ગુજ'રાજ' 2022 / રાજનીતિએ પિતા-પુત્રને દુશ્મન બનાવ્યા, ખુરશીના મોહમાં પાર્ટીના સ્થાપકની જ હકાલપટ્ટી થઈ ગઈ, ઝઘડીયા જંગ છેડાયો

• ઝઘડીયામાં પિતા પુત્ર વચ્ચે જંગ
• ચૂંટણી જંગમાં પિતા- પુત્ર આમને સામને
• પુત્ર મહેશ વસાવા સામે છોટુ વસાવાએ ભર્યું ફોર્મ

ગુજરાતના રાજકારણમાં ભાગ્યે જ કોઈ એવું હશે જે છોટુભાઈ વસાવાને નહીં ઓળખતું હોય. ગુજરાતના રાજકારણની વાત આવે ત્યારે છોટુ વસાવાનું નામ ન આવે એવું બંને જ નહીં. છેલ્લા લગભગ ચાર દાયકાથી ઝઘડિયા બેઠક અને છોટુ વસાવાનો નાતો જોડાયેલો રહ્યો છે. આ વખતે વસાવાના પરિવારમાંથી ટિકિટને લઈને કકળાટ સામે આવ્યો હતો.  મહેશ વસવાએ તેમના પિતા છોટુ વસાવા સામે મોરચો માંડ્યો હતો  બીટીપી પાર્ટીના અધ્યક્ષ મહેશ વસાવાએ પિતાના બદલે ઝઘડિયા સીટ પર પોતાનું નામ જાહેર કરી દેતા છોટુ વસાવાએ અપક્ષ ઉમેદવારી નોંધાવી છે.

પિતા- પુત્ર આમને સામને
રાજકારણ એવુ ક્ષેત્ર છે જ્યાં ભાઈ-ભાઈને વેરી બનાવે છે, પિતા-પુત્ર દુશ્મન બની જાય છે. ખુરશીના મોહમાં નેતાઓ સંબંધો ભૂલીને વિરોધીઓ બને છે તેવા એક નહિ, અનેક કિસ્સા છે. ત્યારે ગુજરાત વિધાનસભાની ચૂંટણી આવતા જ કાવાદાવા રચાઈ રહ્યાં છે. બીટીપીના સ્થાપક છોટુ વસાવાની તેમના પુત્રએ બીટીપીમાંથી હકાલપર્ટી કરી છે. પિતાની પરંપરાગત ઝઘડીયા બેઠક પર પુત્ર મહેશ વસાવાએ ઉમેદવારી નોંધાવી છે તો સામે છોટુ વસાવાએ અપક્ષમાંથી ફોર્મ ભરી દિકરા સામે જંગ છેડી છે.  7 ટર્મ ધારાસભ્ય રહી ચૂકેલા છોટુ વસાવાને BTPએ મેન્ડેટ ન આપતા જંગ છેડાઈ છે.

છોટુ વસાવાના પુત્ર દિલીપ વસાવાએ BTPમાંથી આપ્યું હતું રાજીનામું 
તેમણે સોશિયલ મીડિયા પર પોસ્ટ કરીને જણાવ્યું હતું કે, 'BTP તથા BTTSના રાષ્ટ્રીય અધ્યક્ષ મહેશ વસાવા દ્વારા જે પ્રમાણે માનનીય છોટુભાઈ વસાવાની જે અવગણના થઈ છે,  જેના કારણે ST,  SC, OBC, માઈનોરિટી સમાજના અધિકારની લડાઈને ભારે નુકસાન થઈ રહ્યું છે, એ જોતાં હું દિલીપભાઈ છોટુભાઇ વસાવા  BTP અને BTTS તમામ હોદ્દાઓ પરથી સ્વૈચ્છિક રાજીનામું આપું છું.'

હું જીવીશ ત્યાં સુધી ચૂંટણી લડીશ: છોટુ વસાવા
આ વિધાનસભાની ચૂંટણીમાં BTP એ પોતાના 12 ઉમેદવારની યાદી જાહેર કરતા જ MLA છોટુ વસાવા ચૂંટણી નહિ લડેની વાતો વહેતી થઈ હતી. જોકે, આદિવાસી મસીહા છોટુ વસાવાએ આ અટકળોનો અંત આણ્યો હતો. તેઓએ કહ્યું હતું કે, 'હું જીવીશ ત્યાં સુધી ચુંટણી લડીશ અને ચૂંટણી લડાવીશ. આદિવાસીઓને એમના હક આપી દેવાય તો કાલથી લડવાનું બંધ. તેમણે કહ્યું હતું કે, અમે આદિવાસીઓના હક માટે ચૂંટણી લડી રહ્યા છે. શક્ય હોય એટલી તમામ બેઠકો ઉપર BTP પોતાના ઉમેદવાર ઉભા રાખશે.'