ક્રિકેટ / ભારતને વર્લ્ડ કપ જીતાડનાર ગૅરી કર્સ્ટન બન્યાં પાકિસ્તાનના નવા કોચ, પકડ્યોતો સચિનનો જોરદાર કેચ

ટી-20 વર્લ્ડ કપ પહેલાં પાકિસ્તાન ક્રિકેટ બોર્ડમાં એક મોટો ફેરફાર જોવા મળ્યો છે. ભારતને વર્લ્ડ કપ જીતાડનાર ગૅરી કર્સ્ટનને પાકિસ્તાનની ટીમના નવા કોચ તરીકે નિયુક્ત કરવામાં આવ્યા છે. કર્સ્ટનના કોચિંગમાં ભારતીય ટીમે 2011નો ક્રિકેટ વર્લ્ડ કપ જીત્યો. ઓસ્ટ્રેલિયાના પૂર્વ ફાસ્ટ બોલર જેસન ગિલેસ્પીને ટેસ્ટ ટીમના મુખ્ય કોચ બનાવવામાં આવ્યા છે. ટી-20 વર્લ્ડ કપ 1 જૂનથી અમેરિકા અને વેસ્ટ ઈન્ડિઝમાં રમાવાનો છે.

ગેરી કર્સ્ટન IPL ફ્રેન્ચાઇઝી ગુજરાત ટાઇટન્સનો મેન્ટર

56 વર્ષીય ગેરી કર્સ્ટન હાલમાં IPL ફ્રેન્ચાઇઝી ગુજરાત ટાઇટન્સનો મેન્ટર છે. કર્સ્ટન ભારત ઉપરાંત સાઉથ આફ્રિકાની ટીમના હેડ કોચ તરીકે પણ ત્રણ વર્ષ સુધી જવાબદારી સંભાળી રહ્યા છે. કર્સ્ટનને ટી-20 વર્લ્ડ કપના એક મહિના પહેલા જ પાકિસ્તાનના કોચ તરીકે નિયુક્ત કરવામાં આવ્યા છે. મિકી આર્થર ખસી ગયા બાદ ત્રણેય ફોર્મેટમાં પાકિસ્તાનની ટીમના હેડ કોચનું પદ ખાલી હતુ. આર્થર બાદ મોહમ્મદ હાફીઝે ટીમ ડાયરેક્ટર તરીકેની જવાબદારી સંભાળી હતી પણ ન્યૂઝીલેન્ડ અને ઓસ્ટ્રેલિયન પ્રવાસમાં કંગાળ દેખાવ બાદ તેની હકાલપટ્ટી પણ કરવામાં આવી હતી.

કોણ છે ગેરી કર્સ્ટન

ડાબોડી ઓપનિંગ બેટ્સમેન ગેરી કર્સ્ટન સાઉથ આફ્રિકા તરફથી 101 ટેસ્ટ મેચ રમ્યાં હતા. તેમણે 7289 રન ફટકાર્યાં હતા. આ સમયગાળા દરમિયાન તેનો સર્વોચ્ચ સ્કોર 275 રનનો હતો. પોતાની ટેસ્ટ કારકિર્દીમાં ગેરીએ 21 સદી અને 34 અડધી સદી ફટકારી હતી. ગેરી કર્સ્ટને 185 વન ડેમાં 6798 રન ફટકાર્યા હતા, જેમાં 13 સદી અને 45 અડધી સદી સામેલ છે. ગેરી કર્સ્ટનનો વન ડેમાં શ્રેષ્ઠ સ્કોર અણનમ 188 રન હતો. ગેરી કર્સ્ટન દક્ષિણ આફ્રિકાના શ્રેષ્ઠ બેટ્સમેનોમાંના એક છે. તેઓ શાનદાર ફિલ્ડર પણ હતાં.

કર્સ્ટને પકડ્યો હતો સચિનનો કેચ

એકવાર ગેરી કર્સ્ટને સચિન તેંડુલકરનો એવો કેચ પકડ્યો જે હજુ પણ ફેન્સના મનમાં હશે. કર્સ્ટને 1996માં ડરબનમાં રમાયેલી ટેસ્ટ મેચમાં ભારતની બીજી ઇનિંગમાં શોન પોલોકના બોલ પર આ કેચ પકડ્યો હતો. કર્સ્ટનના કેચની ગણતરી ટેસ્ટ ક્રિકેટના શ્રેષ્ઠ કેચમાં થાય છે.