દુર્ઘટના / અમદાવાદના જમાલપુરમાં કોલેજ નજીક જર્જરીત મકાન ધરાશાયી, સદનસીબે કોઈ જાનહાનિ નહીં

Ahmedabad Building Collapse : અમદાવાદના જમાલપુર વિસ્તારમાં કોલેજ નજીક મોડી રાત્રે એક જર્જરિત મકાન અચાનક ધરાશાયી થતાં થોડા સમય માટે અફરાતફરીનો માહોલ સર્જાયો હતો. મકાન ધરાશાયી થવાનો જોરદાર અવાજ સંભળાતા આસપાસના રહેવાસીઓ તાત્કાલિક સ્થળ પર દોડી આવ્યા અને સમગ્ર વિસ્તાર લોકોની ભીડથી છલકાઈ ગયો.

શું છે સમગ્ર મામલો ?

પ્રાથમિક માહિતી મુજબ, મકાન લાંબા સમયથી જર્જરિત હાલતમાં હતું. જોકે, સદનસીબે ઘટના સમયે મકાનમાં કોઈ હાજર ન હોવાથી કોઈ જાનહાનિ કે ઈજાની ઘટના નોંધાઈ નથી. આ કારણે મોટી દુર્ઘટના ટળી હોવાનું સ્થાનિકોએ જણાવ્યું હતું. ઘટનાની જાણ થતાં સંબંધિત તંત્ર અને સ્થાનિક અધિકારીઓ તાત્કાલિક સ્થળ પર પહોંચી ગયા હતા. સુરક્ષાને ધ્યાનમાં રાખીને મકાનની આસપાસ ચેતવણી બોર્ડ લગાવવામાં આવ્યા હતા અને સમગ્ર વિસ્તારને સુરક્ષિત કરવામાં આવ્યો હતો, જેથી કોઈ અનિચ્છનીય ઘટના ન બને.

આ પણ વાંચો : અમદાવાદ નજીક વહેલી સવારે ભૂકંપનો આંચકો! 2.6ની તીવ્રતાથી ધરતી ધ્રૂજી

આ ઘટનાને પગલે જમાલપુર સહિત આસપાસના વિસ્તારોમાં આવેલા અન્ય જર્જરિત મકાનોની પણ તપાસ કરવામાં આવે તેવી શક્યતા વ્યક્ત કરવામાં આવી રહી છે. નિષ્ણાતો દ્વારા મકાનોની સ્થિતિનું મૂલ્યાંકન કરીને જરૂરી કાર્યવાહી કરવામાં આવે તેવી સંભાવના છે. સ્થાનિક લોકોનું કહેવું છે કે શહેરમાં અનેક જૂના અને જર્જરિત મકાનો હજુ પણ જોખમી સ્થિતિમાં છે. સમયસર સર્વે અને જરૂરી કાર્યવાહી કરવામાં આવે તો આવી ઘટનાઓને અટકાવી શકાય અને લોકોની સુરક્ષા વધુ સુનિશ્ચિત બની શકે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ