ન્યાયિક ચુકાદા / હેટ સ્પીચ મામલે સુપ્રીમનો મોટો આદેશ, 'જે બોલાય તે બધું નફરતભર્યું નથી હોતું, અદાલતો એલર્ટ રહીને નિર્ણય કરે'

• હેટ સ્પીચ મામલે સુપ્રીમનો અદાલતોને આદેશ 
• નફરત તમામ ધર્મોની દુશ્મન
• જે કંઈ કહેવામાં આવે છે તે બધી હેટ સ્પીચ હોતી નથી 

સુપ્રીમ કોર્ટે હેટ સ્પીચને લઈને મહત્વની ટીપ્પણી કરતા કોર્ટને વધારે એલર્ટ રહેવાનો આદેશ આપ્યો છે. સુપ્રીમ કોર્ટે હેટ સ્પીચના મામલામાં કાર્યવાહીની માંગ કરતી અરજી પર સુનાવણી કરતા કહ્યું કે નફરત તમામ ધર્મોની દુશ્મન છે અને એવું નથી કે જે પણ કહેવામાં આવે છે તે હેટ સ્પીચ છે.

જે કંઈ કહેવાયું તે બધું નફરતભર્યું હોતું નથી- સુપ્રીમ
જસ્ટિસ કેએમ જોસેફ અને બી વી નાગરથનાની બે જજોની બેંચે સોમવારે કહ્યું હતું કે, ગુનો શું છે તે નક્કી કરતી વખતે અદાલતોએ સાવચેત રહેવું પડશે. ખંડપીઠે એમ પણ કહ્યું હતું કે, વસ્તુઓને સ્પષ્ટ રીતે જોવા માટે, મનમાંથી નફરત દૂર કરવી જરૂરી છે. "એવું નથી કે જે કંઈ પણ કહેવામાં આવે છે તે નફરતભર્યું ભાષણ છે... આપણે સાવચેત રહેવું જોઈએ."
બંધારણમાં નફરતભર્યા ભાષણની વ્યાખ્યા કરવામાં આવી નથી એમ જણાવતાં સુપ્રીમે કહ્યું હતું કે કલમ 153એ (ધર્મ, જાતિ, જન્મસ્થળ, રહેઠાણ, ભાષા વગેરેના આધારે વિવિધ જૂથો વચ્ચે દુશ્મનાવટને પ્રોત્સાહન આપવું) માટેની હાકલ મોટાભાગે કોર્ટના અર્થઘટન પર આધારિત રહેશે.

ગુનેગારો સામે કાર્યવાહી કરવાનો આદેશ 
સુપ્રીમ કોર્ટે અગાઉ હેટ સ્પીચ સામે કાર્યવાહીના અભાવ અંગે નિરાશા વ્યક્ત કરી હતી. કોર્ટે કહ્યું હતું કે જો આવા નફરતભર્યા ભાષણને રોકવા માટે વધુ નિર્દેશો જારી કરવાનું કહેવામાં આવે તો તેનાથી વધુ શરમજનક બીજું કશું ન હોઈ શકે. ગયા વર્ષે સર્વોચ્ચ અદાલતે દિલ્હી, ઉત્તર પ્રદેશ અને ઉત્તરાખંડની સરકારોને આદેશ આપ્યો હતો કે તેઓ ફરિયાદની રાહ જોયા વિના ગુનેગારો સામે તાત્કાલિક કડક કાર્યવાહી કરે.