આક્ષેપ / પાટણના હાજીપુર ગામે વરઘોડા દરમિયાન હુમલાનો આક્ષેપ, પાંચ સામે ફરિયાદ નોંધાઈ

પાટણ જિલ્લાના હાજીપુર ગામમાં લગ્નના વરઘોડા દરમિયાન થયેલી મારામારીની ઘટનાએ સમગ્ર વિસ્તારમાં ચર્ચા જગાવી છે. પીડિત પરિવારના આક્ષેપ મુજબ, ગામના કેટલાક શખ્સોએ વરઘોડો કાઢવા બાબતે વિરોધ વ્યક્ત કરી વરઘોડા પર હુમલો કર્યો હતો. આ ઘટનામાં વરરાજાને ઘોડા પરથી નીચે પાડી માર મારવામાં આવ્યો હોવાનો તેમજ જાતિસૂચક શબ્દો બોલી ધમકીઓ આપવામાં આવી હોવાનો આરોપ મૂકવામાં આવ્યો છે.

જાનથી મારી નાંખવાની ધમકીઓ આપી

પરિવારના જણાવ્યા મુજબ, હુમલા દરમિયાન વરરાજાનો સૂટ પણ ફાડી નાખવામાં આવ્યો હતો અને "ફરી વરઘોડો કાઢશો તો જાનથી મારી નાખીશું" જેવી ધમકીઓ આપવામાં આવી હતી. ઉપરાંત, વરરાજાના કાકા, કાકી અને માતા પર પણ હુમલો કરવામાં આવ્યો હોવાનો આક્ષેપ કરવામાં આવ્યો છે.

ગામમાં તણાવપૂર્ણ વાતાવરણ સર્જાયું

ઘટનાને પગલે ગામમાં તણાવપૂર્ણ વાતાવરણ સર્જાયું હતું. દેવીપૂજક સમાજના વરઘોડા મુદ્દે થયેલી આ ઘટનાને લઈને પરિવાર દ્વારા બાલીસણા પોલીસ મથકે પાંચ શખ્સો સામે નામજોગ ફરિયાદ નોંધાવવામાં આવી છે. ફરિયાદમાં મારામારી, ધમકી અને જાતિસૂચક અપમાન સહિતના ગંભીર આક્ષેપો કરવામાં આવ્યા છે.

ચુસ્ત બંદોબસ્ત ગોઠવવામાં આવ્યો

ઘટનાની ગંભીરતાને ધ્યાનમાં રાખીને ગામમાં કોઈ અનિચ્છનીય બનાવ ન બને તે માટે પોલીસ દ્વારા ચુસ્ત બંદોબસ્ત ગોઠવવામાં આવ્યો છે તેમજ પોલીસ પોઈન્ટ પણ મૂકવામાં આવ્યો છે. બીજી તરફ, ફરિયાદમાં નામજોગ કરાયેલા અને હાલ ફરાર આરોપીઓને ઝડપવા પોલીસે તપાસ શરૂ કરી છે.

આ પણ વાંચોઃ નાની ખાખર ગામે કોપર રિસાયક્લિંગ પ્લાન્ટ સામે ગ્રામજનોનો વિરોધ, 14 ગામોના લોકો ધરણા પર

કડક કાનૂની કાર્યવાહી કરવાની માંગ

પીડિત પરિવારે ઘટનામાં સંડોવાયેલા તમામ આરોપીઓ સામે કડક કાનૂની કાર્યવાહી કરવાની માંગ કરી છે. હાલ પોલીસ સમગ્ર મામલે વિવિધ પાસાઓની તપાસ કરી રહી છે. પોલીસ તપાસ પૂર્ણ થયા બાદ જ સમગ્ર ઘટનાની હકીકત સ્પષ્ટ થશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ