નેશનલ / 2027 ની ચૂંટણીઓ પૂર્વે ચૂંટણી પંચની મોટી કાર્યવાહી, 5 રાજ્યોમાં અધિકારીઓની બદલી અંગે કડક નિર્દેશો જારી

દેશના ચૂંટણી પંચ દ્વારા પાંચ રાજ્યો માટે અધિકારીઓની બદલી અને નવી નિમણૂકો સંદર્ભે અત્યંત મહત્વપૂર્ણ આદેશ જારી કરવામાં આવ્યા છે. આ પાંચ રાજ્યોમાં ગોવા, મણિપુર, પંજાબ, ઉત્તર પ્રદેશ અને ઉત્તરાખંડનો સમાવેશ થાય છે. ચૂંટણી પંચે આ રાજ્યોમાં ચૂંટણી કામગીરી સાથે સીધા જોડાયેલા અધિકારીઓની બદલી અને નિમણૂક અંગે સ્પષ્ટ માર્ગદર્શિકા જાહેર કરી છે. આ નિર્દેશો અનુસાર, ચૂંટણી ફરજ સાથે સંકળાયેલા કોઈપણ અધિકારીને એક જ જિલ્લામાં સતત ત્રણ વર્ષથી વધુ સમય સુધી પદ પર રાખી શકાશે નહીં. પોતાના આદેશમાં પંચે સ્પષ્ટપણે જણાવ્યું છે કે પોતાના વતન એટલે કે ગૃહ જિલ્લામાં તૈનાત હોય તેવા તમામ અધિકારીઓને તાત્કાલિક અસરથી ત્યાંથી હટાવવામાં આવશે. આ ઉપરાંત, છેલ્લા ચાર વર્ષના સમયગાળા દરમિયાન કોઈ ચોક્કસ જિલ્લામાં ત્રણ વર્ષની સેવા પૂર્ણ કરી ચૂકેલા અધિકારીઓની પણ અનિવાર્યપણે બદલી કરવાની રહેશે.

અધિકારીઓની સમયમર્યાદા ગણવા માટે અલગ આખરી તારીખો નિર્ધારિત

ચૂંટણી પંચ દ્વારા અધિકારીઓના ત્રણ વર્ષના સેવાકાળની ચોક્કસ ગણતરી કરવા માટે અલગ-અલગ આખરી તારીખો નક્કી કરવામાં આવી છે. ગોવા, મણિપુર, પંજાબ અને ઉત્તરાખંડ માટે 31 માર્ચ 2027 સુધીના સમયગાળાને ધ્યાનમાં લેવામાં આવશે. જ્યારે ઉત્તર પ્રદેશ માટે 31 મે 2027 ની તારીખને મુખ્ય આધાર બનાવવામાં આવશે. જારી કરાયેલા નિર્દેશો મુજબ, જિલ્લાની અંદર જ અન્ય કોઈ પદ પર બઢતી મળ્યા બાદ આપેલી સેવાને પણ આ ત્રણ વર્ષના કુલ સમયગાળાની ગણતરીમાં ઉમેરી લેવામાં આવશે. જોકે, રાજ્યના વડા મથકે વિતાવેલા સમયગાળાને કેટલીક ચોક્કસ શરતોને આધીન રહીને જિલ્લામાં તૈનાતીના સમયગાળામાં ગણવામાં આવશે નહીં.

અત્રે નોંધનીય છે કે, ગોવા વિધાનસભાની મુદત આગામી વર્ષે 14 માર્ચે, મણિપુરની 13 માર્ચે, પંજાબની 16 માર્ચે, ઉત્તરાખંડની 28 માર્ચે અને ઉત્તર પ્રદેશ વિધાનસભાની મુદત 22 મેના રોજ પૂર્ણ થઈ રહી છે. પંચે કડક સૂચના આપી છે કે આ આદેશોનો અમલ કરતી વખતે ખાસ ધ્યાન રાખવામાં આવે કે ચૂંટણી કામગીરી સાથે સંકળાયેલા કોઈપણ અધિકારીની બદલી તેમના પોતાના ગૃહ જિલ્લામાં ન થવી જોઈએ.

વધુ વાંચો : 140ની ઝડપે પવન ફૂંકાશે, ભારે વરસાદ, અર્નબ વાવાઝોડાનું રૌદ્ર રૂપ, 9 રાજ્યોમાં એલર્ટ, ગુજરાત પર શું અસર?

આ ઉપરાંત કોઈપણ જિલ્લા નિર્વાચન અધિકારી, ચૂંટણી અધિકારી, સહાયક ચૂંટણી અધિકારી, પોલીસ સબ ઈન્સ્પેક્ટર તેમજ તેનાથી ઉચ્ચ હોદ્દો ધરાવતા કોઈ પણ પોલીસ અધિકારીને એવા કોઈ પણ નિર્વાચન ક્ષેત્રમાં તૈનાત કરી શકાશે નહીં, જ્યાં તેઓ વિતેલી વિધાનસભા ચૂંટણી કે ત્યારબાદ યોજાયેલી કોઈ પેટાચૂંટણી દરમિયાન ફરજ પર તૈનાત રહ્યા હોય.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ