ક્રાઈમ / અમદાવાદમાં ટક્કરથી ઘાયલ થઈ બકરી, લોકો લાકડી-પાઈપ લઈને તૂટી પડ્યાં એક્ટિવા ચાલક પર, મારી નાખ્યો

• બકરી સાથે અકસ્માત જેવી નજીવી બાબતે એક યુવાનની હત્યા 
• બકરીને ટક્કર વાગતા ઈજા પહોંચતા આરોપીએ હુમલો કર્યો
• પોલીસે એકની ધરપકડ કરી અન્ય ચારની શોધખોળ શરૂ કરી

અમદાવાદના કૃષ્ણનગરમાં એક બકરી સાથે અકસ્માત જેવી નજીવી બાબતે એક યુવાનની હત્યા કરી દેવાતાં ચકચાર મચી છે. કૃષ્ણનગરના સૈજપુર બોઘામાં રહેતો જગદીશ ચુનારા નાંમનો યુવક  રાત્રે એક્ટિવા પર જઇ રહ્યો હતો ત્યારે રાધેશ્યામ ચાલીમાં તેનો અકસ્માત બકરી સાથે થયો હતો. એક્ટિવા સાથે ટક્કર બાદ બકરી ઘાયલ થઇ ગઇ હતી. 

નજીવી બાબતે હત્યા
આરોપી હિતેશ જેણે બકરી સાથે અકસ્માત મામલે એક યુવકની હત્યા કરી દીધી છે. ઘટના એવી છે કે, કૃષ્ણનગરમાં સૈજપુર બોઘામાં રહેતો યુવક જગદીશ ચુનારા રાત્રિ દરમિયાન એક્ટિવા પર જઈ રહ્યો હતો. તે દરમિયાન સૈજપુર ભઠ્ઠામાં રાધેશ્યામ ચાલીની અંદર એક્ટિવા ચલાવતા સમયે અચાનક તેની એક્ટિવા આગળ બકરી આવી હતી. જેના કારણે બકરીને ટક્કર વાગતા તેને ઈજા પહોંચી હતી. બકરીના માલિક આરોપી હિતેશ ચુનારા, તેના પિતા દશરથ ચુનારા અને ભાઈઓ  ઘરેથી બહાર આવ્યા હતા અને જગદીશ ચુનારા સાથે ઝઘડો કર્યો હતો. આ ઝઘડો એટલો ઉગ્ર બન્યો કે ઉશ્કેરાયેલા આરોપીઓ લાકડીઓ અને લોખંડની પાઇપોથી હુમલો કરી દીધો હતો અને જગદીશ જમીન પર ઢળી પડ્યો હતો. હોસ્પિટલમાં સારવાર માટે લઈ જતા ડોક્ટર મૃત જાહેર કર્યો હતો. જે મામલે ક્રુષ્ણનગર પોલીસે હત્યાનો ગુનો નોંધી એક આરોપી હિતેષની ધરપકડ કરી છે.

5 આરોપી વિરુદ્ધ ગુનો નોંધ્યો
પકડાયેલ આરોપી હિતેષ ચુનારા મજુરી કામ કરે છે અને ઘરે બકરીઓનો ઉછેર કરે છે. ઘર નજીક બકરી ફરી રહી હતી ત્યારે જગદીશની એક્ટિવાથી બકરી ઘાયલ થતા પરિવાર ઉશ્કેરાઈ ગયો હતો. આ બકરી બાળપણથી ઉછેરી હોવાથી લાગણીના કારણે મારામારી કરી દીધી હોવાનો આરોપીએ બચાવ કર્યો છે પરંતુ એક સામાન્ય ઝઘડામાં યુવકની હત્યા કરી દેતા સમગ્ર વિસ્તારમાં સનસનાટી ફેલાઈ હતી. કૃષ્ણનગર પોલીસે હત્યા કેસમાં 5 આરોપી વિરુદ્ધ ગુનો નોંધ્યો છે. જેમાં મુખ્ય સૂત્રધારની ધરપકડ કરીને અન્ય ચારની શોધખોળ શરૂ કરી છે.