સમર્થન / ગુજરાતનાં આ જિલ્લામાં આસારામના પોસ્ટર અને ગાડીઓ સાથે રેલી નીકળતા વિવાદ, મંજૂરી કોણે આપી તે ગંભીર સવાલ

• મહિસાગરના લુણાવાડામાં યોજાઇ રેલી
• આસારામના ફોટા સાથે રેલીથી વિવાદ 
• દુષ્કર્મીના સમર્થનમાં રેલીની મંજુરી કોણે આપી?

દુષ્કર્મી આસારામ અને તેનો પુત્ર નારાયણ સાંઇ જેલમાં પોતાના કુકર્મોની સજા કાપી રહ્યા છે. જો કે તેના સમર્થનમાં ફરી મહિસાગર જિલ્લામાં રેલી યોજાતાં વિવાદ થયો છે. મહિસાગરના લુણાવાડામાં આસારામનો ફોટો વાહન પર મુકી વિશાળ રેલીનું આયોજન કરવામાં આવ્યું હતું. યોગ વેદાંત સમિતિના બેનર સાથે રેલી યોજાતાં શહેરમાં લોકોમાં આશ્ચર્ય સાથે નારાજગી પણ જોવા મળી છે. 

આસારામના સમર્થનમાં રેલી
શહેરના હનુમાન વેલી રોડની મહિલા પોલીસ ચોકી સુધી યોજાયેલી રેલીની પરવાનગી કોણે આપી તેને લઇને લોકો સવાલ કરી રહ્યા છે. રેલી યોજવા માટે પોલીસ મંજુરી પણ લેવી પડે છે. ત્યારે પોલીસે કેવી દુષ્કર્મીની રેલીને મંજુરી આપી શકે તે સૌથી મોટો સવાલ છે. મહત્વનું છે કે દેશની સંસદમાં 24 કલાક પહેલા જ દુષ્કર્મીઓને ફાંસીની સજા અપાવતો કાયદો બનાવવામાં આવ્યો છે. જો કે બળાત્કારી આસારામની વારંવાર યોજાતી રેલીઓ, સ્કુલોમાં કરાવાતી પુજાઓ અને પુસ્તક મેળામાં રખાતા સ્ટોલ અંધભક્તિ અને વ્યવસ્થાના અધ:પતન તરફ આંગળી ચિંધે છે. 

મંજુરી કોણે આપી?
દેશમાં દરરોજ 86 દુષ્કર્મની ફરિયાદો થતી હોય તે દેશમાં દુષ્કર્મીની ખુલ્લેઆમ પુજા અને રેલી યોજવામાં આવી રહી છે ત્યારે કાયદો વ્યવસ્થા કેવી રીતે આંખ આડા કાન કરી શકે તે સૌથી મોટો સવાલ છે. આ રેલીને મંજૂરી કોણે આપી તે પણ એક સવાલ છે. જે સમગ્ર બાબતને લઈ પ્રજાજનોમાં રોષ જોવા મળી રહ્યો છે.