- પાટણમાં યોજાયું ક્ષત્રિય ઠાકોર સમાજનું સંમેલન
- મંગાજી ઠાકોરે ભાજપમાંથી માંગી ટિકિટ
- ટિકિટ નહી મળે તો પણ ચૂંટણી લડીશ : મંગાજી ઠાકોર
ગુજરાત વિધાનસભાની ચૂંટણીમાં ઝંપલાવવા ટિકિટવાચ્છુકોની પડાપડી થઇ રહી છે. આવી સ્થિતિમાં પાટણ ભાજપમાં આજે મોટો અપસેટ સર્જાયો હતો. પાટણ વિધાનસભા બેઠકની ભાજપની ટિકિટની માંગ કરતા મંગાજી ઠાકોરે આજે ઠાકોર સમાજનાં સ્નેહમિલનનાં બેનર હેઠળ પોતાનું મોટું શક્તિ પ્રદર્શન યોજયુ હતું. જેમાં લાંબા સમયથી ટિકિટની રાહ જોતા મંગાજી ઠાકોરને 2022 માં ભાજપમાં સંભવિત નામોમાં સ્થાનના મળતા તેઓએ અગાઉથી જ શક્તિ પ્રદર્શન યોજી ટિકિટની માંગ કરી છે. એટલું જ નહિ જો ભારતીય જનતા પાર્ટી ટિકિટ નહીં આપે તો ડંકાની ચોટ ઉપર ચુંટણી લડવાની ભાજપને ચિમકી પણ ઉચ્ચારતા રાજકારણમાં ચર્ચા જાગી છે.
પાટણ બેઠકમાં નવા જૂની થવાના એંધાણ
શક્તિ પ્રદર્શનમાં ખુદ ભાજપના પ્રદેશ ઉપપ્રમુખ નંદાજી ઠાકોર, અખિલ એકતા ક્ષત્રિય સમાજના ગુજરાતના અધ્યક્ષ અભિજીતસિંહ બારડ, ઠાકોર સમાજના વિવિધ ગામોના આગેવાનો તેમજ યુવાનો પણ મોટી સંખ્યામાં હાજર રહ્યા હતા. સભામાંથી અભિજીતસિંહ બારડે સરકારને ચીમકી ઉચ્ચારી હતી કે જો પાટણ વિધાનસભા બેઠકમાં ભાજપ મંગાજી ઠાકોરને ટિકિટ નહીં આપે તો પણ મંગાજી ઠાકોર પાટણ વિધાનસભા બેઠકમાંથી ચૂંટણી લડશે. બીજી તરફ મંગાજી ઠાકોર પણ હવે આરપારની લડાઈ લડવા માટે તૈયાર થઈ ગયા હોય તેમ પાટણમાં 25,000 મતોથી જીતવાનો આશાવાદ વ્યક્ત કર્યો હતો. જેને લઇને પાટણ વિધાનસભા બેઠકમાં ભાજપમાં હડકંપ મચી જવા પામ્યો છે. મંગાજી ઠાકોરે ભાજપ સામે બાયો ચડાવી છે ત્યારે પાટણ વિધાનસભા બેઠકમાં નવા જૂની થવાના એંધાણ વર્તાઈ રહ્યા છે.
રઘુ દેસાઈ પર અલ્પેશ ઠાકોરનો આરોપ
ગુજરાત વિધાનસભાની ચૂંટણી જાહેર થતાં રાઘનપુર બેઠકને લઇ રાજકારણમાં ગરમાવો આવ્યો છે. રાઘનપુર બેઠકના ધારાસભ્ય રઘુ દેસાઈ અને ભાજપ નેતા અલ્પેશ ઠાકોરે એકબીજા પર આરોપ-પ્રત્યારોપ શરૂ કર્યા છે. ગઈકાલે રઘુ દેસાઈએ ચૂંટણી પંચ પર આક્ષેપ કર્યો હતો. તેમણે કહ્યું હતું કે, ચૂંટણીપંચ અલ્પેશ ઠાકોરના દબાણમાં કામ કરે છે. આવી રીતે ચૂંટણીપંચ પક્ષકાર બને તે યોગ્ય કહેવાય નહીં, જેના જવાબમાં આજે અલ્પેશ ઠાકોરે રઘુ દેસાઈ પર આરોપ કર્યો છે.
તેમણે ફેસબૂક પર લાઈવ આવીને આક્ષેપ કર્યો કે, રઘુ દેસાઈએ લાખો રૂપિયાના તોડ કર્યા છે. વધુમાં તેમણે કહ્યું કે, રઘુ દેસાઈ રાધનપુરની જનતાને મૂર્ખ બનાવવા નીકળ્યા છે. રાઘનપુરમાં હજુ રઘુભાઈની હોસ્પિટલ તૈયાર થઇ નથી. આમ છતાં હોસ્પિટલ ખુલ્લી મુકવામાં આવી છે. આ હોસ્પિટલ ખુલ્લી મુકવા રઘુ દેસાઈએ રાજસ્થાનના મુખ્યમંત્રીને આમંત્રણ આપ્યું હતું. જો કે,. રાજસ્થાનના મુખ્યમંત્રી અશોક ગેહલોતને હોસ્પિટલ ન બનવાની જાણ હતી. જેથી તે હોસ્પિટલનું ઉદ્ઘાટન કરવા આવ્યા ન હતા.
ખેરાલુ બેઠક પરથી જીજ્ઞેશ બારોટ લડશે ચૂંટણી
ગુજરાત ચૂંટણી જંગ વચ્ચે ખેરાલુ બેઠક પર નવા ઉમેદવારની જાહેરાતથી રાજનીતિ ગરમાઈ છે. લોકગાયક તરીકે પ્રખ્યાત જીગ્નેશ કવિરાજ ખેરાલુથી ચૂંટણી લડશે.જીગ્નેશ બારોટનું મૂળ વતન ખેરાલુ છે જેથી તેમણે ખેરાલુના રોજગાર, ઉદ્યોગ જેવા મુદ્દાઓને લઈ ચૂંટણી લડવાની જાહેરાત કરી છે. જીગ્નેશ કવિરાજના ચૂંટણી લડવાના સમાચાર સામે આવતા ખેરાલુ બેઠક પર ભારે રસાકસી થાય તેવા એંધાણ વર્તાઈ રહ્યા છે. જીગ્નેશ બારોટે ચૂંટણી લડવા વીષે વાત કરતા જણાવ્યુ હતુ કે, ખેરાલુમાં રોડથી લઈ પાણીની અનેક સમસ્યાઓ છે.તેમજ મારા ગામના લોકોની લાગણી હતી. જેથી પરિવાર અને સાથી કલાકારો સાથે ચર્ચા કર્યા બાદ અપક્ષથી ચૂંટણી લડવાનો નિર્ણય લીધો છે.
