ખુલાસો / અંબાજી પ્રસાદના ઘીમાં ભેળસેળ મુદ્દે વધુ એક ઘટસ્ફોટ: સામે આવી અન્ય એક વેપારીની સંડોવણી, જાણો વિગત

• અંબાજીમાં ઘીમાં ભેળસેળ મામલે વધુ એક ખુલાસો
• જતીન શાહે ઘીનો જથ્થો દુષ્યંત સોની પાસેથી ખરીદ્યો હતો
• ઘીમાં ભેળસેળનું સામે આવતા દુષ્યંત સોની ફરાર

અંબાજીમાં ઘીમાં ભેળસેળ સામે આવતા ખળભળાટ મચી ગયો હતો. આ બાદ આ મામલે વધુ એક ચકચારી ખુલાસો થયો છે. જેમાં મુખ્ય આરોપી નીલકંઠ ટ્રેડર્સના માલિક જતીન શાહે ઘીનો જથ્થો અમદાવાદથી દુષ્યંત સોની નામના પાસેથી ખરીદ્યો હોવાનો પર્દાફાશ થયો છે. ત્યારબાદ ઘીમાં ભેળસેળનું સામે આવતા હાલ રાજ્યભરમાં આ મુદ્દો ગાજી રહ્યો છે. ત્યારે દુષ્યંત સોની ફરાર થઇ ગયો હોવાનું સામે આવ્યું છે. હવે પોલીસ આ દિશામાં તપાસના ચક્રો ગતિમાન કરી રહી છે. પોલીસની આ તપાસમાં ભેળસેળના કેસમાં અન્ય વેપારીની પણ સંડોવણી ખુલે તો નવાઈ નહિ.

ભેળસેળના કેસમાં અન્ય વેપારીની પણ સામે આવી શકે સંડોવણી

સમગ્ર કેસની વાત કરીએ તો અંબાજી ખાતે તારીખ 23 થી 29 સપ્ટેમ્બર દરમિયાન ભાદરવી પૂનમના ભવ્યાતી ભવ્ય મેળાનું આયોજન કરાયું હતું. આ મહામેળામાં માનવ મેદની ઉમટી પડી હતી અને લાખોની સંખ્યામાં શ્રદ્ધાળુ આવતા તેમને પ્રસાદમાં મોહનથાળ પીરસાઇ છે જેના સ્ટોકને પહોંચી વળવા માટે એજન્સી દ્વારા ઘીનો જથ્થો અગાઉથી મંગાવી લેવામાં આવ્યો હતો. બાદમાં ઘીના સેમ્પલ ફેલ થતા સમગ્ર મામલો ઉઘાડો પડ્યો છે.

ઘી ના નમુના ફેલ
અમદાવાદના નીલકંઠ ટ્રેડર્સમાંથી ઘી ખરીદવામાં આવ્યું હોવાનું સામે આવતા ઘીનો રેલો અંબાજીથી સીધો અમદાવાદ પહોંચ્યો હતો. હાલ નીલકંઠ ટ્રેડર્સના માલિક જતીન શાહની અટકાયત કરી લેવામાં આવી છે અને આ અંગે ઊંડાણપૂર્વકની તપાસ ચાલી રહી છે. ઉલ્લેખનીય છે કે ઘી ના નમુના ફેલ થયા બાદ પોલીસે મોહિની કેટરર્સના માલિક અને અજાણ્યા વ્યક્તિઓ વિરુદ્ધ ગુનો દાખલ કર્યો હતો.

2012થી 2017 સુધી ટચ સ્ટોન ફાઉન્ડેશન અમદાવાદને સોંપાયો

ઘીના સેમ્પલ ફેલ થયા બાદ મોહનથાળ પ્રસાદનો મામલો ફરી એકવાર ગરમાતા મોહનથાળ બનાવતી કંપની મોહિની કેટરર્સનું ટેન્ડર રિન્યું કરાયું નથી. હવે મોહનથાળ પ્રસાદનો કોન્ટ્રાક્ટ ટચ સ્ટોન ફાઉન્ડેશન એટલે કે અક્ષયપાત્રાને સોંપવામાં આવ્યો છે. અગાઉ વર્ષ 2012થી 2017 સુધી ટચ સ્ટોન ફાઉન્ડેશન અમદાવાદને અંબાજીમાં મોહનથાળ પ્રસાદ સંચાલનની કામગીરી કરેલી છે. ત્યારે વધુ એક વખત આ કોન્ટ્રોક્ટ એજન્સીને છ માસમાં માટે આપવામાં આવ્યો છે. ત્યારે પ્રસાદ કોન્ટ્રાક્ટ માટેની નવી કંપની પણ વિવાદમાં આવી ચૂકી છે. ટચ સ્ટોન ફાઉન્ડેશને અગાઉ પ્રસાદમાં ભેળસેળ કરતા રૂ.60 હજારનો દંડ કરાયો હતો.