એક્સપર્ટ ઓપિનિયન / બાપ રે.! સોનાના ભાવમાં તોફાની તેજી, અમદાવાદમાં 62, 750 રૂપિયે 10 ગ્રામ, ગોલ્ડનો ભાવ હજુ વધી આટલો થવાની શક્યતા

• સોનાના ભાવમાં તોફાની તેજી
• સોનાનો ભાવ ઓલટાઈમ હાઈ
• સોનાનો ભાવ રૂ.62 હજાર 750ને પાર

છેલ્લા કેટલાક દિવસથી સોનાના ભાવમાં આગ ઝરતી તેજી જોવા મળી રહી છે. તેવામાં સોનાના ભાવે આજે તમામ હદ વટાવી દીધી છે. પરિણામે આજે સોનાના ભાવમાં તોફાની તેજી વચ્ચે ભાવ ઓલ ટાઈમ હાઈ  62, 750 પર સ્થિર થયો હતો. જેને લઈને સોનુ સામાન્ય માણસ માટે હવે સપના સમાન બની રહે તેવો ઘાટ સર્જાયો છે. સોનાનો આ ભાવ અત્યાર સુધીનો સોનાનો સૌથી ઊંચો ભાવ ગણવામાં આવી રહ્યો છે. બીજી બાજુ ચાંદીના ભાવ 73 હજારની આસપાસ જોવા મળી રહ્યા છે.

અત્યાર સુધીનો સોનાનો સૌથી ઉંચો ભાવ નોધાયો

એટલું જ નહીં વિશ્વબજારનો માહોલ જોતાં આગામી સમયમાં પણ સોનાના ભાવ હજુ વધારો યથાવાત રહે તેવું જાણવા મળી રહ્યું છે. દિવાળી સુધીમાં સોનાના ભાવ રૂ.70 હજાર થાય તેવુ નિષ્ણાંતો માની રહ્યા છે. જ્યારે ચાંદીનો  ભાવ રૂ.85 હજાર થવાના ભણકારા વાગી રહ્યા છે. તેમ અમદાવાદ જવેલર્સ એસોસીએશનના પ્રમુખ જીગર ઝવેરીએ જણાવ્યું છે. આ ઉપરાંત વિશ્વયુદ્ધ અને તણાવભરી સ્થિતિ વચ્ચે સોનુ 80 હજાર સુધી પણ પહોંચી શકે છે.

રોકાણનો બેસ્ટ વિકલ્પ છે સોનુ
ઉલ્લેખનીય છે કે મોટાભાગના દાગીના 22 કેરેટ ગોલ્ડમાં કરાવવામાં આવતા હોય છે ત્યારે 22 કેરેટ સોનાનો ભાવ 55,000 આસપાસ જોવા મળ્યો હતો. સોનાના ભાવમાં નોંધાતા વધારા વચ્ચે આજના ભાવ આસમાનને આંબી જતા રોકાણકારો મૂંઝાયા હતા સાથે રેગ્યુલર ખરીદી કરતાં લોકોએ પણ સોનું ખરીદવાનું માંડી વાળ્યું હતું! હાલની સ્થિતિએ વિશ્વ બજારમાં ચાલતા સખળડખડ વચ્ચે સોનાને રોકાણ માટે સૌથી બેસ્ટ વિકલ્પ માનવામાં આવી રહ્યો છે. જેને લઈને રોકાણકારો સોના તરફ વળ્યા છે આથી સોનાના ભાવમાં વધારો નોંધાઇ રહ્યો છે.