- આસામમાં એકથી વધુ પત્ની રાખવા પર પ્રતિબંધને લઈ કવાયત શરૂ
- આસામના મુખ્યમંત્રી સૌથી મોટું નિવેદન સામે આવ્યું
- સરકાર ડિસેમ્બરમાં રાજ્યની વિધાનસભામાં બિલ રજૂ કરે તેવી શક્યતા
- એકથી વધુ પત્ની રાખવા પર પ્રતિબંધને લઈ ટૂંક સમયમાં નક્કર પગલાં લઈશું: CM
આસામમાં એકથી વધુ પત્ની રાખવા પર પ્રતિબંધને લઈ કવાયત શરૂ થઈ છે. આ બધાની વચ્ચે આસામના મુખ્યમંત્રી સૌથી મોટું નિવેદન સામે આવ્યું છે. વાત જાણે એમ છે કે, એકથી વધુ પત્ની રાખવા પર પ્રતિબંધ મૂકવા માટે આસામ સરકાર ડિસેમ્બરમાં રાજ્યની વિધાનસભામાં બિલ રજૂ કરે તેવી શક્યતા છે. મુખ્યમંત્રી હિમંતા બિસ્વા સરમાએ કહ્યું કે, અમે રાજ્યમાં લવ જેહાદને રોકવા માટેના બિલમાં કેટલાક મુદ્દા પણ ઉમેરીશું.
આસામના મુખ્યમંત્રી હિમંતા બિસ્વા સરમાએ સરમાએ એકથી વધુ પત્ની રાખવા પર પ્રતિબંધ મૂકવા માટે સોશિયલ મીડિયા દ્વારા લોકોનો અભિપ્રાય માંગ્યો હતો. આ તરફ શનિવારે એક બેઠક બાદ તેમણે કહ્યું હતું કે, લોકોના અભિપ્રાય બાદ અમે એકથી વધુ પત્ની રાખવા પર પ્રતિબંધને લઈ ટૂંક સમયમાં નક્કર પગલાં લઈશું.
શું કહ્યું મુખ્યમંત્રીએ ?
આસામના મુખ્યમંત્રી હિમંતા બિસ્વા સરમાએ શનિવારે આસામના તિનસુકિયામાં સર્વપક્ષીય બેઠકને સંબોધિત કરી હતી. આ દરમ્યાન તેમણે કહ્યું કે, રાજ્ય સરકાર આગામી 45 દિવસમાં રાજ્યમાં એકથી વધુ પત્ની રાખવા પર પ્રતિબંધ મૂકતા બિલને અંતિમ સ્વરૂપ આપશે. જેથી હવે ટુંક સમયમાં આ એકથી વધુ પત્ની રાખવા પર પ્રતિબંધ બિલ વિધાનસભામાં આવી શકે છે.
સરમાએ બેઠકમાં જણાવ્યું હતું કે, "રાજ્ય સરકાર એકથી વધુ પત્ની રાખવા પર પ્રતિબંધ મૂકી શકે છે કે નહીં તેનું વિશ્લેષણ કરવા માટે એક કાનૂની સમિતિની રચના કરવામાં આવી હતી, અમને સકારાત્મક મંતવ્યો મળ્યા છે. અમે એકથી વધુ પત્ની રાખવા પર પ્રતિબંધ મૂકવાના પ્રસ્તાવિત બિલ પર જનતાની સલાહ પણ લીધી હતી.
આ સાથે તેમણે કહ્યું કે, અમે લોકોના અભિપ્રાયો અને સૂચનો પણ માંગ્યા હતા અમને જવાબમાં કુલ 149 સૂચનો મળ્યા છે. તેમાંથી 146 સૂચનો બિલની તરફેણમાં છે અને તે એકથી વધુ પત્ની રાખવા પર પ્રતિબંધ મૂકવાનું સમર્થન કરે છે. ત્રણ સૂચનોએ એકથી વધુ પત્ની રાખવા પર પ્રતિબંધ મૂકવાનો વિરોધ દર્શાવ્યો છે. અમારું આગળનું પગલું બિલનો મુસદ્દો તૈયાર કરવાનું છે. અમે આગામી 45 દિવસમાં બિલને અંતિમ સ્વરૂપ આપીશું. મને લાગે છે કે હું આ વર્ષે ડિસેમ્બરમાં વિધાનસભામાં બિલ રજૂ કરી શકીશ.
લવ જેહાદ પણ બંધ થશે
અગાઉ આસામમાં એકથી વધુ પત્ની રાખવાની પ્રથાને સમાપ્ત કરવા માટે કાયદો બનાવવા માટે રાજ્ય વિધાનસભાની વિધાનસભ્ય ક્ષમતાની તપાસ કરવા માટે નિષ્ણાત સમિતિની રચના કરવામાં આવી હતી. આ સમિતિએ આ વર્ષે 6 ઓગસ્ટે આસામના મુખ્યમંત્રીને પોતાનો રિપોર્ટ સોંપ્યો હતો .દરમિયાન મુખ્યમંત્રીએ વધુમાં જણાવ્યું હતું કે, રાજ્યમાં લવ જેહાદને રોકવા માટે અમે બિલમાં કેટલાક મુદ્દા ઉમેરીશું.
આર્મ્ડ ફોર્સીસ સ્પેશિયલ પાવર્સ એક્ટને લઈ શું કહ્યું ?
આસામના મુખ્યમંત્રીએ આર્મ્ડ ફોર્સીસ સ્પેશિયલ પાવર્સ એક્ટ (AFSPA) પાછી ખેંચવાના મુદ્દે વાત કરતા આસામના મુખ્યમંત્રીએ કહ્યું કે, રાજ્ય સરકાર તેના પર કામ કરી રહી છે.તેમણે કહ્યું, "અમે AFSPAએ હટાવવા જોઈએ કે નહીં તે અંગે નિર્ણય લેવાનો રહેશે. તે રાજ્ય સરકારનો અભિપ્રાય છે અને કેન્દ્ર સરકાર અંતિમ વિચાર લેશે. હું આ મહિને કેન્દ્ર સરકાર સાથે ચર્ચા કરીશ. એક નક્કર નિર્ણય આ મહિનાના અંતમાં લેવામાં આવશે.
સશસ્ત્ર દળો (વિશેષ સત્તાઓ) અધિનિયમ, 1958 એ ભારતની સંસદનો એક અધિનિયમ છે જે ભારતીય સશસ્ત્ર દળોને "અવ્યવસ્થિત વિસ્તારોમાં" જાહેર વ્યવસ્થા જાળવવા માટે વિશેષ સત્તા આપે છે. ડિસ્ટર્બ્ડ એરિયા એક્ટ, 1976 મુજબ એકવાર કોઈ વિસ્તારને 'ડિસ્ટર્બ' જાહેર કરવામાં આવે તો ઓછામાં ઓછા ત્રણ મહિના સુધી યથાસ્થિતિ જાળવી રાખવી જોઈએ.
