ન્યાયિક / મહિલાઓને ડાર્લિંગ કહેવું સેક્યુઅલ હેરેસમેન્ટ, થઈ શકે જેલની સજા- હાઈકોર્ટનો મોટો ચુકાદો

કલકત્તા હાઈકોર્ટે કહ્યું છે કે જો કોઈ પુરુષ કોઈ અજાણી મહિલાને ડાર્લિંગ કહે છે તો તેને યૌન ઉત્પીડનના દોષી માનવામાં આવશે અને ભારતીય દંડ સંહિતાની કલમ 354એ હેઠળ તેને જેલમાં જવું પડી શકે છે અને દંડ પણ ભરવો પડી શકે છે. હાઈકોર્ટની પોર્ટ બ્લેયર બેંચના જજ જસ્ટિસ જય સેનગુપ્તાએ કહ્યું કે, આરોપી નશામાં હોય કે પછી કોઈ પણ પરિસ્થિતિમાં તેણે કોઈ અજાણી મહિલાને ડાર્લિંગ કહી હોય તો પણ તેને યૌન ઉત્પીડનના દોષી માનવામાં આવશે.

આરોપીએ મહિલા પોલીસ અધિકારીને ડાર્લિંગ કહ્યું હતું 
જસ્ટિસ સેનગુપ્તાએ અપીલકર્તા આરોપી જનક રામની સજાને યોગ્ય ઠેરવી હતી, જેણે નશાની હાલતમાં પકડાયા બાદ એક મહિલા પોલીસ અધિકારી (ફરિયાદી)ને કહ્યું હતું કે, "ક્યા ડાર્લિંગ ચાલન કરના આયે હો ક્યા? જસ્ટીસ સેનગુપ્તાએ કલમ 354એ (એક મહિલાો લજ્જાભંગ) નો ઉલ્લેખ કરતા કહ્યું હતું કે આરોપી દ્વારા મહિલા પોલીસ અધિકારી વિરુદ્ધ કરવામાં આવેલી ટિપ્પણી જાતીય ટિપ્પણી સમાન છે અને આ જોગવાઈ ગુનેગારને સજાને પાત્ર બનાવે છે. "શેરીમાં કોઈ અજાણી સ્ત્રી, અરે, એક પોલીસ કૉન્સ્ટેબલને પણ કોઈ પુરુષ ડાર્લિંગ કહીને સંબોધી શકતો નથી. 

દારુ ન પીધો હોય તો પણ કરેલી ટીપ્પણી વધુ ગંભીર 
જસ્ટિસ સેનગુપ્તાએ કહ્યું હતું કે, દારુના નશામાં હોય કે ન હોય, પુરુષ અજાણી મહિલાને 'ડાર્લિંગ' શબ્દથી સંબોધી શકતો નથી અને જો તેણે આમ કર્યું હોય તો સ્પષ્ટ છે કે તે અપમાનજનક છે અને તેના શબ્દો મૂળભૂત રીતે જાતીય ટિપ્પણી છે. જો કે કોર્ટમાં આરોપીએ એવો દાવો કર્યો હતો કે, ટિપ્પણી સમયે પોતે પીધેલો હોવાના કોઇ પુરાવા નથી.
આ અંગે હાઇકોર્ટે કહ્યું કે, "જો આરોપીએ શાંત અવસ્થામાં રહીને મહિલા અધિકારી વિરુદ્ધ ટિપ્પણી કરી હોય તો ગુનો વધુ ગંભીર બને છે." જસ્ટિસ સેનગુપ્તાએ કહ્યું, આપણો સમાજ તમને રસ્તા પર ચાલતી વખતે કોઈ અજાણી મહિલાને ડાર્લિંગ કહેવાની મંજૂરી નથી આપતો. જાતીય સતામણીના કિસ્સામાં આરોપીને પાંચ વર્ષ સુધીની જેલ અથવા દંડ અથવા બંને થઈ શકે છે.