- 'ટ્રકોમાં ફરજિયાત AC' ડ્રાફ્ટ નોટિફિકેશનને કેન્દ્રની મંજૂરી
- 2025થી તમામ ટ્રકોમાં ફરજિયાત લગાડવું પડશે એસી
- નીતિન ગડકરીએ ટ્વિટ કરીને આપી માહિતી
ટ્રક ડ્રાઇવરો ટૂંક સમયમાં જ વાતાનુકૂલિત કેબિનોમાં ડ્રાઇવિંગ કરતા જોવા મળશે. મોદી સરકારે N2 અને N3 કેટેગરીની ટ્રકોની કેબિનમાં એરકન્ડિશનિંગ સિસ્ટમ ફરજિયાત બનાવવાની તૈયારીઓ પૂર્ણ કરી લીધી છે. હવે એર કંડિશનિંગ સિસ્ટમને ફરજિયાત કરવાના ડ્રાફ્ટ નોટિફિકેશનને પણ સરકારની મંજૂરી મળી ગઈ છે.
નીતિન ગડકરીએ ટ્વીટ કરીને આ માહિતી આપી
કેન્દ્રીય મંત્રી નીતિન ગડકરીએ ટ્વિટ કરીને કહ્યું, N2 અને N3 કેટેગરીની ટ્રકોની કેબિનમાં એર કન્ડિશનિંગ સિસ્ટમ લગાવવા માટે ડ્રાફ્ટ નોટિફિકેશનને મંજૂરી આપવામાં આવી છે. ટ્રક ડ્રાઇવરો માર્ગ સલામતી સુનિશ્ચિત કરવામાં મહત્વપૂર્ણ ભૂમિકા ભજવે છે. આ નિર્ણય ટ્રક ડ્રાઇવરો માટે આરામદાયક કાર્યકારી પરિસ્થિતિઓ પ્રદાન કરવા માટે એક મહત્વપૂર્ણ સીમાચિહ્નરૂપ છે, જે તેમની કાર્યક્ષમતામાં સુધારો કરશે અને ડ્રાઇવરના થાકની સમસ્યાનું નિરાકરણ લાવશે.
N2 અને N3 કેટેગરી શું છે?
N2- આ કેટેગરીમાં આવતી ટ્રકોનું કુલ વજન 3.5 ટનથી વધુ છે, પરંતુ 12 ટનથી ઓછું છે.
N3- આ કેટેગરીમાં એવા ટ્રકનો સમાવેશ થાય છે જેનું વજન 12 ટનથી વધુ છે.
સરકારના આ નિર્ણયથી શું ફાયદો થશે?
ઓટોમોબાઈલ્સના ક્ષેત્રમાં ભારત હવે વિશ્વમાં ત્રીજા નંબરે પહોંચી ગયું છે. એટલે કે દેશના રસ્તાઓ પર મોટી સંખ્યામાં વાહનો છે અને આ હાજરી માર્ગ અકસ્માતનું મોટું કારણ બની જાય છે. ટ્રક ચાલકો દરેક સિઝનમાં પોતાની ટ્રક સામાન્ય કેબિનો સાથે હંકારતા હોય છે, જેના કારણે ખાસ કરીને ઉનાળાની ઋતુમાં તેમને ભારે મુશ્કેલીનો સામનો કરવો પડતો હોય છે. એટલે કે તેમને થાક અને ઓછી ઊંઘ સાથે પોતાનું કામ કરવું પડે છે. જેના કારણે અકસ્માત થવાની શક્યતા છે, હવે તેનાથી રાહત મળશે.
2025 સુધીમાં ટ્રકની કેબિનમાં એસી ફરજિયાત
20 જુન 2023ના દિવસે નીતિન ગડકરીએ 2025 સુધી તમામ ટ્રકોમાં ફરજિયાત એસી ફીટ કરવાના સમાચાર આપ્યાં હતા. તે વખતે તેમણે કહ્યું હતું કે
"ઓટો ઉત્પાદકોએ ટૂંક સમયમાં ટ્રકના ડ્રાઇવરની કેબિનની અંદર એર કન્ડિશનર લગાવવા પડશે. મેં તે ફાઇલ પર સહી કરી છે જે ટ્રક ડ્રાઇવરના ડબ્બામાં એર કન્ડિશનિંગ ફરજિયાત કરે છે. આપણે એ સુનિશ્ચિત કરવું જોઈએ કે ટ્રકો ચલાવતા લોકો સાથે સારો વ્યવહાર કરવામાં આવે. ગડરીએ કહ્યું હતું કે આપણા ડ્રાઇવરો 43.47 ડિગ્રીના આકરા તાપમાં વાહન ચલાવે છે અને આપણે ડ્રાઇવરોની સ્થિતિની કલ્પના કરવી જોઈએ. હું પ્રધાન બન્યા પછી એસી કેબિન રજૂ કરવા માટે ઉત્સુક હતો. પરંતુ કેટલાક લોકોએ ટ્રકોની કિંમત વધશે તેમ કહી તેનો વિરોધ કર્યો હતો. આજે મેં એ ફાઈલ પર સહી કરી છે કે બધી જ ટ્રક કેબિન એસી કેબિન હશે.
ટ્રક બનાવનારી કંપનીને મળ્યો 18 મહિનાનો સમય
ગડકરીએ કહ્યું કે 2025થી તમામ ટ્રકોમાં એસી કેબિન લાગુ પાડવાનો પ્લાન છે આ વાતની જાણ ટ્રક બનાવતી કંપનીઓને કરી દેવાઈ છે આ રીતે તેમની પાસે 18 મહિનાનો સમય છે.
