ન્યાયિક / સહમતિ હોય તો પણ સગીરાના રેપના આરોપીને જામીન ન મળી શકે- હાઈકોર્ટનો મોટો ચુકાદો

• દિલ્હી હાઈકોર્ટે સગીરાના રેપના આરોપીને આપ્યો ઝટકો
• જામીન આપવાનો કર્યો ઈન્કાર 
• કોર્ટે કહ્યું સગીરાની સહમતિને કાનૂની સહમતિ ન ગણી શકાય 
• સગીરા અને આરોપીએ સહમતિથી બાંધ્યો હતો શારીરિક સંબંધ
• આરોપીએ સગીરાને પુખ્ત વયની દર્શાવવા જન્મતારીખ બદલી નાખી

દિલ્હી હાઈકોર્ટે 16 વર્ષની કિશોરી પર બળાત્કાર કરવાના આરોપી શખ્સના જામીન નામંજૂર કર્યા છે. કોર્ટે તેના આધાર કાર્ડ પર સગીરાની જન્મ તારીખ બદલવાનો પણ ઇનકાર કર્યો હતો. હાઈકોર્ટે એમ પણ કહ્યું હતું કે આધારકાર્ડ પર સગીરાની જન્મ તારીખ બદલવામાં પુરુષનું વર્તન "ગંભીર ગુનો" છે. 

સગીરા અને આરોપીએ સહમતિથી શારીરિક સંબંધ બાંધ્યો 
કોર્ટે કહ્યું કે, એવું લાગે છે કે આરોપી આધાર કાર્ડ પર જન્મ તારીખમાં ફેરફાર કરીને લાભ લેવા માંગતો હતો જેથી તે એવું સાબિત કરી શકે કે શારીરિક સંબંધ બાંધવાના સમયે સગીરા પુખ્ત વયની હતી.  હાઈકોર્ટે કહ્યું કે 16 વર્ષની ઉંમરે સગીરની સંમતિ, ખાસ કરીને જ્યારે અરજદાર 23 વર્ષનો હતો અને પહેલેથી જ પરિણીત હતો, તેને પણ જામીન મેળવવાનો અધિકાર નથી. હકીકતમાં, છોકરીના પિતાએ 2019 માં તેની પુત્રીના ગુમ થવા અંગે એફઆઈઆર નોંધાવી હતી. બાદમાં સગીરાને શોધીને ઉત્તર પ્રદેશના સંભલ જિલ્લામાંથી શોધી કાઢવામાં આવી હતી અને માતાપિતાને સોંપવામા આવી હતી. આ શખ્સ સાથે મળી આવેલી સગીરાએ મેજિસ્ટ્રેટ સમક્ષ પોતાના નિવેદનમાં જણાવ્યું હતું કે, તે તેનો બોયફ્રેન્ડ છે અને તે તેની સાથે લગભગ દોઢ મહિના સુધી રહી હતી. તેણીએ વધુમાં જણાવ્યું હતું કે આ વ્યક્તિએ તેની સંમતિથી શારીરિક સંબંધો બાંધ્યા હતા અને તે તેની સાથે આગળ રહેવા માંગે છે. આરોપી વ્યક્તિએ આ આધાર પર જામીન માંગ્યા હતા કે તે 2019થી કસ્ટડીમાં છે. 

સેક્સ માણીને સગીરાની જન્મતારીખ બદલાવી નાખી 
જવાબમાં જસ્ટીસે કહ્યું કે આ કેસમાં મારો એવો મત છે કે ઘટના સમયે સગીરાની ઉંમર માત્ર 16 વર્ષની હતી. અરજદાર 23 વર્ષનો હતો અને તે પહેલાથી જ પરિણીત હતો. આરોપી સગીરાને સબ-ડિવિઝનલ મેજિસ્ટ્રેટની ઓફિસમાં લઈ ગયો હતો અને 2002માં આધાર કાર્ડમાં તેની જન્મ તારીખ બદલી નાખી હતી. તેને બદલીને 5 માર્ચ, 2000 કરવામાં આવી હતી. ફક્ત એટલું જ બતાવવા માટે કે જે દિવસે તેણે સેક્સ માણ્યું તે દિવસે સગીરા સગીરા નહોતી. 

સહમતિના સેક્સ સંબંધને કોર્ટે કેમ ન ગણ્યો માન્ય

આ કિસ્સામાં સગીરા અને રેપના આરોપીએ સહમતિથી સેક્સ સંબંધ બાંધ્યો હોવા છતાં પણ કોર્ટે તેને માન્ય રાખ્યો નથી કારણ કે કોર્ટની નજરમાં સગીરાની સહમતિને કાનૂની સહમતિ તરીકે ન ગણી શકાય અને ઘટના સમયે સગીરાની ઉંમર 16 વર્ષની હોવાથી આ રેપ કેસ જ ગણાય અને તેથી આરોપીને જામીન ન મળી શકે.