપી સીધી ચીમકી, '2027માં પરિણામ ભોગવવા તૈયાર રહેજો'

ગુજરાતના રાજકારણમાં ચૂંટણી ટાણે અસંતોષ અને નારાજગીના દ્રશ્યો નવા નથી, પરંતુ રાજ્યસભાની આગામી ચૂંટણી પહેલાં જ ક્ષત્રિય ઠાકોર સમાજ તરફથી ભાજપ સામે એક મોટો મોરચો ખોલવામાં આવ્યો છે. અખિલ ઠાકોર એકતા સમિતિના પ્રદેશ અધ્યક્ષ નવઘણજી ઠાકોરે રાજ્યસભાની ટિકિટ ન મળતા ભાજપ હાઈકમાન્ડ સામે પોતાનો ઉગ્ર આક્રોશ ઠાલવ્યો છે. તેમણે ખૂબ જ કડક શબ્દોમાં ભાજપને ચેતવણી આપતા જણાવ્યું છે કે, જો ઠાકોર સમાજની લાગણીઓ અને માગણીઓને સંતોષવામાં નહીં આવે, તો સત્તાધારી પક્ષ ભાજપે આગામી સમયમાં તેનું ગંભીર પરિણામ ભોગવવા માટે તૈયાર રહેવું પડશે.

નવઘણજી ઠાકોરે પક્ષ પર આકરા પ્રહારો કરતા કહ્યું હતું કે, ભાજપ દ્વારા કોઈ પણ ચૂંટણી હોય, તેમાં હંમેશાં ઠાકોર સમાજની ધરખમ અવગણના કરવામાં આવે છે. તેમણે આંકડાકીય અને વસ્તીના આધારે દાવો કર્યો છે કે સમગ્ર ગુજરાતમાં ઠાકોર સમાજની જનસંખ્યા સૌથી વધારે છે, તેમ છતાં પણ રાજકીય રીતે ગુજરાતમાં ઠાકોર સમાજને પૂરતું અને યોગ્ય પ્રતિનિધિત્વ મળતું નથી. આ એક બહુ મોટો અન્યાય છે જે સમાજ હવે સહન કરવાના મૂડમાં નથી.

ચાલુ ચૂંટણી પ્રક્રિયાનો ઉલ્લેખ

તેમણે ચાલુ ચૂંટણી પ્રક્રિયાનો ઉલ્લેખ કરતા સ્પષ્ટ કર્યું કે, તાજેતરમાં રાજ્યસભાની ચૂંટણી માટે જે ૪ નામોની જાહેરાત પક્ષ તરફથી કરવામાં આવી છે, તેમાં એક પણ ઠાકોર ઉમેદવારનું નામ સામેલ નથી. માત્ર ચૂંટણીની ટિકિટ જ નહીં, પરંતુ ભાજપના સંગઠનમાં, વિવિધ સરકારી નિમણૂકોમાં અને સરકારી તંત્રના વહીવટમાં પણ ઠાકોર સમાજને સતત અન્યાય થઈ રહ્યો હોવાની લાગણી સમાજમાં વ્યાપી ગઈ છે.

આ પણ વાંચો : રાજ્યભરમાં 75 હજારથી વધુ ઉમેદવારો આપશે કસોટી, કડક બંદોબસ્ત સાથે પરીક્ષાનું આયોજન

પોતાની માગણીઓ સંતોષવા માટે ભાજપને છેલ્લી તક આપતા નવઘણજી ઠાકોરે જણાવ્યું કે, હજુ પણ ફોર્મ ભરાય તે પહેલાં જો ભાજપ ઠાકોર સમાજને ખરા અર્થમાં ન્યાય આપવા માંગતું હોય, તો જાહેર કરાયેલા નામોમાં ફેરફાર કરી શકે છે. જો પક્ષ દ્વારા આ ફેરફાર કરવામાં નહીં આવે અને સમાજને તેનો હક નહીં મળે, તો વર્ષ ૨૦૨૭માં યોજાનારી આગામી વિધાનસભા ચૂંટણીમાં ભાજપે તેનું ભયાનક પરિણામ ભોગવવા તૈયાર રહેવું પડશે. નવઘણજી ઠાકોરની આ સીધી ચીમકીથી ગુજરાત ભાજપના આંતરિક વર્તુળોમાં ભારે ચર્ચા જાગી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ