વડોદરા / માંજલપુર પેટાચૂંટણીમાં સવારે 9 વાગ્યા સુધી 6.06% મતદાન, ફરવા પહેલાં મતદાતાઓએ નિભાવી ફરજ

Manjalpur By Election : વડોદરાની માંજલપુર વિધાનસભા બેઠક પર આજે યોજાઈ રહેલી પેટાચૂંટણી માટે સવારે 7 વાગ્યાથી મતદાન પ્રક્રિયાની શરૂઆત થઈ હતી. ચૂંટણીના પ્રથમ બે કલાક દરમિયાન એટલે કે સવારે 7 થી 9 વાગ્યા સુધીમાં 6.06 ટકા મતદાન નોંધાયું હોવાનું ચૂંટણી તંત્ર દ્વારા જણાવાયું છે.

મતદાન મથકો પર વહેલી સવારથી જ મતદાતાઓની અવરજવર જોવા મળી હતી. અનેક જાગૃત નાગરિકોએ પોતાના રોજિંદા કાર્યક્રમ અને પ્રવાસ પહેલાં મતદાનને પ્રાથમિકતા આપી હતી. ખાસ કરીને સાપુતારા સહિત અન્ય સ્થળોએ ફરવા જવા નીકળેલા કેટલાક મતદાતાઓ ટ્રાવેલ બેગ સાથે સીધા મતદાન મથક પર પહોંચ્યા અને મતાધિકારનો ઉપયોગ કર્યા બાદ જ પ્રવાસ માટે રવાના થયા.

મહિલા મતદાતાઓએ પણ ઉત્સાહપૂર્વક મતદાનમાં ભાગ લીધો હતો. ઘણા પરિવારો પોતાના દૈનિક કાર્યક્રમ પહેલાં લોકશાહીના આ મહાપર્વમાં જોડાયા હતા. મતદાતાઓનું કહેવું હતું કે મતદાન કરવું માત્ર અધિકાર નહીં, પરંતુ દરેક નાગરિકની મહત્વપૂર્ણ ફરજ છે. ચૂંટાયેલા જનપ્રતિનિધિઓ લોકોના પ્રશ્નો સાંભળે અને વિકાસના કામો કરે તે માટે મતદાન જરૂરી હોવાનું તેમણે જણાવ્યું.

આ પણ વાંચો : અમદાવાદ નજીક વહેલી સવારે ભૂકંપનો આંચકો! 2.6ની તીવ્રતાથી ધરતી ધ્રૂજી

આ દરમિયાન વડોદરા શહેર ભાજપ પ્રમુખ ડૉ. જયપ્રકાશ સોની પણ પોતાના પરિવાર સાથે મતદાન કરવા પહોંચ્યા હતા. મતદાન બાદ તેમણે આ ચૂંટણીમાં ભાજપની ઐતિહાસિક જીતનો વિશ્વાસ વ્યક્ત કર્યો હતો. ચૂંટણી તંત્ર દ્વારા મતદારોને વધુમાં વધુ સંખ્યામાં મતદાન કરવા અપીલ કરવામાં આવી છે, જેથી લોકશાહી વધુ મજબૂત બને.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ