- બોમ્બે હાઈકોર્ટની ઔરંગાબાદ બેન્ચનો ફેંસલો
- 17 વર્ષની સગીરાને ગર્ભપાતની ન આપી મંજૂરી
- કહ્યું, સહસંમતિથી બંધાયેલા સંબંધોથી થયેલી ગર્ભાવસ્થાની મંજૂરી નહીં
બોમ્બે હાઈકોર્ટની ઔરંગાબાદ બેન્ચે 17 વર્ષની છોકરીને તેની 24-અઠવાડિયાની સગર્ભાવસ્થાને ગર્ભપાત કરવાની મંજૂરી આપવાનો ઈન્કાર કર્યો છે. ગર્ભપાતની મંજૂરીનું કારણ આપતાં હાઈકોર્ટેનું એવું કહેવું છે કે તેમની વચ્ચે બંધાયેલા સંબંધો સહસંમતિનું પરિણામ હતું અને 24 અઠવાડિયાના ગર્ભપાતમાં બાળક જીવિત જન્મી શકે છે. જસ્ટિસ રવિન્દ્ર ઘુગે અને વાય જી ખોબ્રાગડેની ડિવિઝન બેન્ચે પોતાના આદેશમાં નોંધ્યું હતું કે છોકરી આ મહિને 18 વર્ષની થઈ જશે અને તે ડિસેમ્બર 2022થી છોકરા સાથે સહમતિથી સંબંધમાં છે. ખંડપીઠે પોતાના આદેશમાં જણાવ્યું હતું કે પીડિત છોકરી અને આરોપી છોકરા વચ્ચે ઘણી વખત શારીરિક સંબંધો બંધાયા હતા. છોકરી પોતે પ્રેગ્નન્સી કીટ લાવી હતી અને આ વર્ષે ફેબ્રુઆરીમાં પ્રેગ્નન્સીની પુષ્ટિ કરી હતી. તેથી, એવું લાગે છે કે અરજદાર પીડિતા નિર્દોષ નથી અને ઘટના સમયે તે સંપૂર્ણ પરિપક્વ હતી. જો તેણીને ગર્ભધારણ કરવામાં રસ ન હોય તો તે ગર્ભાવસ્થા નક્કી થયા બાદ તરત ગર્ભપાતની મંજૂરી માગી શકતી હતી.
છોકરીએ કેમ માગી ગર્ભપાતની મંજૂરી
છોકરીએ તેની માતા દ્વારા HCમાં અરજી દાખલ કરી હતી, જેમાં એવો દાવો કરવામાં આવ્યો હતો કે તે પ્રોટેક્શન ઓફ ચિલ્ડ્રન ફ્રોમ સેક્સ્યુઅલ ઓફેન્સીસ (POCSO) એક્ટની જોગવાઈઓ હેઠળ "બાળક" હોવાનો દાવો કરીને ગર્ભાવસ્થાને સમાપ્ત કરવા માગે છે. ગર્ભાવસ્થા માતા અથવા બાળકના જીવન અથવા સ્વાસ્થ્ય માટે જોખમી છે તેવું જણાય તો મેડિકલ ટર્મિનેશન ઑફ પ્રેગ્નન્સી એક્ટ હેઠળ, 20 અઠવાડિયાથી વધુ સમયની ગર્ભાવસ્થા સમાપ્ત કરવા માટે કોર્ટની પરવાનગી જરૂરી છે.
મેડિકલ બોર્ડે શું આપ્યું કારણ
અરજીમાં દાવો કરવામાં આવ્યો હતો કે ગર્ભાવસ્થા ભવિષ્યમાં ડૉક્ટર બનવા માટે અભ્યાસ કરવા ઈચ્છતા અરજદારના માનસિક સ્વાસ્થ્યને ગંભીર ઈજા પહોંચાડશે. હાઇકોર્ટે પીડિત છોકરીની તપાસ કર્યા પછી મેડિકલ બોર્ડ દ્વારા રજૂ કરાયેલા અહેવાલની નોંધ લીધી, જેમાં કહેવામાં આવ્યું હતું કે ગર્ભમાં કોઈ વિસંગતતા નથી અને વૃદ્ધિ સામાન્ય છે. મેડિકલ બોર્ડે અભિપ્રાય આપ્યો હતો કે જો આ તબક્કે ગર્ભપાત કરવામાં આવે તો જન્મેલા બાળકમાં જીવનના ચિહ્નો જોવા મળશે, પરંતુ તે સ્વતંત્ર રીતે જીવવા માટે સક્ષમ નથી. "જો ગર્ભધારણ સમાપ્ત કરવાની માતાની વિનંતીને ધ્યાનમાં રાખીને બળજબરીપૂર્વક ડિલિવરી પછી પણ બાળક જીવંત જન્મે છે, તો તે વિકૃતિની શક્યતાઓ સાથે અવિકસિત બાળક તરફ દોરી જશે.
હાઈકોર્ટે કેમ ન આપી ગર્ભપાતની મંજૂરી
ખંડપીઠે કહ્યું કે તે ગર્ભાવસ્થાને સમાપ્ત કરવાની મંજૂરી આપવા માટે વલણ ધરાવતી નથી કારણ કે કોઈ પણ સંજોગોમાં, બાળક જીવંત જન્મ લેશે અને કુદરતી ડિલિવરી માત્ર 15 અઠવાડિયા દૂર છે. જો છોકરી પાછળથી બાળકને દત્તક આપવા ઈચ્છે તો તે તેવું કરી શકવા છૂટી છે. જો બાળકની પૂરા મહિને ડિલિવરી થાય તો કોઈ વિકૃતિ નહીં હોય અને દત્તક લેવાની શક્યતાઓ વધુ ઉજળી થશે. ખંડપીઠે એમ પણ કહ્યું હતું કે સગર્ભા સ્ત્રીઓની ડિલિવરીથી માંડીને બાળકના જન્મ સુધીની સંભાળ રાખતી કોઈ સામાજિક સંસ્થામાં છોકરીને મૂકી શકાય છે.
