ગુજરાત / ભરૂચના સીમધરા નજીક ST બસ અને ડમ્પર વચ્ચે અકસ્માત, 10 મુસાફરો ઈજાગ્રસ્ત, 2ની હાલત ગંભીર

ભરૂચ જિલ્લાના સીમધરા નજીક ભાલોદથી અમદાવાદ જતી એસટી બસને ડમ્પર સાથે અકસ્માત નડતા 10 મુસાફરો ઈજાગ્રસ્ત થયા હોવાની ઘટના સામે આવી છે. અકસ્માત બાદ ઘટનાસ્થળે અફરાતફરીનો માહોલ સર્જાયો હતો. સ્થાનિક લોકો તેમજ રાહદારીઓએ તાત્કાલિક બચાવ કામગીરી શરૂ કરી હતી અને ઈજાગ્રસ્ત મુસાફરોને સારવાર માટે હોસ્પિટલ પહોંચાડવાની કામગીરી હાથ ધરવામાં આવી હતી.

ડમ્પર સાથે અકસ્માત સર્જાયો

મળતી માહિતી મુજબ ભાલોદથી અમદાવાદ જતી એસટી બસ સીમધરા નજીક પહોંચતા ડમ્પર સાથે અકસ્માત સર્જાયો હતો. અકસ્માતમાં કુલ 10 મુસાફરોને ઈજા પહોંચી હતી. જેમાંથી 2 મુસાફરોને ગંભીર ઈજા થતાં તેમને વધુ સારવાર માટે ભરૂચ સિવિલ હોસ્પિટલમાં દાખલ કરવામાં આવ્યા છે. જ્યારે અન્ય ઈજાગ્રસ્તોને પણ જરૂરી તબીબી સારવાર આપવામાં આવી રહી છે.

પોલીસ અને અધિકારીઓ તાત્કાલિક ઘટનાસ્થળે પહોંચ્યા

અકસ્માતની જાણ થતાં પોલીસ અને અધિકારીઓ તાત્કાલિક ઘટનાસ્થળે પહોંચ્યા હતા. અકસ્માત કેવી રીતે સર્જાયો અને તેના પાછળનું ચોક્કસ કારણ શું છે તે જાણવા માટે વધુ તપાસ હાથ ધરવામાં આવી છે. પોલીસ દ્વારા ઘટનાસ્થળેથી જરૂરી માહિતી એકત્રિત કરીને અકસ્માતના તમામ પાસાઓની તપાસ કરવામાં આવી રહી છે.

વસાવા ભરૂચ સિવિલ હોસ્પિટલ પહોંચ્યા

ઘટનાની જાણ થતાં સ્થાનિક ધારાસભ્ય રિતેશ વસાવા ભરૂચ સિવિલ હોસ્પિટલ પહોંચ્યા હતા. તેમણે હોસ્પિટલમાં સારવાર લઈ રહેલા ઈજાગ્રસ્ત મુસાફરોની મુલાકાત લઈને તેમના સ્વાસ્થ્ય અંગે માહિતી મેળવી હતી. સાથે જ દર્દીઓને યોગ્ય સારવાર મળી રહે તે માટે હોસ્પિટલના તબીબો અને અધિકારીઓ સાથે પણ ચર્ચા કરી હતી.

આ પણ વાંચો : રામ મંદિર ચોરી પર પ્રવિણ તોગડિયાએ બાંયો ચડાવી કહ્યું- ફાસ્ટ ટ્રેકમાં કેસ ચલાવીને ગુનેગારોને મૃત્યુદંડ થવો જોઈએ

હોસ્પિટલ પહોંચીને ઈજાગ્રસ્તોની મુલાકાત લીધી

આ ઉપરાંત જિલ્લા પંચાયત પ્રમુખ ડિમ્પલ વિક્રમસિંહ રાજેએ પણ હોસ્પિટલ પહોંચીને ઈજાગ્રસ્તોની મુલાકાત લીધી હતી. તેમણે ઈજાગ્રસ્તો અને તેમના પરિવારજનોને હિંમત આપી હતી તેમજ સારવાર અંગે જરૂરી માહિતી મેળવી હતી. સમગ્ર ઘટનાને લઈને જિલ્લા તંત્ર પણ સક્રિય બન્યું છે અને અકસ્માતના કારણોની તપાસ પૂર્ણ થયા બાદ જરૂરી કાર્યવાહી કરવામાં આવશે. હાલ ઈજાગ્રસ્ત મુસાફરોની સારવાર ચાલી રહી છે, જ્યારે અકસ્માતનું સાચું કારણ જાણવા માટે પોલીસ દ્વારા વધુ તપાસ હાથ ધરવામાં આવી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ