ટિકિટનું ટેન્શન / રાજકોટમાં દિગ્ગજોનો દાવ: રૂપાણી, મીરાણી, રૈયાણી, બોઘરા, ભારદ્વાજ સહિત અનેક દાવેદાર; ભાજપ કોને આપશે ટિકિટ?

• ગુજરાત વિધાનસભાની ચૂંટણીને લઇ ભાજપની તૈયારી તેજ 
• રાજકોટની 4 બેઠક માટે ભાજપની પેનલ તૈયાર
• ચારેય બેઠકના પેનલ નામો પ્રદેશમાં મોકલાશે

ગુજરાત વિધાનસભા ચૂંટણીના પડધમ વાગી ચૂક્યા છે, ત્યારે દરેક રાજકીય પાર્ટીઓ મતદારોને રીઝવવા પ્રયાસ કરી રહી છે. ચૂંટણી જીતવા માટે તમામ રાજકીય પાર્ટીઓ તનતોડ મહેનત કરી રહી છે. આમ આદમી પાર્ટીની એન્ટ્રીથી આ વખતે ગુજરાતમાં ત્રિપાંખિયો જંગ જામશે. આમ આદમી પાર્ટી દ્વારા ઉમેદવારોની પાંચ યાદી પણ જાહેર કરી દેવામાં આવી છે. જ્યારે ભાજપ અને કોંગ્રેસ દ્વારા હજુ સુધી ઉમેદવારોની જાહેરાત કરાઈ નથી. એવામાં ગુજરાત વિધાનસભાની ચૂંટણીને લઇ ભાજપે રાજકોટમાં તૈયારી તેજ કરી છે. 

રાજકોટની 4 બેઠક માટે ભાજપની પેનલ તૈયાર
રાજકોટની ચારેય બેઠક માટે ભાજપે પેનલ તૈયાર કરી છે. આ નામો પ્રદેશ ભાજપમાં મોકલવામાં આવશે. આ પેનલમાં રાજકોટ પશ્ચિમ બેઠક પર પૂર્વ મુખ્યમંત્રી વિજય રૂપાણી, કમલેશ મીરાણી, નીતિન ભારદ્વાજ, કશ્યપ શુક્લ, ડૉ.દર્ષિતા શાહ અને બિનાબેન આચાર્યનું નામ સંભવિત છે. જ્યારે પૂર્વ બેઠક પર અરવિંદ રૈયાણી, વલ્લભ દૂધાત્રા, દલસુખ જાગાણી, મુકેશ રાદડિયા અને અશ્વિન મોલીયાનું નામ સંભવિત છે. 

ચારેય બેઠકના પેનલ નામો પ્રદેશમાં મોકલાશે
રાજકોટની દક્ષિણ બેઠક પર છેલ્લા ત્રણ ટર્મ ચૂંટાઈ આવતા ગોવિંદ પટેલ, ધનસુખ ભંડેરી, ડૉ.ભરત બોઘરા, વિનુભાઈ સોલંકી, નરેન્દ્ર બાપુ અને નીતિન રામાણીનું નામ પણ સંભવિત છે. ઉપરાંત રાજકોટ ગ્રામ્ય બેઠક પર રાજુભાઈ અધેરા, અનિલ મકવાણા, મનોજ રાઠોડ, નરેન્દ્ર વાઘેલા અને ભાનુબેન બાબરીયાનું નામ સંભવિત છે.

ભાજપ અને કોંગ્રેસે નથી કરી ઉમેદવારોની જાહેરાત
ગુજરાત વિધાનસભાની ચૂંટણીમાં પરચમ લહેરાવવા તમામ રાજકીય પક્ષોએ તડામાર તૈયારીઓ કરી રહ્યા છે. ત્યારે આ વખતે ગુજરાતમાં જીત હાંસલ કરવા આપના રાષ્ટ્રીય સંયોજક અને દિલ્હીના મુખ્યમંત્રી અરવિંદ કેજરીવાલ તેમજ અન્ય નેતાઓના આંટાફેરા સતત વધી ગયા છે. આમ આદમી પાર્ટી દ્વારા ઉમેદવારોની પાંચ યાદી પણ જાહેર કરી દેવામાં આવી છે. જ્યારે ભાજપ અને કોંગ્રેસ દ્વારા હજુ સુધી ઉમેદવારોની જાહેરાત કરાઈ નથી. બે દિવસ અગાઉ ભરૂચની જંબુસર અને વાગરા બેઠકના ભાજપના ઉમેદવારની યાદી ફરતી થઈ ગઇ હતી. સોશિયલ મીડિયામાં આ યાદી CR પાટીલને સંબોધીને જાહેર થઈ ગઈ હતી. જોકે, આ મામલે ભરૂચના સાંસદ મનસુખ વસાવાએ આ યાદીને તથ્યથી વેગળી ગણાવી હતી. 

કેન્દ્રીય ચૂંટણી પંચની ટીમ રાજકોટમાં યોજશે બેઠક
તો આગામી વિધાનસભાની ચૂંટણીને લઈને કેન્દ્રીય ચૂંટણી પંચની ટીમ પણ આજે રાજકોટની મુલાકાતે આવી રહી છે. કેન્દ્રીય ચૂંટણી પંચની ટીમ 6 જિલ્લાના ચૂંટણી અધિકારીઓ, નાયબ જિલ્લા ચૂંટણી અધિકારીઓ અને જિલ્લા પોલીસ વડા તથા કમિશનર સાથે મહત્વની બેઠક યોજી ચૂંટણીની તૈયારીની સમીક્ષા કરશે. તેમજ ચૂંટણીની તૈયારીના ભાગરૂપે જે સુધારા કરવા જરૂરી હશે તે અંગે માર્ગદર્શન આપશે.