ખાસ ઝુંબેશ / અમદાવાદીઓ વાહનના ચોપડી કાગળિયા સાથે રાખજો, આ વિસ્તારોમાં પોલીસની મેગા ટ્રાફિક ડ્રાઈવ, નિયમ તોડયા તો ગયા

• પોલીસની સ્પેશિયલ ડ્રાઇવ થશે શરૂ
• રોંગ સાઇડ અને પાર્કિંગને લઇ ઝુંબેશ
• કોર્પોરેશનને સાથે રાખી કાર્યવાહી

 ઈસ્કોન બ્રિજ અકસ્માતની ઘટના બાદ પોલીસે ટ્રાફિક નિયમનો ભંગ કરનાર સામે કાર્યવાહી શરૂ કરી છે.  આવતીકાલથી અમદાવાદ ટ્રાફિક પોલીસ દ્વારા શહેરનાં વાહનોની અવર જવરથી ધમધમતા વિસ્તારોમાં સ્પેશ્યલ ડ્રાઈવ શરૂ કરવામાં આવનાર છે. ત્યારે 3 દિવસ સુધી ટ્રાફિક નિયમનને લઈને ખાસ ઝુંબેશ હાથ ધરવામાં આવશે. ત્યારે આ ઝુંબેશમાં AMC  ને સાથે રાખીને દબાણ પણ દૂર કરવામા આવશે. 

આરટીઓ દ્વારા તથ્ય પટેલનું લાયસન્સ રદ્દ કરવામાં આવ્યુંઃ એન.એન.ચૌધરી
ટ્રાફિક વિભાગનાં  પોલીસ વડા એન.એન.ચૌધરીએ જણાવ્યું હતું કે આવતીકાલે શહેરનાં એસ.જી. હાઈવે, સી.જી. રોડ, નારણપુરા ખાતે ડ્રાઈવ શરૂ કરવામાં આવશે. જો કોઈ પણ વ્યક્તિએ વ્હિકલ આડેધડ પાર્ક કર્યું હશે તો તેને ટોઈંગ કરવામાં આવશે. તથ્ય અકસ્માત કેસ મામલે ટ્રાફિક પોલીસ દ્વારા આવતીકાલે ચાર્જશીટ કરવામાં આવશે. તેમજ RTO  દ્વારા લાયસન્સ રદ્દ કરવામાં આવ્યું છે. તેમજ 17 સાક્ષીઓ અને સાયન્ટિફિક પુરાવા એકત્ર કરવામાં આવ્યા છે અને 308 હેઠળ તથ્ય સામે ગુનો નોંધવામાં આવશે.  

ઓવર સ્પીડ 57, ડ્રન્ક એન્ડ ડ્રાઈવના 16 અને ભયજનક ડ્રાઈવિંગના 119 કેસ નોંધાયા
આજે અમદાવાદ પોલીસે ટ્રાફિક અંગે 24 કલાકમાં સ્પેશિયલ ડ્રાઈવ યોજી હતી. જેમાં તપાસ દરમિયાન નિયમ ભંગના 192 કેસ નોંધાયા હતા. બીજી બાજુ તપાસમાં ડ્રિન્ક એન્ડ ડ્રાઈવ, રેસ ડ્રાઈવ, અને ઓવર સ્પીડમા વાહન ચલાવતા શખ્સો પોલીસની ઝપટે ચડયા હતા. જેની સામે પોલીસે કાયદાનો દંડો ઉગામી નિયમોને અવગણના કરતા શખ્સોને પાઠ ભણાવ્યા હતા.

અનેક વિસ્તારોમાં રાત્રે 11 પછી લારી-ગલ્લા સહિતની દુકાનો કરાવી બંધ

પોલીસના ચેકિંગ દરમિયાન ઓવર સ્પીડ 57, ડ્રન્ક એન્ડ ડ્રાઈવના 16 અને ભયજનક ડ્રાઈવિંગના 119 કેસ નોંધાયા હતા. રાત્રિના સમયે નબીરાઓ કાળ બનીને વાહનો ચલાવતા હોવાથી અનેક લોકો આવા નબીરાઓના ભોગ બન્યા છે. અમુક કિસ્સાઓમાં તો આવારાતત્વોના પાપે લોકો મોતના ખપ્પરમાં પણ હોમાયા છે ત્યારે આ સમગ્ર સ્થિતિને ધ્યાને લઈ પોલીસે અનેક વિસ્તારમાં મોડી રાત્રે પેટ્રોલિંગની કાર્યવાહી કરી હતી. અનેક વિસ્તારોમાં રાત્રે 11 પછી લારી-ગલ્લા સહિતની દુકાનો પણ બંધ કરાવી હતી.