રોષ / વિદ્યાર્થીઓને તો ભણવું છે પણ ધોરણ 4માં એક જ શિક્ષક : પાંચ તલાવડા ગામે શિક્ષણનો બહિષ્કાર

• અમરેલીમાં શિક્ષણની અધોગતિ
• પાંચ તલાવડા ગામમાં શિક્ષકોની અછત
• એક માત્ર શિક્ષકથી ચાલે છે સ્કૂલ

ગુજરાતમાં એક તરફ ઉચ્ચ શિક્ષણ અને ગુણવત્તાસભર શિક્ષણ અપાતુ હોવાની વાતો કરવામાં આવે છે. શાળાઓ હાઇટેક બનાવવામાં આવે છે. ડિઝિટલ શિક્ષણ આપવામાં આવે છે તો બીજી તરફ એવી પણ શાળાઓ છે જ્યાં બાળકોને ભણવુ છે પણ ભણી શકતા નથી. કારણ કે શિક્ષકો જ નથી. બાળકોને ભણાવે કોણ ?

લિલિયાનાં પાંચ તલાવડી શાળામાં શિક્ષકોનો અભાવ

આ વાત છે અમરેલીના લિલિયાના પાંચ તલાવડા ગામની. અહીં વાલીઓ શાળાએથી બાળકોને ઘરે લઇ આવ્યા. કારણ કે ધોરણ 4ના બાળકો માટે એક જ શિક્ષક છે અને તે પણ પ્રજ્ઞાચક્ષુ. પાંચ તલાવડાની સરકારી પ્રાથમિક શાળામાં શિક્ષકોના અભાવને કારણે વિદ્યાર્થીઓ ભણી શકતા નથી. શાળામાં 6 શિક્ષકો છે પણ 3-4 તો અન્ય કોઇકામગીરીમાં વ્યસ્ત હોય છે જ્યારે ધોરણ 4માં તો માત્ર એક જ શિક્ષક હોવાથી શાળામાં વિદ્યાર્થીઓ જોઇએ તેવો અભ્યાસ કરી શકતા ન હોવાનો વાલીઓએ આરોપ લગાવ્યો.  શિક્ષકોની ઘટ વર્તાતા સરપંચ દ્વારા શિક્ષણનો બહિષ્કાર કરાયો. 

વાલીઓએ શિક્ષકોની ભરતી કરવા કરી માંગ નહી તો..

મહત્વનુ છે કે જિલ્લા શિક્ષણ સમિતિના ચેરમેન વિપુલ દુધાતનો મત વિસ્તાર છે. તેમના જ મત વિસ્તારમાં શિક્ષણનો બહિષ્કાર થતા ચોમેર ચર્ચાનો દોર શરૂ થયો છે. પોતાના જ મત વિસ્તારમાં શિક્ષણને લઇને આવી લાલિયાવાડી છે તો અન્ય ગામોમાં તો ખબર નહી કેવી સ્થિતિ હશે ? હાલ તો વિદ્યાર્થીઓના શિક્ષણ પર અસર પડતી હોવાને કારણે વાલીઓ ચાલુ શાળઆએ જ બાળકોને ઘરે લઇને આવ્યા હતા.  આ મામલે જિલ્લા શિક્ષણ અધિકારીને શિક્ષકોની ભરતી કરવા રજૂઆત કરી હતી. 5 દિવસમાં શિક્ષકોની ભરતી નહીં થાય તો શાળામાંથી LC કઢાવી લેવાની ચીમકી ઉચ્ચારી હતી.