મોટા સમાચાર / 'નવરાત્રીમાં 12 વાગ્યા બાદ કોઈ નાગરિક લાઉડ સ્પીકરની ફરિયાદ કરશે તો પોલીસે કાર્યવાહી કરવી પડશે', ગુજરાત હાઇકોર્ટનો આદેશ

• લાઉડ સ્પીકરથી પરેશાન નાગરિકે હાઈકોર્ટમાં કરી રજૂઆત 
• પોલીસને કાર્યવાહી કરતા રોકવા માટે સૂચના ન આપી શકે 
• 12 વાગ્યા બાદ ગરબાની ફરિયાદ થશે તો કાર્યવાહી કરવી પડશે

Navratri 2023: નવરાત્રી દરમિયાન ગરબાના સમયનો વિવાદ હાઈકોર્ટમાં પહોંચ્યો છે. મોડીરાત સુધી ચાલતા ગરબાના કારણે લાઉડ સ્પીકરથી પરેશાન નાગરિકે હાઈકોર્ટમાં રજૂઆત કરી છે. જેના પર હાઈકાર્ટે કહ્યું કે કોઈ નાગરિક 12 વાગ્યા બાદ લાઉડસ્પીકરની ફરિયાદ કરશે તો પોલીસે કાર્યવાહી કરવી પડશે.

લાઉડ સ્પીકરોના કારણે પરેશાની થતી હોવાની ફરિયાદ
મોડીરાત સુધી ચાલતા ગરબાથી પરેશાન નાગરિકે HCમાં રજૂઆત કરી છે કે, SC અને HCનો હુકમ છતાં પોલીસને કાર્યવાહી કરતા રોકવા માટે કોઈ સૂચના ન આપી શકે. નાગરિક દ્વારા મોડી રાત સુધી લાઉડ સ્પીકરોના કારણે પરેશાની થતી હોવાની ફરિયાદ કરવામાં આવી છે. નાગરિકની ફરિયાદ પર હાઈકોર્ટે કહ્યું કે, કોઈ નાગરિક 12 વાગ્યા પછી લાઉડ સ્પીકરની ફરિયાદ કરશે તો પોલીસે કાર્યવાહી કરવી પડશે. અગાઉ જે હુકમો પસાર થયા છે તેના પાલનની જવાબદારી પોલીસ વિભાગની છે. 

નાગરિક ઓર્ગેનાઇઝર્સ સામે FIR દાખલ કરાવી શકે છેઃ HC
હાઈકોર્ટે કહ્યું કે, નાગરિક ફરિયાદ કરશે તો 12 વાગ્યા પછી લાઉડ સ્પીકર પર ગરબા ચાલી શકશે નહીં. નાગરિક ઈચ્છે તો આવા ગરબા ઓર્ગેનાઇઝર્સ સામે FIR દાખલ કરાવી શકે છે. 

ખેલૈયાઓને લઈને લેવાયો છે મહત્વનો નિર્ણય
આપને જણાવી દઈએ કે, નવરાત્રીને લઈને ગુજરાતભરમાં માઈ ભક્તો અને ખેલૈયાઓમાં અનેરો ઉત્સાહ જોવા મળી રહ્યો છે. રાજ્યમાં ખેલૈયાઓ મન મૂકીને માતાજીના ગરબા ઘૂમી રહ્યા છે. ગુજરાતના હોટ ફેવરિટ ફેસ્ટિવલ નવરાત્રી ચાલી રહી છે. ત્યારે ગુજરાતીઓમાં પણ અનેરો રંગ અને થનગનાટ જોવા મળી રહ્યો છે. જોકે, રાત્રે 12 વાગ્યા બાદ ગરબા બંધ કરી દેવા પડતા હોવાથી ખેલૈયાઓ નિરાશ હતા. પરંતુ હવે સરકારે રાતે 12 વાગ્યા સુધી જ ગરબા રમવાની સમયસીમા દૂર કરી દીધી છે. 

હર્ષ સંઘવીએ આપી હતી મૌખિક સૂચના 
ગૃહ રાજ્યમંત્રી હર્ષ સંઘવીએ રાજ્યના પોલીસ વડા સાથે બેઠક કરી તેમને ખેલૈયાઓને કોઈ ખલેલ ન પહોંચે, કાયદો અને વ્યવસ્થાની સ્થિતિ જળવાઈ રહે તે રીતે વધુમાં વધુ સમય સુધી ગરબા રમવા માટે મૌખિક સૂચના આપી છે. ગૃહ રાજ્યમંત્રી હર્ષ સંઘવીએ તમામ SP અને પોલીસ કમિશનરને ગરબા બંધ કરાવવા ન જવાની સૂચના આપી છે.