દુઃખદ / વડોદરામાં ચાલકને હાર્ટ એટેક આવતાં કાર બે બાઈક સાથે અથડાઈ, ડ્રાઈવરનું મોત, વાહનોને ઘણું નુકશાન

વડોદરા શહેરના કોઠી ચાર રસ્તા નજીક પોલીસ હેડ ક્વાર્ટર પાસે આજે સવારે ગંભીર અકસ્માત સર્જાયો હતો. ચાલુ કારે ચાલકને અચાનક હ્રદયરોગનો હુમલો આવતા સ્ટીયરિંગ પરથી કાબૂ ગુમાવ્યો હતો. જેના પરિણામે કાર બે બાઈક સાથે અથડાઈ હતી.

હાર્ટ એટેક આવતા કાબે બે બાઈકને અડફેટે લીધા

અકસ્માત સર્જનાર કાર ચાલક 62 વર્ષીય હિતેશભાઈ ઠક્કરનું સારવાર પહેલા જ મોત નિપજ્યું હતું. તેઓ મકરપુરા જાનકીપાર્ક સોસાયટીના રહેવાસી હોવાનું જાણવા મળ્યું છે. હિતેશભાઈ કાર ચલાવી રહ્યા હતા ત્યારે અચાનક હાર્ટ એટેક આવતા સ્ટીયરીંગ પરનો કાબુ ગુમાવ્યો હતો. જે બાદ કારે બે ટુ-વ્હીલરને અડફેટે લીધા હતા.

આ પણ વાંચોઃ ગુજરાતમાં ક્યાં થશે 77માં પ્રજાસત્તાક દિવસની સત્તાવાર ઉજવણી, આ સ્થળનું નામ થયું જાહેર

ઈજાગ્રસ્તોને સારવાર અર્થે ખસેડાયા

આ અકસ્માતમાં કાર અને બે બાઈકને ભારે નુકસાન પહોંચ્યું છે. જ્યારે બાઈક પર સવાર કરશનભાઈ રાઠવા અને પ્રતીક રાઠવા ગંભીર રીતે ઈજાગ્રસ્ત થયા છે. બંનેને માથાના ભાગે ગંભીર ઇજાઓ થતાં તેમને તાત્કાલિક સયાજી હોસ્પિટલમાં ખસેડવામાં આવ્યા હતા. જ્યાં તેમની સારવાર ચાલુ છે. ઘટનાની જાણ થતાં જ સ્થાનિક પોલીસ ઘટનાસ્થળે પહોંચી હતી અને ટ્રાફિક વ્યવસ્થા સંભાળી હતી. પોલીસે અકસ્માત અંગે વધુ તપાસ શરૂ કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ