શિસ્ત નેવે / ટિકિટની જાહેરાત બાદ ભાજપમાં પણ નથી બધુ બરાબર, જુઓ ક્યાં કોણ ખેલ પાડવાની તૈયારીમાં

• ભાજપે 160 બેઠકો પર ઉમેદવારો કરી જાહેરાત 
• અનેક બેઠકો પર અસંતોષનો સૂર ઉઠ્યો 
• નરોડા બેઠકથી સિંધી સમાજને ટિકિટ ન ફાળવાતા રોષ

રાજ્યમાં વિધાનસભા ચૂંટણીને લઈ ભાજપે આજે 160 બેઠકો પર ઉમેદવારો જાહેર કર્યા છે. ત્યારે યાદી જાહેર થતાં ભાજપ કાર્યકરોમાં વિરોધના શૂર ઉઠ્યો છે. ભાવનગરના મહુવામાં રાજ્યકક્ષાના મંત્રી રાઘવ મકવાણાની ટિકિટ કપાતા સ્થાનિક કાર્યકરોમાં ગરમાવો જોવા મળ્યો હતો. ભાજપે શિવાભાઈ ગોહીલને ટિકિટ આપતા વિરોધનો જ્વાળા ભભૂકયો હતો. બીજા બાજુ અમદાવાદની નરોડા વિધાનસભા બેઠકથી સિંધી સમાજને ટિકિટ ન ફાળવાતા વિરોધના નોંધાયો હતો. તેજ રીતે નર્મદાની ડેડીયાપાડા બેઠક પર BTPના મહેશ છોટુ વસાવાનું નામ ચર્ચાતા વિરોધ જોવા મળ્યો હતો.

નરોડા વિધાનસભા બેઠક પર ભાજપમાં ભડકો

ભાજપે જાહેર કરેલી 160 ઉમેદવારોની યાદીમાં આ વખતે મોટાભાગના દિગ્ગજોની ટિકિટો કપાઇ છે..તો યુવા અને મહિલા ઉમેદવારોને પ્રાધાન્ય પણ મળ્યું છે...ત્યારે અમદાવાદની નરોડા બેઠક પરથી ભાજપે યુવા અને શિક્ષિત મહિલા ઉમેદવાર ડો,પાયલ કુકરાણીને મેદાનમાં ઉતાર્યા છે....જો કે, ડૉ.પાયલ કુકરાણીનું નામ જાહેર થતા જ પૂર્વ MLA બલરામ થાવાણી અને તેમના સમર્થકોએ વિરોધ પણ નોંધાવ્યો છે...

ભાવનગરના મહુવામાં ભાજપમાં ભડકો
ભાવનગરના મહુવામાં ભાજપને સૌથી મોટો ઝટકો લાગ્યો છે. રાજ્યકક્ષાના મંત્રી રાઘવ મકવાણાની ટિકિત કપાતા રાજકારણમાં ગરમાવો આવ્યો છે. ભાજપે મહુવા બેઠક પરથી શિવાભાઈ ગોહિલને ટિકિટ આપતા ભાજપ તાલુકા સંગઠન, શહેર સંગઠનના તમામ ચૂંટાયેલા સભ્યોએ રાજીનામા આપી દીધા છે. સાથે જ  નગરપાલિકા, તાલુકા પંચાયત અને જિલ્લા પંચાયતના સભ્યોએ પણ રાજીનામા આપી દીધા છે. 

રાજ્યકક્ષાના મંત્રી રાઘવ મકવાણાની ટિકિટ કપાતા ગરમાવો 
ભારતીય જનતા પાર્ટી દ્વારા ઉમેદવારોની પ્રથમ યાદી જાહેર કરતાની સાથે જ મહુવા તાલુકા પંચાયતના તમામ સભ્યો જિલ્લા પંચાયતના તમામ સભ્યો અને મહુવા ભાજપ સંગઠનના તમામ સભ્યો સહિત ભાજપના કાર્યકરો અને આગેવાનો સહિત 300થી વધારે સભ્યોએ સામૂહિક રાજીનામાં ધરી દીધા છે. 

ડેડીયાપાડા સીટનું કોકડુ ગુંચવાતા કાર્યકરોમાં વિરોધ ઉઠ્યો
વધુમાં નર્મદાના ડેડીયાપાડા સીટનું કોકડુ ગુંચવાતા કાર્યકરોમાં વિરોધ ઉઠ્યો છે. ડેડીયાપાડામાં ભાજપ btp ના મહેશ છોટુ વસાવાને ટિકિટ આપશે એવી ચર્ચાએ જોર પકડાતાં ડેડીયાપાડામાં ભાજપના તમામ કાર્યકરોમાં નારાજગી વ્યક્ત કરી જિલ્લા સંઘઠનને ઉગ્ર રજુઆત કરી હતી.  Btp ના મહેશ વસાવાને ટિકિટ મળે તો ભાજપ કાર્યકરો દ્વારા કાર્યાલય બંધ કરવાની રજુઆત કરી હતી. ભાજપના કાર્યકરોએ સ્થાનિક ઉમેદવારની માંગ કરી છે અને આયાતી ઉમેદવારને કોઈ પણ સંજોગોમાં ચલાવીશું નહીં તેવી ચીમકી પણ ઉચ્ચારી  હતી. ડેડીયાપાડાના તમામ ભાજપના કાર્યકરો રાજીનામાં આપી દેશે. તેમ પણ જણાવ્યું હતું. 

મધુ શ્રીવાસ્તવ અપક્ષ ઉમેદવારી નોંધાવશે
ભાજપ દ્વારા વડોદરાની વાઘોડિયા સીટ પરથી દબંગ ધારાસભ્ય મધુ શ્રીવાસ્તવની શરણાગતિ નહિ માની તેની સામે જીલ્લા પ્રમુખને ટિકિટ આપવામાં આવતા સમગ્ર મામલો દિવસભર ટોક ઓફ ધ ટાઉન બન્યા હતો. ત્યારે મધુ શ્રીવાસ્તવ અપક્ષ ઉમેદવારી નોંધાવશે કે નહિ તે બાબતે તેઓએ કાર્યકરો જેમ કહેશે તેમ કરીશ તેવું કહ્યું હતું. સાંજના સુમારે મહાદેવ તળાવ નજીક આવેલ મધુ શ્રીવાસ્તવની ઓફીસે બેઠક મળી હતી. જે બેઠકમાં નિર્ણય કરવામાં આવ્યો કે મધુ શ્રીવાસ્તવ અપક્ષ ઉમેદવારી નોંધાવશે. વધુમાં તેમણે જણાવ્યું હતું કે વર્ષોથી પાર્ટીએ કામ કર્યું પણ પાર્ટીએ મારી કદર ના કરી. આ નિર્ણય કાર્યકર્તાઓ સાથેની મીટીંગ બાદ લીધો છે. ત્યારે તેમણે પક્ષને ફેર વિચારણા કરવા કહ્યું છે.