દૂષણ નાબૂદી / ક્રિપ્ટોકરન્સી પર મોટો નિર્ણય લેવાની તૈયારીમાં મોદી સરકાર, આવતીકાલે થશે આ કામ

• ટેરર ફંડિંગ અને મની લોન્ડરિંગમાં ક્રિપ્ટોકરન્સીનો ઉપયોગ 
• કેન્દ્ર સરકાર હરકતમાં આવી
• મોદી સરકાર ક્રિપ્ટોકરન્સી પર બીલ લાવવાની તૈયારીમાં
• આવતીકાલે મોટી બેઠક, ચર્ચા થવાની સંભાવના 

મીડિયા રિપોર્ટ અનુસાર કેન્દ્ર સરકાર ક્રિપ્ટોકરન્સી પર એક વ્યાપક બીલ રજૂ કરવાની તૈયારી કરી રહી છે, જે સંસદના આગામી શિયાળુ સત્રમાં રજૂ થઈ શકે છે.  ક્રિપ્ટોકરન્સી અંગે નાણાં અંગેની સ્થાયી સમિતિની બેઠક આગામી 15 નવેમ્બરે મળવાની છે. જેમાં તેના તમામ પાસાઓ પર વિચાર વિમર્શ કરવામાં આવશે.

RBIએ સરકારને તેનો અભિપ્રાય આપ્યો 

RBIએ ક્રિપ્ટોકરન્સી અંગે સરકાર સમક્ષ તેનો અભિપ્રાય આપ્યો છે. કેન્દ્રીય બેંકે શુક્રવારે ડિજિટલ સંપત્તિ પર તેની સ્થિતિ સ્પષ્ટ કરતાં કહ્યું હતું કે બેન્કને ક્રિપ્ટોકરન્સી અંગે ગંભીર ચિંતા છે. RBIના ગવર્નર શક્તિકાંત દાસનું કહેવું છે કે વર્ચ્યુઅલ કરન્સીને લઈને RBIની સ્થિતિમાં કોઈ ફેરફાર થયો નથી. અમને ક્રિપ્ટોકરન્સી વિશે મોટી ચિંતા છે જે અમે સરકારને કહી છે. તેમણે કહ્યું કે રોકાણકારોએ પણ ડિજિટલ ચલણ વિશે ખૂબ સાવચેત રહેવાની જરૂર છે.

ભારત ક્રિપ્ટોકરન્સી પર સંપૂર્ણ પ્રતિબંધની તરફેણમાં નહીં 

ભારત સરકાર ક્રિપ્ટોકરન્સી અંગે ચીન જેવું વલણ અપનાવવા તૈયાર નથી. ચીને ડિજિટલ પ્રોપર્ટી પર પ્રતિબંધ મૂક્યો છે. ભારત સરકાર ક્રિપ્ટોકરન્સી પર નિયમનકારની તરફેણમાં છે. આનો અર્થ એ થઈ શકે છે કે ભારત ક્રિપ્ટોકરન્સી પર સંપૂર્ણ પ્રતિબંધ મૂકતું નથી પરંતુ તેની પર બાજ નજર રાખવામાં આવશે. 

13 નવેમ્બરે પ્રધાનમંત્રી નરેન્દ્ર મોદીના નેતૃત્વમાં મોટી બેઠક યોજાઈ હતી 
મોદી સરકાર ક્રિપ્ટોકરન્સી પર કાર્યવાહી કરી રહી છે. ખુદ પ્રધાનમંત્રી નરેન્દ્ર મોદીના નેતૃત્વમાં 13 નવેમ્બરે આ મુદ્દે બેઠક યોજાઈ હતી. આ બેઠક રિઝર્વ બેંક, નાણાં મંત્રાલય અને ગૃહ મંત્રાલય દ્વારા સંયુક્ત પરામર્શ પ્રક્રિયા બાદ કરવામાં આવી હતી જેમાં મંત્રાલયોએ ક્રિપ્ટોકરન્સી અંગે વિવિધ દેશો અને વિશ્વભરના નિષ્ણાતોની સલાહ લીધી હતી.