અનોખી સેવા / અંબાજીમાં 18 વર્ષથી ચાલતો અનોખો સેવાયજ્ઞ: પાલનપુરના યુગલ તરફથી બાળકોને અપાઇ રહી છે નિ:શુલ્ક 'બાબા સાયકલ સેવા'

• આજે ભાદરવી પૂનમના મેળાનો છઠ્ઠો દિવસ 
• અંબાજીમાં દંપતીની અનોખી સેવા 
• નાના બાળકો માટે નિઃશુલ્ક સાયકલની વ્યવસ્થા 
• પગપાળા આવતા ભક્તોના નાના બાળકો માટે વ્યવસ્થા

આજે ભાદરવી પૂનમના મેળાનો છઠ્ઠો દિવસ છે. અંબાજી ભાદરવી પૂનમના મહામેળામાં લાખો ભક્તો પગપાળા અંબાજી જઈ રહ્યા છે, પદયાત્રીઓને સેવા કેમ્પોમાં સેવાઓ અપાઈ રહી છે. ત્યારે પાલનપુરના રહેવાસી વસંતભાઈ દેવચંદભાઈ મેણાત અને તેમના પત્ની નયનાબેન દ્વારા 18 વર્ષથી અનોખી સેવા કરવામાં આવી રહી છે. આ દંપતી દ્વારા અંબાજી નાના બાળકો સાથે માનતા પૂરી કરવા જતા પદયાત્રીઓને બાબા સાયકલ નિઃશુલ્ક આપવામાં આવી રહી છે.

દંપતીને આવ્યો હતો આ વિચાર
વસંતભાઈ મેણાત અને નયનાબેનને ત્યાં દીકરીનો જન્મ થયો હતો અને તેની માનતા પૂરી કરવા માટે તેઓ બાબા ગાડી લઈને દીકરીને તેમાં બેસાડીને માં અંબાના દર્શન કરવા માટે પગપાળા ગયા હતા, જેનાથી તેમને તકલીફ પડી નહોતી. ત્યારે હાલ મહામેળો ચાલુ છે. અનેક ભક્તો પોતાની માનતા પૂરી કરવા માટે નાના બાળકોને લઈને અંબાજી જતા હોય છે. તેમને ખૂબ તકલીફ પડતી હોય છે, ત્યારે આ દંપતીએ વિચાર આવ્યો હતો કે કોઈ એવી સેવા કરીએ જેનાથી નાના બાળકો સાથે માનતા પૂરી કરવા જતાં લોકોને તકલીફ ન પડે. જેથી તેમના દ્વારા આ બાબા સાયકલ વસાવવામાં આવી હતી.

કોઈ પૈસા લેવામાં આવતા નથી
ભક્તો એ બાબા સાયકલ લઈ જાય અને પોતાના નાના બાળકોને તેમાં બેસાડીને તેઓ પગપાળા ચાલી શકે તે માટે નિઃશુલ્ક સેવા આપવામાં આવી રહી છે, આ બાબા સાયકલ લઈ જવા માટે આમ તો કોઈ ખર્ચ નથી કોઈ પૈસા લેવામાં આવતા નથી, પરંતુ આધાર કાર્ડ અને રૂ.500 ડિપોઝીટ પેટે લેવામાં આવે છે. જે બાબા સાયકલ પરત આપવા આવે, ત્યારે તેમને પરત આપવામાં આવે છે. ત્યારે અંબાજી નાના બાળકોની માનતા પૂરી કરવા જતાં ભક્તો પણ આ સેવાનો લાભ લઇ રહ્યા છે.

હાલ દંપતી પાસે છે 70 જેટલી બાબા સાયકલ
જે કોઈ ભક્તોને નાના બાળકને લઈને અંબાજી માનતા પૂરી કરવા પગપાળા જવાનું હોય તે ભક્તો આ બાબા સાયકલ લઈને જઈ રહ્યા છે. પાલનપુરના આ દંપતીએ 5 સાયકલથી શરૂઆત કરી હતી, આજે તેમની પાસે હાલમાં 70 જેટલી બાબા સાયકલ છે. ઘણા લોકો એડવાન્સ બુકિંગ પણ કરાવે છે. ત્યારે આ દંપતિની સેવાને લોકો બિરદાવી રહ્યા છે.