કોરોના વિસ્ફોટ / ભારતમાં આજે 10 લાખને પાર થશે કોરોના દર્દીનો કુલ આંક, વિશ્વનો ત્રીજો દેશ બનશે

• કોરોનાનો વધતો કહેર બનાવી રહ્યો છે રોજ નવા રેકોર્ડ
• દર ચોથા દિવસે થાય છે એક લાખ કેસનો વધારો
• આજે સાંજ સુધીમાં ભારત 10 લાખ કેસને કરી શકે છે પાર
• ભારત કોરોના સંક્રમિત દેશોમાં ત્રીજા નંબરે આવશે

રોજ તૂટી રહ્યો છે કોરોનાનો રેકોર્ડ

દેશમાં 30 જાન્યુઆરીએ કોરોના વાયરસનો પહેલો કેસ સામે આવ્યો હતો. માર્ચ બાદ કોરોનાએ ગતિ પકડી. શરૂઆતમાં રોજ 100, 200 અને 500 કેસ આવતા હતા. પણ લગભગ 4 મહિના બાદ આ સંખ્યા અનેક ગણી વધી. છેલ્લા કેટલાક દિવસોથી તો રોજના કેસ પણ રેકોર્ડ તોડી રહ્યા છે. 

બુધવારે સ્વાસ્થ્ય મંત્રાલય તરફથી જાહેર કરાયેલા આંકડા અનુસાર 24 કલાકમાં દેશમાં કુલ 32695 કેસ સામે આવ્યા છે. જ્યારે 600થી વધારે લોકોના મોત થયા છે. સાથે દેશમાં કુલ કેસની સંખ્યા પણ 968876 પહોંચી છે. એટલે કે ગુરુવારે એટલે કે આજે ફરી 32 હજાર જેટલા કેસ આવે છે તો દેશમાં કુલ કેસની સંખ્યા 10 લાખને પાર થઈ જશે. આ સિવાય આજે જ મોતનો આંક પણ 25000ને પાર જઈ શકે છે. 

દેશમાં કુલ કેસ - 968876
દેશમાં કુલ એક્ટિવ કેસ - 331146
દેશમાં સાજા થયેલા દર્દીઓ - 612815
દેશમાં કુલ મોતનો આંક - 24915

મહારાષ્ટ્ર છે સૌથી વધુ પ્રભાવિત, યૂપી-બિહાર-દક્ષિણ રાજ્યોમાં બગડી સ્થિતિ

દેશમાં સૌથી વધુ કોરોના વાયરસના કેસ મહારાષ્ટ્રમાં છે. અહીં લગભગ પોણા 3 લાખ કેસ છે. જ્યારે મહારાષ્ટ્ર બાદ તમિલનાડુ અને દિલ્હીમાં સૌથી વધારે કેસ છે. 3 રાજ્યોના મળીને લગભગ 5 લાખ કેસ 3 રાજ્યોમાં છે. આ સિવાય અનેક રાજ્ય એવા છે જ્યાં રોજ રેકોર્ડ બ્રેક કેસ આવી રહ્યા છે. આ રાજ્યોમાં ઉત્તરપ્રદેશ, બિહાર જેવા રાજ્ય છે જ્યાં રોજ દોઢ હજાર કેસ આવી રહ્યો છે. જેના કારણે લૉકડાઉન લગાવવું પડી શકે તેમ છે. આ સિવાય તેલંગાણા, કર્ણાટક, તમિલનાડુમાં રોજ કેસની સંખ્યા વધી રહી છે. દિલ્હીમાં કોરોનાની ગતિ ઘટી છે. પરંતુ ખતરો હજુ પણ કાયમ છે. 

વેક્સીનને લઈને ઓક્સફર્ડ યુનિવર્સિટીથી આવી શકે છે સારા સમાચાર

ઉલ્લેખનીય છે કે દેશમાં હવે કોરોના ટેસ્ટિંગની ગતિ વધી છે. છેલ્લા 2 દિવસથી દેશમાં સતત સવા 3 લાખ ટેસ્ટ 24 કલાકમાં થઈ રહ્યા છે. કુલ ટેસ્ટની સંખ્યા સવા કરોડને પાર પહોંચી છે. દેશમાં અત્યાર સુધીમાં 1200થી વધુ ટેસ્ટિંગ લેબ છે. એટલેકે હજુ પણ ટેસ્ટિંગની સંખ્યા વધારી શકાય તેમ છે.